កីឡាអន្តរជាតិ
អន្តរជាតិ
Kazuyoshi Miura កីឡាករអាជីពវ័យចំណាស់ជាងគេលើពិភពលោក ប្រារព្ធខួប៥១ឆ្នាំ បន្ទាប់ កីឡាករ Kazuyoshi Miura ហៅ «King Kazu» ឈានដល់អាយុ៥១ឆ្នាំ។ រូបថត AFP
× កីឡាករជប៉ុន Kazuyoshi Miura ដែលទើបទទួលបានកំណត់ត្រាពិភពលោក Guinness World Records ក្នុងនាមជាកីឡាករវ័យចំណាស់ជាងគេដែលបានស៊ុតបាល់បញ្ចូលទីក្នុងក្របខណ្ឌបាល់ទាត់អាជីព ឈានដល់អាយុ៥១ឆ្នាំកាលពីថ្ងៃទី២៦ ខែកុម្ភៈ។
ក្របខណ្ឌកីឡាបាល់ទាត់លំដាប់ទីពីររបស់ជប៉ុន (J2 League) ចាប់ផ្តើមរដូវកាលថ្មីរបស់ខ្លួន កាលពីថ្ងៃទី២៥ ខែកុម្ភៈ ហើយមួយថ្ងៃបន្ទាប់ កីឡាករ Kazuyoshi Miura រហស្សនាម «King Kazu» ដែលជាខ្សែប្រយុទ្ធរបស់ក្លិប Yokohama FC ត្រូវប្រារព្ធខួប៥១ឆ្នាំរបស់ខ្លួន។
Kazu បច្ចុប្បន្នមានឈ្មោះជាកីឡាករអាជីពដែលមានវ័យចំណាស់ជាងគេលើលោក ដោយបានប្រកបអាជីពតំបូងនៅក្លិប Santos របស់ប្រេស៊ីលនៅឆ្នាំ១៩៨៦ ហើយបន្តលេងឲ្យក្លិបមួយចំនួនទៀត ដូចជា Palmeiras និង Coritiba មុននឹងវិលត្រឡប់ទៅជប៉ុនវិញក្នុងឆ្នាំ១៩៩០ ។
ជាមួយក្លិប Yomiuri/Kawasaki កីឡាករ Kazu បានជើងឯក J.League ចំនួន៤លើក។ នៅឆ្នាំ១៩៩៣ កីឡាកររូបនេះ បានជាប់ឈ្មោះជាកីឡាករឆ្នើមជាងគេនៅ J.League និងជាកីឡាករឆ្នើមប្រចាំអាស៊ីផងដែរ។ គាត់ធ្លាប់លេងខ្ចីជើងនៅ Genoa របស់អ៊ីតាលី និងបន្តទៅ Dinamo Zagreb របស់ក្រូអាស៊ី មុនត្រឡប់ទៅកាន់ជប៉ុន ហើយលេងជាបន្តបន្ទាប់នៅ Kyoto Purple Sanga និង Vissel Kobe។ Kazu ក្លាយជាកីឡាករក្លិប Yokohama FC ចាប់តាំងពីឆ្នាំ២០០៥មក ដោយនៅឆ្នាំដំបូង គាត់ទៅលេងក្នុងលក្ខខណ្ឌខ្ចីជើងនៅ Syndney FC របស់អូស្ត្រាលីរយៈពេល២ខែ។
កាលពីថ្ងៃទី៥ ខែមីនា ឆ្នាំ២០១៧ Kazu បានក្លាយជាកីឡាករវ័យចំណាស់ជាងគេ [៥០ឆ្នាំ] ខណៈក្រុម Yokohama របស់លោកប្រកួតតទល់ជាមួយ V-Varen Nagasaki ។ កំណត់ត្រាកន្លងមក គឺលោក Stanley Matthews ដែលលេងរហូតដល់អាយុ៥០ឆ្នាំ មុនបញ្ចប់អាជីពនៅឆ្នាំ១៩៦៥ ។
បន្ទាប់មក Kazu បន្តបំបែកកំណត់ត្រារបស់ Matthews ក្នុងនាមជាកីឡាករវ័យចំណាស់ជាងគេដែលបានស៊ុតបាល់បញ្ចូលទី ខណៈលោកបានជួយឲ្យក្រុម Yokohama របស់ខ្លួន ទទួលជ័យជម្នះ ១-០ លើ Thespakusatsu Gunma។ លោកបានទទួលបណ្ណកំណត់ត្រាពិភពលោកពី Guinness World Records នាពិធីមួយនៅក្រុងតូក្យូ កាលពីថ្ងៃទី១៥ ខែកុម្ភៈ។
ទាក់ទងនឹងកីឡាករបាល់ទាត់អាជីពដែលមានវ័យចំណាស់ជាងគេ អតីតអ្នកចាំទី Brad Friedel របស់ Tottenham មានកំណត់ត្រានៅ Premier League ដោយលេងរហូតដល់អាយុ៤៣ឆ្នាំ ដូចអតីតកីឡាករ John Burridge នៃក្លិប Manchester City។
ដោយឡែក អតីតកីឡាករអន្តរជាតិស្កុតឡែន Neil McBain ក៏បានលេងរហូតដល់អាយុ៥១ឆ្នាំផងដែរ សម្រាប់ក្រុម New Brighton នៃក្របខណ្ឌលំដាប់ទាបនៅអង់គ្លេស។ ប៉ុន្តែកំណត់ត្រាដែលគួរឲ្យកត់សម្គាល់នោះ គឺលោក Salvador Reyes អតីតខ្សែប្រយុទ្ធម៉ិកស៊ិក ដែលក្លិប Chivas របស់ខ្លួនផ្តល់កិត្តិយស ឲ្យទាត់បាល់ដំបូងនាការប្រកួតផ្លូវការមួយនៅឆ្នាំ២០០៨។ នាពេលនោះ លោកមានអាយុ៧១ឆ្នាំ ហើយត្រូវបានជំនួសចេញភ្លាមក្រោយទាត់បាល់បើកការប្រកួត៕
© រក្សាសិទ្ធិដោយ thmeythmey.com