អន្តរជាតិ
ប្រធានាធិបតីអាហ្វហ្គានីស្ថានដាក់ចេញផែនការស្វែងរកសន្តិភាពជាមួយក្រុមតាលីបង់ ប្រធានាធិបតីអាហ្វហ្គានីស្ថាន Ashraf Ghani (រូបភាព៖ AFP)
× នៅថ្ងៃទី២៨ ខែកុម្ភៈ ប្រធានាធិបតីអាហ្វហ្គានីស្ថាន Ashraf Ghani បានបញ្ចេញផែនការស្វែងរកសន្តិភាពជាមួយក្រុមឧទ្ទាមតាលីបង់ ដើម្បីឈានទៅបញ្ចប់ជម្លោះរ៉ាំរ៉ៃច្រើនជាង១៦ឆ្នាំ។ ក្រោមផែនការនេះ ក្រុមតាលីបង់អាចបង្កើតបក្សនយោបាយដើម្បីចូលរួមការបោះឆ្នោតជាតិ ហើយបណ្ដាមេដឹកនាំក្រុមនេះអាចត្រូវបានដកឈ្មោះពីបញ្ជីទណ្ឌកម្មអន្តរជាតិផង។ ប៉ុន្តែក្រុមឧទ្ទាមនេះមិនចង់ចរចាជាមួយរដ្ឋាភិបាលក្រុងកាប៊ុលឡើយ តែចង់ជជែកផ្ទាល់ជាមួយក្រុងវ៉ាស៊ីនតោនវិញ។
ប្រធានាធិបតីអាហ្វហ្គានីស្ថាន Ashraf Ghani បានស្នើបទឈប់បាញ់និងការចចាសន្តិភាពដោយគ្មានលក្ខខណ្ឌជាមួយក្រុមឧទ្ទាមតាលីបង់ ដើម្បីស្វែងរកសន្តិភាពក្នុងប្រទេសដែលហែកហួរដោយសង្គ្រាមតាំងពីឆ្នាំ២០០១ មក។ លោក Ashraf Ghani បានស្នើបែបនេះក្នុងកិច្ចប្រជុំអន្តរជាតិស្ដីពីអាហ្វហ្គានីស្ថាននៅថ្ងៃទី២៨ ខែកុម្ភៈ ដែលមានគោលដៅបញ្ចប់ជម្លោះជាង១៦ឆ្នាំ និងការកសាងសន្តិភាពឡើងវិញ។
ថ្លែងក្នុងពិធីបើកកិច្ចប្រជុំអន្តរជាតិនេះ លោក Ashraf Ghani និយាយថា ការឈប់បាញ់គួរធ្វើឡើង ហើយក្រុមតាលីបង់ត្រូវបានទទួលស្គាល់ជាបក្សនយោបាយ ឯដំណើការកសាងទំនុកចិត្តក៏គួរចាប់ផ្ដើមដែរ។ លោកបន្តថា នៅពេលនេះ ការសម្រេចចិត្តធ្លាក់ទៅក្នុងក្រុមតាលីបង់ ហើយក្រុមនេះគួរទទួលសំណើនេះ ដើម្បីនាំយកស្ថិរភាពសម្រាប់អាហ្វហ្គានីស្ថាន។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ក្នុងផែនការស្វែងរកសន្តិភាពនេះ ប្រធានាធិបតីអាហ្វហ្គានីស្ថានរូបនេះក៏ស្នើឲ្យក្រុមតាលីបង់ទទួលស្គាល់រដ្ឋាភិបាលក្រុងកាប៊ុល និងរដ្ឋធម្មនុញ្ញ។ បញ្ហានេះ គឺជាចំណុចរាំងស្ទះដល់ការប៉ុនប៉ងការចរចាសន្តិភាពកន្លងមក។ លើសពីនោះ លោក Ghani បានផ្ដល់សម្បទានមួយចំនួនទៀតដូចជាការដោះលែងអ្នកទោសក្រុមតាលីបង់ ការបង្កើតការិយាល័យក្រុមនេះក្នុងរដ្ឋធានីកាប៊ុល ឬទីក្រុងផ្សេងដើម្បីងាយស្រួលចរចា និងការលុបចោលមេដឹកនាំតាលីបង់ពីបញ្ជីភេរវកម្មអន្តរជាតិផងដែរ។
សំណើរបស់ប្រធានាធិបតីអាហ្វហ្គានីស្ថាន ធ្វើឡើងពីរថ្ងៃក្រោយក្រុមជ្រុលនិយមមួយនេះប្រកាសជំហរចរចាជាមួយអាមេរិក។ ក្នុងសេចក្ដីប្រកាសថ្ងៃទី២៦ ខែកុម្ភៈ ក្រុមតាលីបង់និយាយថា ខ្លួនត្រៀមរួចស្រេចដើម្បីជជែកជាមួយអាមេរិកដើម្បីស្វែងរកដំណោះស្រាយសន្តិភាព។ ប៉ុន្តែក្រុមនេះមិនបានបញ្ជាក់ពីការចរចាជាមួយរដ្ឋាភិបាលកាប៊ុលឡើយ។ សម្រាប់អាមេរិក វត្តមានក្រុងកាប៊ុល គឺជារឿងសំខាន់ក្នុងការចរចាទាំងឡាយ។
សូមបញ្ជាក់ថា ក្រុមជ្រុលនិយមមួយនេះបានបង្កើនការវាយប្រហារជាច្រើនលើនៅតាមទីក្រុងនានា និងនៅរដ្ឋធានីកាប៊ុល ដើម្បីឆ្លើយតបនឹងនយោបាយយោធាថ្មីនៅអាហ្វហ្គានីស្ថានរបស់រដ្ឋបាលប្រធានាធិបតី ដូណាល់ ត្រាំ ។ ជនស៊ីវិលស្លូតត្រង់រាប់រយនាក់ បានស្លាប់ និងរបួសក្នុងការវាយប្រហារអត្តឃាតផង និងការវាយប្រហារទីតាំងយោធាផង។ មកទល់ពេលនេះ គេមិនទាន់ឃើញការឆ្លើយតបណាមួយរបស់អាមេរិកទៅនឹងសំណើរបស់ក្រុមតាលីបង់ឡើយ៕
Tag:
អាហ្វហ្គានីស្ថាន
តាលីបង់
អាមេរិក
© រក្សាសិទ្ធិដោយ thmeythmey.com