ជាតិ
កម្ពុជានឹងចាត់វិធានការលើជនបរទេសដែលគេចវេះការបង់ពន្ធ
× ភ្នំពេញ៖ ក្នុងកិច្ចប្រជុំអន្តរក្រសួង ដែលមានក្រសួងមហាផ្ទៃ និងក្រសួងការងារ លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ បានអះអាងពីវិធានការទៅលើជនបរទេសដែលមកធ្វើការនៅកម្ពុជា ប៉ុន្តែគេចវេះ មិនធ្វើបណ្ណការងារ ដើម្បីបង់ពន្ធចូលរដ្ឋ។
«កម្ពុជា នឹងចាត់វិធានការ ក៏ដូចជាការអនុវត្ដច្បាប់គ្មានការកលើកលែង ចំពោះជនបរទេសណា ដែលមកធ្វើការនៅកម្ពុជា ដោយមិនធ្វើប័ណ្ណការងារ ដើម្បីបង់ពន្ធចូលរដ្ឋ»។ នេះបើតាមសំដីរបស់លោក លោក សុខ ផល ដែលដកស្រង់ដោយទីភ្នាក់ងារព័ត៌មាន AKP ក្នុងកិច្ចប្រជុំអន្តរក្រសួង កាលពីថ្ងៃទី១ ខែមីនា នេះ នាទីស្តីការក្រសួងមហាផ្ទៃ។
អគ្គនាយកនៃអគ្គនាយកដ្ឋានអន្តោប្រវេសន៍រូបនេះ បានបញ្ជាក់ថា នគរបាលអន្តោប្រវេសន៍ នឹងចុះប្រតិបត្តិការត្រួតពិនិត្យប័ណ្ណការងាររបស់ជនបរទេស ដែលកំពុងធ្វើការតាមបណ្តារោងចក្រ សហគ្រាស គ្រឹះស្ថាន និងកាស៊ីណូទូទាំងប្រទេស នៅពាក់កណ្ដាលខែមេសា ក្រោយចូលឆ្នាំខ្មែរ។
«ការចុះប្រតិបត្តិការត្រួតពិនិត្យនេះ ដើម្បីធានាថា រាល់ជនបរទេសទាំងនោះបានគោរពច្បាប់អន្តោប្រវេសន៍កម្ពុជា ហើយនិងបង់ពន្ធចូលរដ្ឋឲ្យបានត្រឹមត្រូវ»។ នេះជាការបញ្ជាក់ លោក សុខ ផល ហើយបន្ថែមទៀតថា ការបង់ពន្ធលើប័ណ្ណការងារជនបរទេស ដែលធ្វើការនៅកម្ពុជា មានតម្លៃ ៤០ម៉ឺនរៀល ដែលស្មើនឹង ១០០ដុល្លារក្នុងមួយឆ្នាំ ហើយម្យ៉ាងទៀតវិញជនបរទេស ទាំងអស់ត្រូវមានកាតព្វកិច្ចក្នុងការបង់ពន្ធនេះ។
បន្ថែមពីលើនេះ សម្ដេច ស ខេង ក្នុងពិធីបិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅបន្ដនៃអគ្គនាយកដ្ឋានអន្ដោប្រវេសន៍ កាលពីរសៀលថ្ងៃទី២៧ ខែកុម្ភៈ កន្លងទៅ បានលើកឡើងថា កម្ពុជាមិនបណ្តោយឲ្យស្ថានភាពបែបនេះបន្តទៀតនោះឡើយ។ សម្តេចបានបញ្ជាក់ថា៖ «ក្នុងមួយឆ្នាំៗ កម្ពុជា បានបាត់ចំណូលជាង ២០លានដុល្លារ ពីការគេចវេះបង់ពន្ធរបស់ពលករបរទេស ដែលមកធ្វើការនៅកម្ពុជា»។
ក្នុងចំណោមជនបរទេសអន្តោប្រវេសន៍ជាង ១៦ម៉ឺននាក់ ដែលមកស្នាក់នៅ និងធ្វើការនៅកម្ពុជា គឺមានតែប្រមាណ ៥ម៉ឺន៧ពាន់នាក់ប៉ុណ្ណោះ ដែលមានបណ្ណការងារស្របច្បាប់។ សម្តេចស ខេង បានបញ្ជាក់បន្ថែមថា «ជនបរទេសអន្តោប្រវេសន៍ និងពលករបរទេស ដែលមកស្នាក់នៅ ហើយបម្រើការនៅកម្ពុជា ត្រូវតែអនុវត្ត ទៅតាមគោលការណ៍ច្បាប់ ដែលបានកំណត់បើពុំដូច្នោះទេ នឹងត្រូវពិន័យជាប្រាក់ទ្វេគុណ ឬបណ្តេញចេញពីប្រទេសកម្ពុជាតែម្តង»៕
Tag:
ជនបរទេស
ពន្ធ
ប័ណ្ណការងារ
សុខ ផល
ស ខេង
© រក្សាសិទ្ធិដោយ thmeythmey.com