នៅក្នុងជីវិត បុគ្គលគ្រប់រូប, មុនដំបូងឡើយ, ដាក់ចិត្តដាក់កាយត្រឹមតែធ្វើការឲ្យគេប៉ុណ្ណោះដើម្បីទទួលបានប្រាក់កម្រៃ និងបទពិសោធន៍។ តែក្រោយមក ពួកគេក៏មានបំណងចង់ក្លាយខ្លួនទៅជាថៅកែគេវិញ។
គំនិតនេះ កើតមានឡើងចំពោះមនុស្សគ្រប់គ្នា និងគ្រប់ជាតិសាសន៍ទាំងអស់នៅលើពិភពលោកនេះ។ វាមិនមែនជាគំនិតខុសឡើយដែលចង់ក្លាយខ្លួនជាសហគ្រិន ឬជាថៅកែនោះ។ តែបុគ្គលភាគច្រើនច្រើនតែភ្លេចគិតថា អ្នកជោគជ័យនីមួយៗនៅក្នុងជំនួញ មិនមែនជារឿងធម្មតាឡើយ។ ប្រសិនបើគ្រប់គ្នាធ្វើទៅហើយ ជោគជ័យនោះ គ្មានឡើយអ្នកក្រីក្រ។ តើថៅកែឈឺក្បាលរឿងអ្វីខ្លះ?
ចំណុចដែលថៅកែឈឺក្បាលជារួមមាន៖
ទី១) ស្វែងរកថវិកាដើម្បីបង្កើតអាជីវកម្ម
ទី២) ស្វែងរកទីកន្លែងសម្រាប់ប្រតិបត្តិការអាជីវកម្ម
ទី៣) បង្កើតផលិតផល ឬបង្កើតសេវាកម្ម
ទី៤) ស្វែងរកទីផ្សារដើម្បីលក់ផលិតផល ឬសេវាកម្ម
ទី៥) ខ្វល់ខ្វាយរឿងខាត និងចំណេញជារៀងរាល់ខែ
ទី៦) គ្រប់គ្រងបុគ្គលិក (នេះ គឺជាចំណុចងាប់រស់របស់គ្រប់ហ៊ុន។ បុគ្គលិកមិនគិតដូចម្ចាស់ក្រុមហ៊ុនឡើយ)
ទី៧) ចំណាយពេលធ្វើការ និងគិតពីការងារទ្វេដង(ត្រូវការភាពអំណត់ខ្លាំងណាស់)
ទី៨) រងសម្ពាធពីបុគ្គលិកសុំតំឡើងប្រាក់ខែជារៀងរាល់ខែ
ទី៩) ភ័យខ្លាចពីហានិភ័យរឿងបរាជ័យជារៀងរាល់ពេល
ទី១០) រិះរកគំនិតថ្មីៗដើម្បីប្រកួតប្រជែងជាមួយដៃគូរក្នុងជំនួញស្ទើរគ្រប់វិនាទី
នៅក្នុងពិភពជំនួញ គេច្រើននិយាយថា បង្កើតអាជីវកម្មជារឿងស្រួលទេ។ តែអ្វីដែលលំបាក គឺធ្វើឲ្យអាជីវកម្មដំណើរការ អាជីវកម្មរីកចម្រើន និងមាននិរន្តរភាព។ សូមកុំភ្លេចថា ជំនួញ ឬអាជីវកម្មអាចជោគជ័យ១០, ២០, ៥០ឆ្នាំ តែអាចបរាជ័យទៅវិញតែក្នុងរយៈពេលមួយប៉ប្រិចភ្នែកប៉ុណ្ណោះ៕