ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
មានបញ្ហានៃការគេង
ការបាក់ទឹកចិត្តអាចប៉ះពាល់ដល់រាងកាយព្រមទាំងអារម្មណ៍មនុស្ស។ ការដែលមានបញ្ហាក្នុងការគេង គឺជារឿងដែលកើតមានជាញឹកញាប់លើអ្នកដែលបាក់ទឹកចិត្ត។ ប៉ុន្តែអ្នកខ្លះអាចមានមធ្យោបាយច្រើនក្នុងការជួយឲ្យគេងបានកាន់តែស្រួល។
ឈឺទ្រូង
វាអាចជាសញ្ញាមួយនៃបញ្ហាបេះដូង សួត ឬក្រពះ ដូច្នេះចូរទៅជួបគ្រូពេទ្យដើម្បីទាត់ចោលមូលហេតុទាំងនេះ។ ពេលខ្លះ វាក៏ត្រូវបានគេចាត់ទុកថាជារោគសញ្ញាមួយនៃការបាក់ទឹកចិត្តដេរ។ ការបាក់ទឹកចិត្តក៏អាចបង្កើនការប្រឈមនឹងជំងឺបេះដូងដែរ។ ជាមួយគ្នានេះដែរ អ្នកដែលធ្លាប់មានជំងឺគាំងបេះដូងទំនងជាធ្លាប់មានការបាក់ទឹកចិត្តផង។
អស់កម្លាំង
បើសិនជាអ្នកមានអារម្មណ៍ថានឿយហត់ ហើយគ្មានកម្លាំងកំហែងធ្វើការងារប្រចាំថ្ងៃទេ ទោះបីជានៅពេលគេង ឬសម្រាកច្រើនក៏ដោយនោះ វាប្រហែលជាសញ្ញាមួយដែលអ្នកកំពុងតែបាក់ទឹកចិត្តហើយ។ ការបាក់ទឹកចិត្ត និងអស់កម្លាំងជាមួយគ្នាងាយនឹងបង្កឲ្យបញ្ហាទាំងពីរនេះកាន់តែធ្ងន់ធ្ងរបានណាស់។
ការឈឺសាច់ដុំ និងសន្លាក់
នៅពេលអ្នករស់នៅជាមួយនឹងការឈឺចាប់ វាអាចបង្កើនការប្រឈមនឹងការបាក់ទឹកចិត្តបាន។ ការបាក់ទឹកចិត្តក៏ប្រហែលជានាំឲ្យមានការឈឺចាប់បានដែរដោយសារតែបញ្ហាទាំងពីរនេះប្រើប្រាស់សារធាតិគីមីបញ្ជូនសញ្ញាជាមួយគ្នាក្នុងខួរក្បាល។ អ្នកដែលបាក់ទឹកចិត្តទំនងជាមានការឈឺចាប់ជាទៀងទាត់រហូតដល់បីដងឯណោះ។
បញ្ហានៃការរំលាយអាហារ
ខួរក្បាល និងប្រព័ន្ធរំលាយអាហាររបស់មនុស្សយើងមានទំនាក់ទំនងគ្នាយ៉ាងខ្លាំង ដែលនេះគឺជាមូលហេតុថា មនុស្សភាគច្រើនមានការឈឺក្រពះ ឬចង្អោនៅពេលស្ត្រេស ឬបារម្ភច្រើន។ ការបាក់ទឹកចិត្តអាចធ្វើឲ្យក្រពះមានបញ្ហាដែរដូចជា ចង្អោ ក្រពះមិនកិន រាករូស ឬទល់លាមក។
ការឈឺក្បាល
ការសិក្សាមួយបានបង្ហាញថា អ្នកដែលមានការបាក់ទឹកចិត្តខ្លាំងគឺទំនងជាមានការឈឺក្បាលបែបប្រកាំងរហូតដល់បីដង ហើយអ្នកដែលឈឺក្បាលបែបប្រកាំទំនងជាមានការបាក់ទឹកចិត្តរហូតដល់ ៧ដងឯណោះ។
ចំណង់អាហារ ឬទម្ងន់ប្រែប្រួល
អ្នកខ្លះមានអារម្មណ៍ថាមិនសូវឃ្លានអាហារនៅពេលពួកគេបាក់ទឹកចិត្ត។ អ្នកផ្សេងៗទៀតមិនអាចឈប់ញ៉ាំអាហារបានតែម្តង។ លទ្ធផលអាចជាការឡើងទម្ងន់ ឬស្រកទម្ងន់ជាមួយគ្នានឹងការអស់កម្លាំងថែមទៀត។ ការបាក់ទឹកចិត្តមានជាប់ទាក់ទងគ្នានឹងការញ៉ាំអាហារខុសធម្មតា ឬមិនឃ្លានអាហារដែរ។
ឈឺខ្នង
នៅពេលវាធ្វើឲ្យអ្នកឈឺចាប់ជាប្រចាំ វាប្រហែលជានាំឲ្យកើតការបាក់ទឹកចិត្តដែរ។ ហើយអ្នកដែលបាក់ទឹកចិត្តប្រហែលជាមានការឈឺចាប់នៅខ្នង ឬកញ្ចឹងកររហូតដល់ ៤ដងឯណោះ។
បញ្ហាផ្លូវភេទ
បើសិនជាអ្នកបាក់ទឹកចិត្ត អ្នកប្រហែលជាបាត់បង់ចំណង់ផ្លូវភេទ។ ថ្នាំតាមវេជ្ជបញ្ជាខ្លះដែលព្យាបាលការបាក់ទឹកចិត្តក៏អាចធ្វើឲ្យចំណង់ផ្លូវភេទខ្សត់ខ្សោយបានដែរ។ ចូរពិគ្រោះជាមួយគ្រូពេទ្យអំពីជម្រើសនៃការប្រើថ្នាំរបស់អ្នកផងទៅ។
ការហាត់ប្រាណ
អ្នកស្រាវជ្រាវបាននិយាយថា បើសិនជាអ្នកហាត់ប្រាណជាប្រចាំ វានឹងបញ្ចេញសារធាតុគីមីជាច្រើនទៅក្នុងខួរក្បាលអ្នកដែលធ្វើឲ្យមានអារម្មណ៍ល្អ និងបន្ថយការឈឺចាប់។ ថ្វីបើសកម្មភាពរាងកាយតែឯងមិនអាចព្យាបាលការបាក់ទឹកចិត្តក៏ដោយ តែវាអាចជួយបំបាត់បញ្ហានេះបានរយៈពេលយូរដែរ។ បើសិនជាអ្នកបាក់ទឹកចិត្ត ពេលខ្លះវាអាចពិបាកនឹងមានកម្លាំងហាត់ប្រាណដែរ។ ប៉ុន្តែចូរចងចាំថា វាអាចបំបាត់ការអស់កម្លាំង និងជួយឲ្យគេងលក់កាន់តែស្រួលជាងមុនបាន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
