ពីនេះ ពីនោះ
ព័ត៍មានសុខភាព
មានដឹងទេថា តើការលើសសម្ពាធឈាមប៉ះពាល់រាងកាយដូចម្តេចខ្លះទេ?
× ហេតុអ្វីបានជាការលើសសម្ពាធឈាមគឺជាបញ្ហាដ៏ធំ? ដោយសារតែវានឹងដាក់សម្ពាធទៅលើបេះដូង និងសរសៃឈាម ទោះបីជាអ្នកមិនមានអារម្មណ៍ប្លែកអ្វីក៏ដោយ។ រឿងនេះនឹងបង្កើនឱកាសនៃការកើតជំងឺគាំងបេះដូង ឬដាច់សរសៃឈាមខួរក្បាលបាន។
រយៈពេលយូរៗទៅ បញ្ហាក្នុងសរសៃឈាមអាក់ទែអាចនឹងកាត់បន្ថយលំហូរឈាម ធ្វើឲ្យជាលិកាប្រើប្រាស់ឈាមមិនបានគ្រប់គ្រាន់ មានន័យថា ខួរក្បាល តម្រងនោម ភ្នែក និងជីវិតផ្លូវភេទនឹងរងការប៉ះពាល់ជាមិនខាន។ ការរស់នៅក្នុងទម្លាប់ផ្តល់សុខភាព និងលេបថ្នាំត្រឹមត្រូវដើម្បីថែរក្សាសម្ពាធឈាមនៅធម្មតា អាចជួយបង្ការបញ្ហារយៈពេលវែងបាន។
សរសៃឈាមអាក់ទែ
ជាធម្មតា សរសៃឈាមដែលដឹកនាំឈាមចេញពីបេះដូងទៅរាងកាយគឺមានភ្នាសខាងក្នុងរលោត។ វាមានភាពរឹងមាំ និងអាចបត់បែនគ្រប់គ្រាន់ក្នុងការបញ្ជូនឈាម។ ការដែលលើសសម្ពាធឈាម នឹងធ្វើឲ្យសមត្ថភាពរបស់សរសៃឈាមខាងលើនេះប្រែប្រួល ហើយក៏អាចបំផ្លាញកោសិកាជញ្ជាំងសរសៃឈាមអាក់ទែបានទៀត។ បើសិនជាមានការខូចខាត វាអាចនាំឲ្យកកជាតិខ្លាញ់រហូតទៅជាកំណក ដែលយូរៗទៅនឹងទៅជាស្ទះដល់សរសៃឈាមមួយនេះបាន។
បេះដូង
បេះដូងគឺជាសាច់ដុំ ហើយក៏ត្រូវការឈាមទៅចិញ្ចឹមដែរ។ នៅពេលការផ្គត់ផ្គង់ឈាមមិនមានគ្រប់គ្រាន់ អ្នកអាចនឹងមានបញ្ហាដូចជា៖
• បេះដូងលោតខុសប្រក្រតី
• ឈឺទ្រូង
• គាំងបេះដូង
ដើម្បីរុញឈាមត្លងសរសៃឈាមដែលមានកំណក ឬគាំង បេះដូងត្រូវការធ្វើការខ្លាំងជាងមុន។ ហើយការដែលធ្វើការបែបនេះកាន់តែច្រើន វានឹងធ្វើឲ្យសាច់ដុំកាន់តែខ្សោយ រហូតដល់មិនអាចច្របាច់ឈាមបានគ្រប់គ្រាន់ ទៅជាខ្សោយបេះដូង ឬគាំងបេះដូងបានថែមទៀត។
ខួរក្បាល
ការលើសសម្ពាថឈាមគឺជាដើមហេតុនៃជំងឺដាច់សរសៃឈាមខួរក្បាល។ នៅពេលសរសៃឈាមអាក់ទែក្នុងខួរក្បាលរហែក ឬលេចឈាម ឬស្ទះ វាអាចបញ្ឈប់លំហូរឈាមទៅខួរក្បាលបាន។ ដោយអាស្រ័យទោតាមការបាត់បង់ឈាមចិញ្ចឹមខួរក្បាល អ្នកអាចមានបញ្ហាច្រើនជាមួយនឹងការនិយាយ មើលឃើញ ធ្វើចលនា ឬអ្វីផ្សេងៗទៀតដែលខួរក្បាលគ្រប់គ្រង។ វាអាចជារឿងបណ្តោះអាសន្នបើសិនជាលំហូរឈាមស្រួលបួលវិញ ឬអាចកើតឡើងរហូតបើសិនជាកោសិកាបានស្លាប់អស់។
តម្រងនោម
ប្រហែលម្នាក់ក្នុងចំណោម ៥នាក់ដែលលើសសម្ពាធឈាមក៏មានជំងឺតម្រងនោមដែរ។ តម្រងនោមគឺផ្អែកទៅលើរចនាសម្ព័ន្ធសរសៃឈាមតូចៗដើម្បីផ្គង់ផ្គង់អុកស៊ីសែណ និងជីវជាតិ ព្រមទាំងច្រោះជាតិពុលចេញពីរាងកាយ។ នៅពេលសរសៃឈាមរងការស្ទះ តម្រងនោមពិតជាមិនអាចធ្វើការរបស់វាបានល្អឡើយ។ តម្រងនោមមានសុខភាពល្អគឺថែរក្សាសម្ពាធឈាមឲ្យនៅល្អដែរ ដូច្នេះនៅពេលវាខូច សម្ពាធឈាមអាចនឹងឡើងខ្ពស់ ដែលគ្រប់គ្រាន់នឹងបង្កបញ្ហាកាន់តែច្រើនថែមទៀត ឬទៅជាខ្សោយតម្រងនោមបាន។
ភ្នែក
ការដែលលើសសម្ពាធឈាមរយៈពេលយូរអាចកាត់ផ្តាច់លំហូរឈាមនៅបាត់ភ្នែក ដែលរឿងនេះនឹងធ្វើឲ្យភ្នែកព្រឹល ឬមើលមិនឃើញបាន។ អ្នកក៏អាចមើលលែងឃើញដែរនៅពេលសរសៃប្រសាទនៅភ្នែកមិនទទួលបានឈាមគ្រប់គ្រាន់។
ប្រដាប់ភេទ
ការដែលឈាមទៅចិញ្ចឹមសរសីរាង្គប្រដាប់ភេទកាន់តែតិចអាចធ្វើឲ្យលិង្គមិនអាចឡើងរឹងបាន និងធ្វើឲ្យស្ត្រីថយចុះចំណង់ផ្លូវភេទដែរ។
ជើង សន្លាក់ត្រគាក និងក្រពះ
ការស្ទះ និងរួមតូចសរសៃឈាមនៅផ្នែកខាងក្រោមនៃរាងកាយ ជាពិសេសជើង អាចធ្វើឲ្យមានការឈឺចាប់ និងឈឺចាប់បែបរមួលបាន។ ដោយសារតែវានឹងប៉ះពាល់ដល់សរសៃឈាមដែលមិននៅជិតបេះដូង គ្រូពេទ្យអាចហៅវាថា ជាជំងឺសរសៃឈាមចុងដៃចុងជើង។ វាអាចធ្វើឲ្យសាច់ដុំនៅជើង និងសន្លាក់ត្រគាកឈឺ និងអស់កម្លាំងនៅពេលអ្នកដើរ ឬឡើងជណ្តើរ។
ឆ្អឹង
ការលើសសម្ពាធឈាមប្រហែលជាធ្វើឲ្យអ្នកនោមមកមានជាតិកាលស្យូមតាមច្រើន។ បើសិនជារាងកាយទាញជាតិកាលស្យូមចេញពីឆ្អឹងច្រើន នោះអ្នកអាចមានជំងឺពុកឆ្អឹងហើយ។ សម្រាប់ស្ត្រីវ័យចំណាស់ ហើយលើសសម្ពាធឈាមទៀតទំនងជាងាយមានបញ្ហាខ្សោយឆ្អឹង រហូតដល់ងាយបាក់ឆ្អឹងទៀតផង។
គេងបាត់ដង្ហើម
ប្រហែលជាពាក់កណ្តាលនៃអ្នកលើសសម្ពាធឈាមក៏មានបញ្ហានេះដែរ។ ការលើសសម្ពាធឈាមអាចធ្វើឲ្យរឿងនេះកើតឡើង ឬធ្វើឲ្យអាការៈនេះកាន់តែធ្ងន់ធ្ងរថែមទៀត។ ឱកាសកើតបញ្ហានេះនឹងកាន់តែខ្ពស់បើសិនជាអ្នកពិបាកក្នុងការគ្រប់គ្រងសម្ពាធឈាម។ ជាអកុសល្យ ការគេងដែលមិនគ្រប់គ្រាន់ដែលកើតចេញពីការគេងបាត់ដង្ហើម អាចធ្វើឲ្យសម្ពាធឈាមឡើងខ្ពស់ដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com