អន្តរជាតិ
ចិនមិនចង់បានសង្គ្រាមពាណិជ្ជកម្មជាមួយអាមេរិកឡើយ ប៉ុន្តែមិនទុកឲ្យអាមេរិកបំផ្លាញប្រយោជន៍ខ្លួនឡើយ People's Daily
× មហាយក្សចិនបានប្រកាសហើយថា ខ្លួនមិនចង់បានសង្គ្រាមពាណិជ្ជកម្មជាមួយអាមេរិកឡើយ ប៉ុន្តែក្នុងកាលៈទេសៈចាំបាច់ ខ្លួនមិននៅស្ងៀមទុកឲ្យអាមេរិកបំផ្លាញផលប្រយោជន៍របស់ខ្លួនឡើយ។ នេះជាការបញ្ជាក់របស់មន្ត្រីការទូតចិនជាន់ខ្ពស់ និងជាអ្នកនាំពាក្យនៃកិច្ចប្រជុំសភាប្រជាជនចិនលើកទី ១៣ លោក Zhang Yesuie។
ការប្រកាសរបស់មន្ត្រីជាន់ខ្ពស់ចិនរូបនេះធ្វើឡើងក្រោយពេលក្តីបារម្ភរបស់សហគមន៍អន្តរជាតិកើនឡើងដោយសារប្រធានាធិបតីអាមេរិកលោក ដូណាល់ ត្រាំ ប្រកាសពីគម្រោងដំឡើងពន្ធលើដែកថែប និងផលិតផលអាលុយមីញ៉ូម។
លោក Zhang Yesuie បានអះអាងថា ចំណងពាណិជ្ជកម្មរវាងចិន និងអាមេរិក ផ្តល់ប្រយោជន៍សំខាន់ឲ្យគ្នាទៅវិញទៅមក ដោយកាលពីឆ្នាំមុនទំហំពាណិជ្ជកម្មទ្វេភាគីនេះកើតឡើងរហូតដល់ ៥៨០ ពាន់លានដុល្លារឯណោះ។ លោកសង្កត់ធ្ងន់ថា វានឹងមានបញ្ហាប្រឈមធំក្នុងទំនាក់ទំនងនេះបើសិនជាមានការដាក់ចេញវិធានការដូចដែលអាមេរិកប្រកាសនោះ។
ជម្រើសល្អបំផុតដើម្បីដោះស្រាយបញ្ហាដែលកើតឡើងក្នុងទំនាក់ទំនងពាណិជ្ជកម្មរវាងចិន និងអាមេរិក គឺធ្វើយ៉ាងណាបើកទីផ្សារបន្ថែមទៀត និងពង្រីកកិច្ចសហប្រតិបត្តិការ និងធ្វើការរួមគ្នា ជាពិសេសជជែក ពិភាក្សា និងប្រឹក្សាយោបល់គ្នាដើម្បីរកដំណោះស្រាយដែលអាចទទួលយកបានទាំងសងខាងផងដែរ។
មន្ត្រីទូតជាន់ខ្ពស់របស់ចិនខាងលើបន្ថែមថា ថ្វីបើវាមានការខុសប្លែកគ្នានៃប្រព័ន្ធគ្រប់គ្រងសង្គម ប្រវត្តិសាស្ត្រ វប្បធម៌ និងជំហាននៃការអភិវឌ្ឍក្តី វាជារឿងធម្មតាសម្រាប់ចិន និងសហរដ្ឋអាមេរិកដែលត្រូវមានគំនិតឬការយល់ឃើញខុសគ្នាលើបញ្ហាខ្លះ។ ប៉ុន្តែភាពខុសប្លែកគ្នានោះមិនដែលនាំឲ្យភាគីទាំងពីរប្រឈមមុខដាក់គ្នាឡើយ។
«ប្រសិនបើគោលនយោបាយដែលត្រូវបង្កើតឡើងដោយពឹងផ្អែកការវិនិច្ឆ័យខុស ឬការសន្និដ្ឋានខុស វានឹងធ្វើឲ្យប៉ះពាល់ដែលកិច្ចសហប្រតិបត្តិការយើងទាំងពីរ និងនាំមកនូវលទ្ធផលអាក្រក់ដែលយើងមិនចង់ឃើញ»។ លោក Zhang Yesuie បញ្ជាក់ដូច្នេះ។
ដោយឡែក អនុរដ្ឋមន្ត្រីការបរទេសចិនលោក Li Baodong បានបង្ហាញការយល់ឃើញថា ចិនមិនចង់បានសង្គ្រាមពាណិជ្ជកម្មជាមួយអាមេរិកឡើយ ព្រោះគ្មានអ្នកណាម្នាក់ជាអ្នកឈ្នះក្នុងសង្គ្រាមបែបនេះទេ។ ចិន និងអាមេរិកព្យាយាមប្រឹក្សាយោបល់រួមគ្នាលើនបញ្ហានេះ ហើយចិនយល់ឃើញថា ភាគីទាំងពីអាចនឹងគោរពច្បាប់ និងបទបញ្ញត្តិអន្តរជាតិជាពិសេសអង្គការពាណិជ្ជកម្មពិភពលោលនោះ៕
© រក្សាសិទ្ធិដោយ thmeythmey.com