ជាតិ
សង្គមជាតិ
របៀបដាក់ «ទង់ជាតិ ទង់សាសនា ទង់ព្រះមហាក្សក្រ និងព្រះឆាយាល័ក្ខណ៍»
× រដ្ឋាភិបាលកម្ពុជាបានចេញសេចក្តីណែនាំទៅក្រសួងដែលពាក់ព័ន្ធទាំងអស់ រាល់សាលប្រជុំទាំងអស់ ត្រូវដាក់ទង់ជាតិ ទង់សាសនា ទង់ព្រះមហាក្សត្រ ព្រមទាំងព្រះឆាយាល័ក្ខណ៍ទាំងបីព្រះអង្គនៃព្រះរាជាណាចក្រកម្ពុជាឲ្យបានខ្ជាប់ខ្ជួន។ ការណែនាំដូច្នេះ បន្ទាប់ពីរដ្ឋាភិបាលកម្ពុជាបានឃើញថា ស្ថាប័នដែលពាក់ព័ន្ធពុំបានអនុវត្តឲ្យបានត្រឹមត្រូវនៅឡើយទេ។
បើតាមសេចក្តីប្រកាសរបស់ព្រះរាជរដ្ឋាភិបាលកម្ពុជា បានបញ្ជាក់ថា រយៈពេលកន្លងមក រដ្ឋាភិបាលតែងតែសង្កេតឃើញមានស្ថាប័ន គ្រឹះស្ថានសាធារណៈ និងថា្នក់ក្រោមជាតិ មិនទាន់បានប្រើទង់ជាតិ ទង់សាសនា ទង់ព្រះមហាក្សត្រ និងព្រះឆាយាល័ក្ខណ៍ទាំងបីព្រះអង្គ ឱ្យបានសមស្របនៅឡើយទេ នៅក្នុងសាលប្រជុំនានារបស់ស្ថាប័នពាក់ព័ន្ធ។
ជាមួយគ្នាផងដែរ រដ្ឋាភិបាលកម្ពុជាក៏បានណែនាំ ឱ្យដាក់ទង់ជាតិ ទង់សាសនា និងទង់ព្រះមហាក្សត្រ ឲ្យនៅទន្ទឹមគ្នា មានគម្លាតពីគ្នា ៥សង់ទីម៉ែត្រ គម្លាតពីពិតាន ១៥សង់ទីម៉ែត្រ និងដាក់នៅលើព្រះឆាយាលក្ខ័ណ៍ព្រះមហាក្សត្រទាំងបីអង្គ គម្លាតពីគ្នា១៥សង់ទីម៉ែត្រ។ ទង់ជាតិដាក់នៅកណ្តាល ទង់សាសនាដាក់នៅឆ្វេង ចំណែកទង់ព្រះមហាក្សត្រដាក់នៅខាងស្តាំ។
រដ្ឋាភិបាលកម្ពុជាអំពាវនាវ ដល់គ្រប់ភាគីដែលពាក់ព័ន្ធទាំងអស់ឲ្យ យកចិត្តទុកដាក់ខ្ពស់លើការអនុវត្តឲ្យមានប្រសិទ្ធភាព និងដោយស្មារតីទទួលខុសត្រូវខ្ពស់ផងដែរ៕
Tag:
ទង់ជាតិ
ព្រះមហាក្សត្រ
© រក្សាសិទ្ធិដោយ thmeythmey.com