ជាតិ
ក្រុមជនហិង្សាលើអ្នកបើកបរដែលបង្កគ្រោះថ្នាក់ចរាចរណ៍ ស្ថិតនៅក្រោមការចាប់ខ្លួន
× ភ្នំពេញ៖ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ជួន សុវណ្ណ បានបញ្ជារឲ្យសមត្ថកិច្ច ស្រាវជ្រាវចាប់ខ្លួនជនសង្ស័យ ដែលពាក់ព័ន្ធនឹងករណីបង្កហិង្សា វាយទៅលើបុរសម្នាក់ ដែលជាម្ចាស់រថយន្តបង្កគ្រោះថ្នាក់ចរាចរណ៍ កាលពីថ្ងៃទី១១ មីនា។
ក្នុងហេតុការណ៍គ្រោះថ្នាក់ចរាចរណ៍មួយកាលពីម្សិលមិញ បុរសម្នាក់ដែលបានពលរដ្ឋអះអាងថា បានបើករថយន្តបុកប្រជាពលរដ្ឋលើដងផ្លូវ ចាប់ពីម្តុំទួលសង្កែ ខណ្ឌប្ញស្សីកែវ រហូតដល់ម្តុំមន្ទីរពេទ្យលោកសង្ឃនោះ ត្រូវបានប្រជាពលរដ្ឋជាច្រើននាក់ បានចោមរោមវាយបែកក្បាល បែកមុខមាត់ និងទ្រោមខ្លួន រហូតបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។ ចំណែករថយន្ត ត្រូវបានពលរដ្ឋវាយកម្ទេចខូចខាតទាំងស្រុង មុនពេលមន្ត្រីប៉ូលិសចុះអន្តរាគមន៍ នៅកន្លែងកើតហេតុ។ នេះបើតាមរូបភាពវីដេអូ ដែលបានបង្ហោះចែកចាយលើបណ្ដាញហ្វេសប៊ុក។
ដោយសារសកម្មភាពប្រើហិង្សាឃោរឃៅទាំងនេះ ទើបស្នងការនគរបាលរាជធានីភ្នំពេញ លោក ជួន សុវណ្ណ បានបញ្ជារឲ្យសមត្ថកិច្ចតាមចាប់ខ្លួន ជនបង្កហិង្សាទាំងនោះ មកដាក់ទោសតាមផ្លូវច្បាប់។ ត្រង់ចំណុចនេះលោក ជួន សុវណ្ណ បានពន្យល់ថា អ្នកបើកបរបង្កគ្រោះថ្នាក់ចរាចរណ៍ ដែលរត់គេចពីកន្លែងកើតហេតុ គឺពិតណាស់ច្បាប់ជាអ្នកអនុវត្តន៍។ ប៉ុន្តែអ្នកដែលវាយអ្នកបើកបរ ក៏ត្រូវតែទទួលទោសផងដែរ ព្រោះវាជាអំពើអសីលធម៌ក្នុងសង្គម។
បើតាមសារព័ត៌មានFresh News ដែលបានស្រង់សម្ដីលោក ជួន សុវណ្ណ យ៉ាងដូច្នេះ៖ «ក្នុងករណីនេះ យើងពិនិត្យឃើញថា ជាបទល្មើសជាក់ស្តែង ព្រោះវាជាបទល្មើសហិង្សាដោយចេតនា មានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ ក៏មានស្ថានទម្ងន់ទោសផងដែរ ព្រោះបានបំផ្លាញទ្រព្យសម្បត្តិអ្នកដទៃជាក្រុម (ក្រុមវាយអ្នកបើកបរ)។ ក្នុងករណីនេះដែរ ជនល្មើសដែលបានបង្កគ្រោះថ្នាក់ចរាចរណ៍ ទោះជាបានរត់គេចពីកន្លែងកើតហេតុ ក៏អាស្រ័យដោយសារមានការភ័យខ្លាចអំពីក្រុមជនបង្កដែរ។ ប្រសិនបើជាគាត់បង្កឲ្យមានគ្រោះថ្នាក់ចរាចរណ៍ ក៏ច្បាប់ចរាចរណ៍ផ្លូវគោកមាន អីចឹងស្ថានទម្ងន់ទោសរបស់អ្នកបើកបរបង្កគ្រោះថ្នាក់ដល់អ្នកដទៃ ហើយគេចវេសពីការទទួលខុសត្រូវ ច្បាប់មានសម្រាប់ដាក់ទោសទណ្ឌ…។
បុរសដែលបើកបររថយន្តបង្កគ្រោះថ្នាក់ចរាចរណ៍ ហើយត្រូវបានពលរដ្ឋចោមរោមវាយនោះ ត្រូវបានគេស្គាល់ថា ឈ្មោះ ស៊ុយ សារ៉េត គឺជាសាស្ត្រាចារ្យបង្រៀននៅសាកលវិទ្យាល័យកម្ពុជា។ ហើយបើតាមប្រភពព័ត៌មានផ្សេងៗ បានលើកឡើងថា លោក ស៊ុយ សារ៉េត ត្រូវបានក្រុមគ្រួសារបញ្ជូនទៅព្យាបាលបន្ត នៅមន្ទីរពេទ្យវៀតណាម ដោយសារអាការជំងឺធ្ងន់ធ្ងរ៕
Tag:
ជួន សុវណ្ណ
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com