ជាតិ
កម្ពុជា-EU ព្រមព្រៀងពង្រឹងពាណិជ្ជកម្មទ្វេភាគីបន្ថែមទៀត រូបថត ពីហ្វេសប៊ុកលោកHuy Vannak៖ ជំនួបក្នុងកិច្ចប្រជុំគណៈកម្មការសហភាពអឺរ៉ុប និងកម្ពុជា នៅទីក្រុងព្រុចសែល កាលពីថ្ងៃទី១២-១៣ មីនា
× ភ្នំពេញ៖ កម្ពុជា-សហភាពអឺរ៉ុប (EU) ព្រមព្រៀងពង្រឹងពាណិជ្ជកម្មទ្វេភាគីបន្ថែមទៀត ដើម្បីគាំទ្រដល់ពិពិធកម្មសេដ្ឋកិច្ចកម្ពុជា។ កិច្ចព្រមព្រៀងគ្នានេះ ធ្វើឡើងនៅក្នុងកិច្ចប្រជុំគណៈកម្មការសហភាពអឺរ៉ុប និងកម្ពុជា កាលពីថ្ងៃទី១២-១៣ មីនា។
ក្នុងកិច្ចប្រជុំទ្វេភាគីនោះ កម្ពុជានិងសហភាពអឺរ៉ុប បានពិភាក្សាគ្នាលើបញ្ហាពាណិជ្ជកម្មទ្វេភាគី និងបរិយាកាសវិនិយោគរបស់សហភាពអឺរ៉ុប ក្នុងប្រទេសកម្ពុជា។ តាមរយៈកិច្ចប្រជុំនេះភាគីទាំងពីរ បានដោះស្រាយបញ្ហាមួយចំនួន ដែលទាក់ទងនឹងការយោគយល់លើការអនុគ្រោះពន្ធ (Everything But Arm) នៃពាណិជ្ជកម្មទ្វេភាគី។ ជាពិសេសការជំរុញឲ្យវិស័យសេដ្ឋកិច្ចដ៏ធំរបស់កម្ពុជាកាន់តែរីកចម្រើន អស់រយៈពេលជាច្រើនឆ្នាំចុងក្រោយនេះ។ កម្ពុជានិងសហភាពអឺរ៉ុប ក៏បានពិភាក្សាគ្នាលើដំណើរការបើកក្រុមហ៊ុនសហភាពអឺរ៉ុបនៅក្នុងប្រទេសកម្ពុជា និងការពិនិត្យមើលការវិវត្តពាណិជ្ជកម្មក្នុងតំបន់ និងពហុភាគីផងដែរ។
តាមរយៈសេចក្តីថ្លែងការណ៍រួម កម្ពុជានិងសហភាពអឺរ៉ុប កាលពីថ្ងៃទី១៤ មីនា បានប្រកាសដូច្នេះថា៖«ភាគីទាំងពីរព្រមព្រៀងគ្នាលើចំណុចសំខាន់នៃការបើកច្រកទីផ្សារ និងគម្រោងវិនិយោគដោយសេរីនៅកម្ពុជា ដើម្បីជំរុញឲ្យមានការវិនិយោគបន្ថែមពីសហភាពអឺរ៉ុប ចូលមកកម្ពុជា ដើម្បីគាំទ្រសង្វាក់តម្លៃក្នុងតំបន់ និងការធ្វើពិពិធកម្មសេដ្ឋកិច្ចនៅកម្ពុជា»។
ទំហំពាណិជ្ជកម្មរវាងកម្ពុជានិងសហភាពអឺរ៉ុប មានជាង៥ពាន់លានដុល្លារ កាលពីឆ្នាំ២០១៧។ នេះបើតាមសេចក្តីថ្លែងការណ៍រវាងភាគីទាំងពីរ។ កន្លងមកក្រសួងពាណិជ្ជកម្ម ធ្លាប់បង្ហាញទិន្នន័យថា កម្ពុជាទទួលផលចំណេញជាង៦០០លានដុល្លារអាមេរិក ពីការអនុគ្រោះពន្ធនេះ (បើត្រូវបង់ពន្ធវិញ កម្ពុជាត្រូវចំណាយ ៦៧៦ លានដុល្លារ ) សម្រាប់ការនាំចូលទំនិញទៅទីផ្សារសហភាពអឺរ៉ុប ។
ទោះជាមានការព្រមព្រៀងលើការពង្រឹងពាណិជ្ជកម្មនេះក្តី ក៏សហភាពអឺរ៉ុប មិនភ្លេចរំឭកពីបញ្ហាសិទ្ធិមនុស្ស និងនយោបាយនៅកម្ពុជាឡើយ។ សហភាពអឺរ៉ុប បានស្នើជាថ្មីឲ្យរដ្ឋាភិបាលកម្ពុជា គោរពសិទ្ធិមនុស្ស និងគោលការណ៍សេរីភាព ក្នុងនោះរួមមាន សិទ្ធិនិយោជិត ដើម្បីអាចមានសិទ្ធិទទួលបានការអនុគ្រោះពន្ធពីសហភាពអឺរ៉ុប សម្រាប់ផ្ដល់ឲ្យប្រទេសកំពុងអភិវឌ្ឍន៍។ បញ្ហាដែលសហភាពអឺរ៉ុបព្រួយបារម្ភនោះទាក់ទងនិងដីសម្បទានសេដ្ឋកិច្ច ចំការស្ករអំពៅ និងបញ្ហាកម្មករដទៃទៀត ដែលកម្ពុជាត្រូវដោះស្រាយលើបញ្ហាទាំងនេះជាបន្ទាន់។
ប្រតិភូអន្តរក្រសួងកម្ពុជា។ រូបថត Huy Vannak
ក្រៅពីបញ្ហាសិទ្ធិកម្មករនេះ សហភាពអឺរ៉ុប ក៏អំពាវនាវច្រំដែលទៀត ឲ្យរដ្ឋាភិបាលកម្ពុជាចាប់ផ្ដើមគិតពីប្រយោជន៍រួម ក្នុងការសន្ទនាជាមួយគណបក្សសង្គ្រោះជាតិ ដែលជាវិធានការចាំបាច់ ក្នុងការធានាពីបរិយាកាសនយោបាយ ជាមួយគណបក្សប្រឆាំង , សង្គមស៊ីវិល និងប្រព័ន្ធផ្សព្វផ្សាយ ឲ្យមានសេរីភាពឡើងវិញ ក្នុងការប្រតិបត្តិការនៅកម្ពិជា។ នេះបើតាមសេចក្តីថ្លែងការណ៍រួមកម្ពុជា និងសហភាពអឺរ៉ុប។
ជាការឆ្លើយតប កម្ពុជា បានបញ្ជាក់ថា បញ្ហានយោបាយនៅកម្ពុជា ដែលអាជ្ញាធរចាត់វិធានការ និងការសម្រេចរបស់ប្រព័ន្ធយុត្តិធម៌ គឺវាជាការអនុវត្តតាមផ្លូវច្បាប់ ដើម្បីការពារអធិបតេយ្យភាព និងការពារសន្តិភាព ស្ថិរភាព ដែលជាផលប្រយោជន៍សង្គម ក្នុងដំណើរការអភិវឌ្ឍកម្ពុជា។ កម្ពុជាបានប្រកាសជាថ្មីថា កម្ពុជា គោរពគោលការណ៍សេរីភាព និងសិទ្ធិមនុស្ស ដែលបានកំណត់នៅក្នុងច្បាប់ និងរដ្ឋធម្មនុញ្ញ ជាពិសេសការរៀបចំដំណើការបោះឆ្នោត ឲ្យប្រព្រឹត្តិទៅដោយរលូន ប្រកបដោយសេរី ត្រឹមត្រូវ និងយុត្តិធម៌ នៅក្នុងការបោះឆ្នោតជ្រើសរើសតំណាងរាស្ត្រ នៅថ្ងៃទី២៩ កក្កដាខាងមុខនេះ៕
Tag:
កម្ពុជា
សហភាពអឺរ៉ុប
ពាណិជ្ជកម្ម
© រក្សាសិទ្ធិដោយ thmeythmey.com