ជាតិ
សម្ដេច ហ៊ុន សែន ដំណាលរឿងលោក សម រង្ស៊ី ប្រាប់ពលរដ្ឋខ្មែរ នៅអូស្ត្រាលី
× ភ្នំពេញ៖ ក្នុងឱកាសជួបសំណេះសំណាលជាមួយប្រជាពលរដ្ឋខ្មែរនៅអូស្ត្រាលី សម្ដេចនាយករដ្ឋមន្ត្រី ហ៊ុន សែន បានរៀបរាប់ពីចំណុចវិជ្ជមានរបស់រដ្ឋាភិបាលជាច្រើន ក្នុងការខិតខំប្រឹងប្រែងដឹកនាំប្រទេសឲ្យមានភាពរីកចម្រើនស្មើមុខ ស្មើមាត់ជាមួយបណ្ដាប្រទេសនានា នៅលើឆាកអន្តរជាតិ ចាប់តាំងពីកម្ពុជារួចផុតពីសម័យសង្គ្រាមមក។
នាយករដ្ឋមន្ត្រី ហ៊ុន សែន ក៏មិនភ្លេចលើកពីជំហរដ្ឋាភិបាល ដែលប្ដេជ្ញាការពារសន្តិភាព ស្ថេរភាព បូរណភាពទឹកដី និងការអភិវឌ្ឍប្រទេស ដោយមិនអនុញ្ញាតឲ្យប្រទេសណាលូកដៃចូលកិច្ចការផ្ទៃក្នុងកម្ពុជា និងចង់បំផ្លាញកម្ពុជាបានដោយងាយៗឡើយ ដរាបណាមានវត្តមានសម្ដេច។
អមជាមួយការលើកឡើងពីការលះបង់កម្លាំងកាយចិត្តខ្លួន អស់រយៈពេលជាង៣ទស្សវត្ស ដើម្បីស្ដារកិត្តិយស និងរៀបចំប្រទេសឡើងវិញនេះ ប្រមុខរដ្ឋាភិបាល ក៏មិនភ្លេចដំណាលរឿងលោក សម រង្ស៊ី អតីតប្រធានគណបក្សសង្គ្រោះជាតិ ប្រាប់ប្រជាពលរដ្ឋខ្មែរនៅអូស្ត្រាលីផងដែរ។ ប៉ុន្តែរឿងលោក សម រង្ស៊ី គ្មានឡើយ នូវចំណុចវិជ្ជមាន។
តាមរយៈវោហារកោសលរបស់សម្ដេច ហ៊ុន សែន បានលើកឡើងពីចំណុចអវិជ្ជមានរបស់លោក សម រង្ស៊ី ដែលតែងតែដើរធ្វើនយោបាយ បែបឃោសនាឲ្យមានការប្រកាន់ពូជសាសន៍ , ប្រាប់បរទេសឲ្យមើលមកកម្ពុជាក្នុងផ្លូវអាក្រក់ និងដាក់សម្ពាធមកលើរដ្ឋាភិបាល ។ មិនត្រឹមប៉ុណ្ណេះ សម្ដេច ហ៊ុន សែន ថែមទាំងបញ្ចេញសំឡេងរបស់លោក សម រង្ស៊ី ដែលបាននិយាយគ្នាក្នុងជំនួបជាមួយលោក កុក ស មេដឹកនាំជនជាតិភាគតិច Degar (ម៉ុងតាញ៉ា) របស់វៀតណាម ដែលបានបង្ហោះលើហ្វេសប៊ុកកន្លងមក ក្នុងករណីចុះហត្ថលេខាសន្យាកាត់ដីខេត្ត៤ ឲ្យជនជាតិភាគតិចរបស់វៀតណាមរស់នៅ ក្នុងវេទិការជួបប្រជាពលរដ្ឋខ្មែរនៅអូស្ត្រាលីផងដែរ។
ក្នុងកែវភ្នែកសម្ដេច ហ៊ុន សែន គ្មានឡើយចំណុចវិជ្ជមានរបស់លោក សម រង្ស៊ី ដែលត្រូវលើកប្រាប់ប្រជាពលរដ្ឋខ្មែរនៅអូស្ត្រាលីនេះ។ ត្រង់ចំណុចនេះ នាយករដ្ឋមន្ត្រីកម្ពុជា បាននិយាយចំពោះមុខប្រជាពលរដ្ឋខ្មែរ៨០០នាក់នៅអូស្ត្រាលីថា «សម្ដេច គឺជាអ្នកបម្រើជាតិដ៏ស្មោះត្រង់» ។
គួរបញ្ជាក់ថា សម្ដេច ហ៊ុន សែន រួមទាំងគណៈប្រតិភូជាន់ខ្ពស់ បានចាកចេញពីប្រទេសកម្ពុជានៅល្ងាចថ្ងៃទី១៥ ខែមីនា ឆ្នាំ២0១៨ ទៅចូលរួមកិច្ចប្រជុំអាស៊ាន-អូស្ត្រាលី។ កិច្ចប្រជុំនេះ ត្រូវចាប់ផ្តើមពីថ្ងៃទី១៦ ដល់ថ្ងៃទី១៨ ខែមីនា ឆ្នាំ២0១៨៕
Tag:
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com