កីឡាជាតិ
ជាតិ
ព្រៃវែងជួបកោះកុងដណ្តើមជើងឯក U14 រីឯយុវជនបាទីប៉ះស្វាយរៀងដណ្តើមជើងឯក U16
× ក្រោយប្រកួតអស់រយៈពេលប្រមាណជិត៥ខែ ការប្រកួតបាល់ទាត់ជម្រើសជើងឯកយុវជនអាយុក្រោម១៤ឆ្នាំ និង១៦ឆ្នាំ និងពានរង្វាន់បាល់ទាត់នារីប្រចាំឆ្នាំ២០១៧ បានឈានដល់ការប្រកួតវគ្គផ្តាច់ព្រ័ត្ររៀងៗខ្លួននៅថ្ងៃទី១៧ ខែមីនា ឆ្នាំ២០១៨ នេះ។ ក្នុងនោះក្រុមព្រៃវែងប្រជែងគ្នាជាមួយកោះកុងដណ្តើមពានយុវជន U14 រីឯក្រុមសាលាបាល់ទាត់ជាតិបាទីតទល់ជាមួយក្រុមស្វាយរៀងដណ្តើមពានយុវជន U16។ ចំណែកក្រុមកំពង់ស្ពឺប្រជែងជាមួយក្រុមបាត់ដំបងដណ្តើមពានបាល់ទាត់នារី។
ក្រុមយុវជនអាយុក្រោម១៤ឆ្នាំរបស់ខេត្តព្រៃវែង ត្រូវប្រជែងគ្នាជាមួយក្រុមយុវជនរបស់ខេត្តកោះកុង ដើម្បីដណ្តើមជើងឯកពានរង្វាន់យុវជនអាយុក្រោម១៤ឆ្នាំ នាវេលាម៉ោង៩:៣០នាទីព្រឹកថ្ងៃទី១៧ ខែមីនា ឆ្នាំ២០១៨ នៅកីឡដ្ឋានវិទ្យាល័យ ប៊ុន រ៉ានី ហ៊ុនសែន មេម៉ត់ ខេត្តត្បូងឃ្មុំ។
មុនឡើងមកជួបគ្នានៅវគ្គផ្តាច់ព្រ័ត្រ ក្រុមទាំងពីរសុទ្ធតែបានយកឈ្នះគូប្រកួតរៀងៗខ្លួន នាការប្រកួតវគ្គពាក់កណ្តាលផ្តាច់ព្រ័ត្រ ដោយក្នុងនោះក្រុមព្រៃវែងបានយកឈ្នះក្រុមព្រះខ័នរាជស្វាយរៀង ៤-២ ខណៈកោះកុងបានយកឈ្នះកំពង់ស្ពឺ ១-០។ ក្រុមយុវជនខេត្តកំពង់ស្ពឺទទួលបានចំណាត់ថ្នាក់លេខ៣ ក្រោយយកឈ្នះក្រុមព្រះខ័នរាជស្វាយរៀងក្នុងលទ្ធផល ៣-១។
ជាមួយគ្នានេះ យុវជនសាលាបាល់ទាត់ជាតិបាទីដែលយកឈ្នះក្រុមកោះកុង ១៦-២ ត្រូវតទល់ជាមួយក្រុមស្វាយរៀងដែលយកឈ្នះក្រុមយុវជនក្រសួងការពារជាតិ ៦-២ ក្នុងវគ្គពាក់កណ្តាលផ្តាច់ព្រ័ត្រដូចគ្នា ដើម្បីដណ្តើមពានយុវជន U16។ ការប្រកួតនឹងព្រឹត្តទៅនាម៉ោង៣រសៀលនៅកីឡដ្ឋានវិទ្យាល័យ ប៊ុន រ៉ានី ហ៊ុនសែន មេម៉ត់។ ក្រុមកោះកុងទទួលបានចំណាត់ថ្នាក់លេខ៣ក្រោយយកឈ្នះក្រសួងការពារជាតិ ៦-៤ នាការប្រកួតដណ្តើមចំណាត់ថ្នាក់លេខ៣។
មុនការប្រកួតទាំងពីរខាងលើ នៅកីឡដ្ឋាននេះដែរ ក្រុមបាល់ទាត់នារីរបស់ខេត្តកំពង់ស្ពឺត្រូវប្រជែងជាមួយក្រុមបាត់ដំបង ដើម្បីដណ្តើមពានបាល់ទាត់នារីប្រចាំឆ្នាំ២០១៧ នាម៉ោង៧:៣០នាទីព្រឹកថ្ងៃទី១៧ មីនា ឆ្នាំ២០១៨៕
Tag:
បាល់ទាត់
ពានជម្រើសយុវជន U14
U16
បាល់ទាត់នារី
© រក្សាសិទ្ធិដោយ thmeythmey.com