ពីនេះ ពីនោះ
ហេតុអ្វីបានជាអារម្មណ៍ស្រង់រសជាតិរបស់ខ្ញុំប្រែប្រួលអ៊ីចឹង?
× បើសិនជាអ្នកស្រាប់តែលែងដឹងរសជាតិភ្លាមៗ វាគឺជារឿងដែលត្រូវយកចិត្តទុកដាក់ហើយ។ វាអាចជាហេតុផលមួយដែលកើតឡើងញឹកញាប់។ វាប្រហែលជាមានអ្វីមួយខុសប្រក្រតីដែលអ្នកត្រូវការគ្រូពេទ្យព្យាបាល។
នៅពេលញ៉ាំអាហារ មានអារម្មណ៍ញាណពីរប្រភេទដែលត្រូវធ្វើការជាមួយគ្នា។ ពន្លកស្រង់រសជាតិអាចទទួលដឹងរសជាតិបួនប្រភេទគឺ៖ ផ្អែម ប្រៃ ជូរ និងល្វីង។ ក្នុងពេលជាមួយគ្នានេះដែរ អារម្មណ៍ស្រង់ក្លិននឹងធ្វើឲ្យអ្នកពេញចិត្តអាហារនោះឬអត់ដែរ។ នៅពេលមានអ្វីមួយខុសប្រក្រតីកើតឡើងលើរឿងទាំងនេះ អារម្មណ៍នៃការស្រង់រសជាតិអាចប្រែប្រួលបានទាំងអស់។
ទោះបីជាយ៉ាងណាក៏ដោយ មានរឿងសំខាន់ៗ ដែលនាំឲ្យមនុស្សយើងមានការប្រែប្រួលការស្រង់រសជាតិដូចជា៖
អាយុ
នៅពេលអ្នកអាយុកាន់តែច្រើន វាអាចនឹងកាន់តែពិបាកស្វែងរករបស់អ្វីដែលជាការពេញចិត្តរបស់អ្នក។ ស្ត្រីខ្លះអាចចាប់ផ្តើមបាត់បង់ពន្លកស្រង់រសជាតិនៅអាយុខ្ទង់ ៤០ឆ្នាំ ខណៈពេលដែលបុរសអាចកើតឡើងនៅអាយុខ្ទង់ ៥០ឆ្នាំ។
ជាមួយគ្នានេះដែរ ពន្លកស្រង់រសជាតិអ្នកអាចរួញស្វិត និងលែងសូវមានអារម្មណ៍។ រសជាតិប្រៃ និងផ្ងែមងាយនឹងចុះខ្សោយមុនគេណាស់។ ក្រោយមកទៀត វាប្រហែលជាកាន់តែពិបាកក្នុងការទទួលរសជាតិល្វីង ឬជូ។
ចំណែកឯអារម្មណ៍ស្រង់ក្លិនវិញអាចថយចុះដែរ ហើយខ្លាំងបំផុតនោះនៅចន្លោះអាយុ ៣០ ទៅ៦០ឆ្នាំ។ អ្នកមិនអាចធ្វើឲ្យអារម្មណ៍នៃការស្រង់រសជាតិនេះត្រឡប់មកវិញបានឡើយ ប៉ុន្តែចូរកុំយល់ថា អាយុសុទ្ធតែជាមូលហេតុធ្វើឲ្យរឿងនេះកើតឡើងអី។
ការប្រើថ្នាំ
ថ្នាំតាមវេជ្ជបញ្ជាអាចប៉ះពាល់ដល់របៀបនៃការស្រង់រសជាតិរបស់អ្នកបាន ឬអាចធ្វើឲ្យមានភាពខុសគ្នាទៅក្នុងទឹកមាត់បាន។ ញាណនៃការស្រង់ក្លិន និងរសជាតិប្រហែលជាខុសប្រក្រតីបើសិនជាអ្នកប្រើថ្នាំដូចខាងក្រោមនេះ៖
• ថ្នាំបញ្ចុះសម្ពាធឈាម ACE Inhibitors, Beta Blocker
• ថ្នាំប្រឆាំងការបាក់ទឹកចិត្ត ថ្នាំប្រឆាំងអាឡែហ្ស៊ី ឬថ្នាំផ្សេងៗទៀត
ជំងឺ
ញាណនៃការស្រង់រសជាតិអ្នកអាចរងការប៉ះពាល់បើសិនជាអ្នកមានបញ្ហាដូចខាងក្រោមនេះ៖
• មានការបង្ករោគនៅច្រមុះ បំពង់ករ ឬប្រហោងឆ្អឹងក្នុងមុខ
• របួសនៅក្បាល ដែលអាចប៉ះពាល់ដល់សរសៃប្រសាទដែលជាប់ទាក់ទងនឹងការស្រង់រសជាតិ និងក្លិន
• ដុំសាច់ ឬការលូតលាស់ដុំប៉ូលីពធ្វើឲ្យស្ទះដល់ផ្លូវដង្ហើមក្នុងច្រមុះ
• ការករខ្ទុះក្នុងមាត់ ឬបញ្ហានៅធ្មេញផ្សេងៗទៀត។
ការព្យាបាលជំងឺមហារីក
បើសិនជាអ្នកកំពុងតែព្យាបាលជំងឺមហារីក អារម្មណ៍នៃការដឹងរសជាតិប្រហែលជារងការប៉ះបាល់ដោយសារតែ៖
• ថ្នាំព្យាបាលជំងឺមហារីក
• ថ្នាំផ្សេងៗទៀត៖ ថ្នាំផ្សះ ថ្នាំ Morphine ឬថ្នាំប្រភេទអាភៀនផ្សេងៗទៀតដែលអាចផ្លាស់ប្តូរដល់ញាណនៃការស្រង់រសជាតិបាន
• ការបាញ់កាំរស្មី៖
នៅពេលអ្នកញ៉ាំអាហារ អ្នកប្រហែលជាសម្គាល់ដឹងថា៖
• រសជាតិអាហារមួយចំនួនមានលក្ខណៈខុសគ្នាជាងពីមុន
• អាហារខ្លះភ្លាវ
• ក្នុងមាត់មានរសជាតិដូចដែកៗ ជាពិសេសក្រោយពីញ៉ាំសាច់ ឬប្រូតេអ៊ីនផ្សេងៗរួចមក។
ការជក់បារី
បារីបង្កើតបានជាការបំពុលបរិយាកាស។ វានឹងធ្វើឲ្យអ្នកសម្គាល់ដឹងនូវក្លិនចម្លែក ហើយក៏លែងដឹងរសជាតិដែរ។ បើសិនជាអ្នកឈប់ជក់បារីវិញ អារម្មណ៍នៃការស្រង់ក្លិន និងរសជាតិនឹងល្អប្រសើរឡើងវិញហើយ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com