សហជីព ស្នើឲ្យរដ្ឋាភិបាលជួយពន្លឿនដំណោះស្រាយកម្មករ ខណៈពួកគេកំពុងប្រឈមបញ្ហាជីវភាព

ជាតិ

សហជីព ស្នើឲ្យរដ្ឋាភិបាលជួយពន្លឿនដំណោះស្រាយកម្មករ ខណៈពួកគេកំពុងប្រឈមបញ្ហាជីវភាព

19, Mar 2018 , 9:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ កម្មកររោងចក្រអ៊ីហ្វា ជាច្រើននាក់ បានជួបជុំគ្នានៅមុខរោងចក្រអស់រយៈពេលមួយខែហើយ ដើម្បីរង់ចាំដំណោះស្រាយរបស់រដ្ឋាភិបាល លើបញ្ហាថៅកែរោងចក្ររត់ចោល។ សហជីព និងកម្មករ អំពាវនាវឲ្យរដ្ឋាភិបាលជួយពន្លឿនដំណោះស្រាយកម្មករ ខណៈពួកគេត្រូវការប្រាក់បង់ថ្លៃផ្ទះជួល និងខ្វះខាតក្នុងជីវភាព។

គិតមកដល់ពេលនេះ មានរយៈពេលជាង១ខែហើយ ដែលកម្មកររោងចក្រអ៊ីហ្វា ហ្គាមែន កំពុងរង់ចាំដំណោះស្រាយពីក្រសួងការងារ និងបណ្ដុះបណ្ដាលវិជ្ជាជីវៈ។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បាននិយាយថា សហជីពលោកបានជួបជាមួយមន្ត្រីក្រសួងការងារនិងគណៈកម្មការការងារលើបញ្ហាកម្មកររោងចក្រនេះហើយ ប៉ុន្តែមិនទាន់ឃើញដំណោះស្រាយពីខាងរដ្ឋាភិបាលវិញនៅឡើយទេ។ បើតាមលោក ប៉ាវ ស៊ីណា ការយឺតយ៉ាវរបស់អាជ្ញាធរក្នុងការដោះស្រាយបញ្ហាកម្មករ នឹងធ្វើឲ្យពួកគេប្រឈមមុខបញ្ហាជីវភាព និងគ្មានប្រាក់បង់ថ្លៃជួលផ្ទះជាដើម។

ថ្លែងប្រាប់សារព័ត៌មានថ្មីៗ ប្រធានសម្ព័ន្ធសហជីពចលនាកម្មករ ដែលបានតាមដានបញ្ហានេះ បានបញ្ជាក់ដូច្នេះថា៖« យើងគ្រាន់តែឮថា រដ្ឋាភិបាលបានទម្លាក់ថវិកាជួយដោះស្រាយបញ្ហាកម្មករ មុននឹងត្រួតពិនិត្យផ្ទៀងផ្ទាត់លក់សម្ភារឡៃឡុងរោងចក្រវិញ ប៉ុន្តែមកដល់ពេលនេះ អត់ទាន់មានដំណោះស្រាយជូនកម្មករទេ។ ហើយយើងកំពុងរង់ចាំមើលដំណោះស្រាយពីគណៈកម្មការការងារលើការដោះស្រាយតាមច្បាប់។ ហើយជាធម្មតាបើអាជ្ញាធរយឺតយ៉ាវ ច្បាស់ណាស់កម្មករនិងគ្មានប្រាក់បង់ថ្លៃផ្ទះ ហើយប្រាកដជាម្ចាស់ផ្ទះជួលដេញចេញពីផ្ទះ«។

កម្មករដែលរងគ្រោះដោយសារថៅកែរោងចក្រអ៊ីហ្វារត់ចោលនេះ បានបង្ហាញក្តីព្រួយបារម្ភពីបញ្ហាជីវភាពរបស់ពួកគេ ដោយសារការយឺតយ៉ាវនៃការបញ្ចប់វិវាទនេះ។ កម្មករទាំងនោះ បានលើកឡើងពីផលលំបាកខ្លួនថា ពួកគេគ្មានប្រាក់សម្រាប់ចាយវាយប្រចាំថ្ងៃ ,គ្មានប្រាក់សងបំណុលធនាគារ ហើយខ្លះទៀតត្រូវម្ចាស់ផ្ទះបណ្តេញចេញពីបន្ទប់ជួលជាដើម។ ជាមួយគ្នានេះលោក ប៉ាវ ស៊ីណា ស្នើឲ្យអាជ្ញាធរជួយពន្លឿនដំណោះស្រាយជូនកម្មករទាំងនោះ ដើម្បីកុំឲ្យពួកគេជួបផលលំបាកដល់ជីវភាព ស្របតាមគោលនយោបាយរបស់ប្រមុខរដ្ឋាភិបាល។

ជុំវិញបញ្ហាខាងលើនេះ សារព័ត៌មានថ្មីៗ មិនទាន់អាចទាក់ទងលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំការអត្ថាធិប្បាយបន្ថែមពីដំណោះស្រាយកម្មករនេះឡើយ។

កន្លងមកប្រមុខរដ្ឋាភិបាល បានដាក់ចេញវិធានការដោះស្រាយបញ្ហាកម្មករ ដែលត្រូវបានថៅកែរោងចក្ររត់ចោល ឲ្យទាន់ពេលវេលា ដើម្បីកុំឲ្យជួបបញ្ហាជីវភាព។ កាលពីចុងខែកុម្ភៈ នាយករដ្ឋមន្ត្រី ហ៊ុន សែន បានប្រកាសឲ្យក្រសួងការងារយកថវិកាបុរេប្រទានជាង ៤លានដុល្លារអាមេរិក ដោះស្រាយសំណងជូនកម្មករជាង៤ពាន់នាក់នៅរោងចក្រចំនួន ៩ ដែលត្រូវថៅកែរោងចក្ររត់ចោល។

ក្រោយពីដោះស្រាយបញ្ហាប្រាក់ខែកម្មករហើយ ទ្រព្យសម្បត្តិរោងចក្រដែលនៅសេសសល់នោះ ក្រសួងការងារ អាចដោះស្រាយតាមនីតិវិធី ដោយការដាក់លក់ឡៃឡុងរោងចក្រជាដើម។ ក្រសួងការងារក៏ត្រូវទទួលខុសត្រូវរកការងារឲ្យកម្មករទាំងនោះផងដែរ។ នេះបើតាមដំណោះស្រាយរបស់សម្ដេច ហ៊ុន សែន៕