កីឡាជាតិ
ជាតិ
មិត្តភាពអន្តរជាតិ៖ កម្ពុជាប៉ះឡាវនៅក្នុងទីក្រុងវៀងចន្ទន៍នាវេលាម៉ោង៦ល្ងាចនេះ
× ក្រុមកីឡាបាល់ទាត់ជម្រើសជាតិកម្ពុជា ដែលដឹកនាំដោយលោក ប្រាក់ សុវណ្ណារ៉ា ត្រូវតទល់ជាមួយម្ចាស់ផ្ទះឡាវក្នុងជំនួបមិត្តភាពអន្តរជាតិ នាវេលាម៉ោង៦ល្ងាចថ្ងៃពុធ ទី២១ ខែមីនា នេះ នៅកីឡដ្ឋាន KM16 ក្នុងក្រុងវៀងចន្ទន៍។
កម្ពុជា ប្រើប្រាស់ជំនួបមិត្តភាពនេះ នៅមុនដំណើរទៅកាន់ក្រុង Dushanbe ប្រទេសតាហ្ស៊ីគីស្ថាន ដើម្បីប្រកួតជាមួយអាហ្វហ្គានីស្ថាន ក្នុងជំនួបបង្គ្រប់កិច្ចពូល C នៃព្រឹត្តិការណ៍ AFC Asian Cup 2019 ។ ចំពោះការប៉ះគ្នាជាមួយក្រុមឡាវ កម្ពុជា បានយកឈ្នះ ២-១ នាជំនួប AFF Suzuki Cup ឆ្នាំ២០១៦ នៅរាជធានីភ្នំពេញ។
បច្ចុប្បន្ន លោក ប្រាក់ សុវណ្ណារ៉ា មានកីឡាករ២៣នាក់ក្នុងបញ្ជីរបស់ខ្លួន ដោយមាន៣រូប ត្រូវបានកោះហៅឡើងវិញ និង៥រូបជាកីឡាករចំណូលថ្មី។ ខ្សែប្រយុទ្ធ ឃួន ឡាបូរ៉ាវី, ខ្សែបម្រើ ធារី ចន្ថាប៊ីន និងខ្សែការពារ ហុង ផេង ត្រូវបានសហព័ន្ធកីឡាបាល់ទាត់កម្ពុជាកោះហៅឲ្យចូលរួមជាមួយក្រុមជម្រើសជាតិកម្ពុជាឡើងវិញ ក្រោយអវត្តមានមួយរយៈកន្លងមក។ ហុង ផេង បានអវត្តមានក្នុងក្រុមជម្រើសជាតិតាំងពីឆ្នាំ២០១៦ ក្រោយរូបគេរងរបួសក្បាលជង្គង់ក្នុងជំនួបជាមួយក្រុមណាហ្គាវើលនាអំឡុងខែសីហា។
ចំណែកកីឡាករ ឃួន ឡាបូរ៉ាវី និងខ្សែបម្រើ ធារី ចន្ថាប៊ីន បានអវត្តមានក្នុងជម្រើសជាតិចំនួនពីរប្រកួតរួមមានជំនួបមិត្តភាពអន្តរជាតិជាមួយសិង្ហបុរី និងជំនួបជើងទី២ជាមួយក្រុមហ្ស៊កដានីក្នុងវគ្គជម្រុះ AFC Asian Cup ក្រោមការដឹកនាំរបស់លោក ប្រាក់ សុវណ្ណារ៉ា ដែលចូលដឹកនាំជំនួសលោក Leonardo Vitorino។
ក្រៅពីកីឡាករ ធារី ចន្ថាប៊ីន កីឡាករកម្ពុជាដែលកំពុងប្រកបអាជីពក្នុងក្របខណ្ឌលីគកំពូលម៉ាឡេស៊ីរួមមាន ចាន់ វឌ្ឍនាកា, កែវ សុខផេង និងកីឡាករ ប្រាក់ មុន្នីឧត្តម ក៏ស្ថិតក្នុងជម្រើសទាំង២៣នាក់របស់លោក ប្រាក់ សុវណ្ណារ៉ា ដែរ។
តែយ៉ាងណា ក្នុងជម្រើស២៣នាក់របស់លោក ប្រាក់ សុវណ្ណារ៉ា គេក៏សង្កេតឃើញមានកីឡាករចំណូលថ្មី៥រូបផងដែររួមមានកីឡាករ សុខ ហៀង, អ៊ុក សុវណ្ណ, សេត រ៉ហ្ស៊ីប, យ៉ើ សាហ្វី និងកីឡាករ ម៉ាត់ នូរុណ។
កីឡាករទាំងនោះរួមមានកីឡាករ ប្រាក់ មុន្នីឧត្តម, ចាន់ វឌ្ឍនាកា, កែវ សុខផេង, ធារី ចន្ថាប៊ីន, ឃួន ឡាបូរ៉ាវី, ស៊ូ យ៉ាទី, ហូយ ផល្លីន, នេន សុធារ័ត្ន, សឿយ វិសាល, ហុង ផេង, សឿត បារាំង, ស៊ិន កក្កដា, រស់ សំអឿន, សុះ ស៊ូហាណា, ឆេង ម៉េង, អោម ឧត្តម, កែវ សុខសិលា, អ៊ន ចាន់ប៉ូលីន, សុខ ហៀង, អ៊ុក សុវណ្ណ, សេត រ៉ហ្ស៊ីប, យ៉ើ សាហ្វី និងកីឡាករ ម៉ាត់ នូរុណ៕
Tag:
បាល់ទាត់
ជម្រើសជាតិ
ប្រាក់ សុវណ្ណារ៉ា
© រក្សាសិទ្ធិដោយ thmeythmey.com