រដ្ឋាភិបាល បង្កើតក្រុមការងារពិសេស ដើម្បីការពារអធិបតេយ្យ នៅតាមព្រំដែន

ជាតិ

រដ្ឋាភិបាល បង្កើតក្រុមការងារពិសេស ដើម្បីការពារអធិបតេយ្យ នៅតាមព្រំដែន

21, Mar 2018 , 7:19 pm

រូបភាព

លោក ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក ត្រូវបានតែងតាំងជាអនុប្រធាន១រូប នៃក្រុមការងារពិសេស ដើម្បីការពារអធិបតេយ្យ នៅតាមព្រំដែន

ដោយ: ថ្មីៗ

ក្រុមការងារពិសេសមួយ ដែលសមាសភាព សុទ្ធសឹងតែជាឥស្សជន និងមេទ័ពជាន់ខ្ពស់ ត្រូវបានបង្កើតឡើង ដើម្បីការពារអធិបតេយ្យកម្ពុជា នៅតាមព្រំដែន។ ក្រុមការងារពិសេសនេះ ត្រូវបានបង្កើតឡើងកាលពីពាក់កណ្តាលខែកុម្ភៈ ឆ្នាំ២0១៨ តាមរយៈសេចក្តីសម្រេចមួយ ដែលចុះហត្ថលេខាដោយសម្តេច ហ៊ុន សែន ប្រមុខរដ្ឋាភិបាលកម្ពុជា។

សេចក្តីសម្រេចខាងលើ កំណត់ថា ក្រុមការងារពិសេសនេះ ត្រូវគ្រប់គ្រងថវិកា សម្រាប់ចំណាយលើកិច្ចការក្នុងការការពារអធិបតេយ្យ ដែលស្ថិតក្រោមបញ្ជាផ្ទាល់របស់នាយករដ្ឋមន្ត្រី។ យោងតាមសេចក្តីសម្រេចដដែល ក្រុមការងារពិសេស ទំនងជាធ្វើកិច្ចការ និងយកចិត្តទុកដាក់ខ្លាំង នៅតាមព្រំដែនថៃ និងឡាវ។

ប្រការ២ នៃសេចក្តីសម្រេច បានបញ្ជាក់បែបនេះថា៖«[ថវិកាពិសេស] គឺសម្រាប់ចំណាយលើមុខសញ្ញា ដែលពាក់ព័ន្ធផ្ទាល់ទៅនឹងការងារអធិបតេយ្យ ជាពិសេសទិសព្រំដែនជាមួយឡាវ ថៃ និងព្រំដែនទឹក....»។

សមាសភាពនៃក្រុមការងារពិសេស ដើម្បីការពារអធិបតេយ្យកម្ពុជា មានដល់ទៅ៣១រូបឯណោះ ដោយមានលោក ប៊ិន ឈិន ឧបនាយករដ្ឋមន្ត្រី និងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី ជាប្រធាន និងអនុប្រធាន៨រូប ដោយក្នុងនោះ ក៏មានលោក ហ៊ីង ប៊ុនហៀង មេបញ្ជាការនៃបញ្ជាការដ្ឋានអង្គរក្ស និងកូនប្រុសច្បងរបស់សម្តេច ហ៊ុន សែន គឺលោក ហ៊ុន ម៉ាណែត នាយរងសេនាធិការចម្រុះ និងជាមេបញ្ជារងកងទ័ពជើងគោក ផងដែរ។ ចំណែក ឥស្សរជន២២រូបទៀត គឺជាសមាជិក៕