កីឡាអន្តរជាតិ
អន្តរជាតិ
ស្ថានភាពរបួស Neymar ទំនងអាចជួយប្រេស៊ីល ទាន់ World Cup នៅរុស្ស៊ី រូបភាពពី AFP
× Neymar អាចនឹងជាសះស្បើយទាន់ពេលវេលាដើម្បីជួយក្រុមកីឡាបាល់ទាត់ជម្រើសជាតិប្រេស៊ីលក្នុងការប្រកួត FIFA World Cup នៅរុស្ស៊ីដែលនឹងចាប់ផ្តើមនៅពាក់កណ្តាលមិថុនាខាងមុខនេះ។ នេះបើតាមការអះអាងរបស់គ្រូពេទ្យដែលជាអ្នកវះកាត់កីឡាករថ្លៃជាងគេលើលោករូបនេះ។
ទីភ្នាក់ងារព័ត៌មាន AFP ផ្សាយថា លោក Rodrigo Lasmar ដែលជាគ្រូពេទ្យជំនាញវះកាត់បាននិយាយកាលពីថ្ងៃអង្គារទី២០ ខែមីនាថា ការវិលត្រឡប់របស់ Neymar ពីការវះកាត់ជើង កំពុងតែដំណើរការបានល្អ ខណៈតារាឆ្នើមរបស់ Paris Saint-Germain រូបនេះបានត្រៀមខ្លួនរួចស្រេចសម្រាប់ព្រឹត្តិការណ៍កីឡាបាល់ទាត់ពិភពលោកឆ្នាំ២០១៨នេះ។
Lasmar បានប្រាប់កាសែតបារាំង L'Equipe ដូច្នេះថា៖«ឥឡូវនេះអ្វីៗគ្រប់យ៉ាងកំពុងដំណើរការបានល្អ ហើយពួកគេបានប្រាប់ខ្ញុំគ្រប់យ៉ាងអំពីការធូរស្បើយឡើងវិញរបស់ Neymar»។
លោកបានអះអាងបន្ថែមថា ខ្សែប្រយុទ្ធវ័យ ២៦នេះអាចនឹងជាសះស្បើយ និងចូលលេងបានវិញនៅពាក់កណ្តាលខែមេសាខាងមុខនេះ។
អតីតសមាជិក Barcelona រូបនេះបានរងរបួសកជើងក្នុងជំនួបដែល PSG ឈ្នះ Marseille ក្នុងការប្រកួតពានក្នុងស្រុក Ligue 1 កាលថ្ងៃទី២៥ ខែកុម្ភៈ នៅពេលព្យាយាមប្រជែងគ្នាជាមួយកីឡាករ Bouna Sarr។ ក្រោយបញ្ជូនដល់មន្ទីរពេទ្យ បានពិនិត្យឃើញថារូបគេបាក់ឆ្អឹងនៅក្នុងឆ្អឹងសំខាន់នៅចំកណ្តាលជើងដែលត្រូវទាមទារឲ្យវះកាត់។
Neymar ក៏ធ្លាប់រងរបួសខកខានការប្រកួតវគ្គពាក់កណ្តាលផ្តាច់ព្រ័ត្រ World Cup ឲ្យប្រេស៊ីលដែលចាញ់អាល្លឺម៉ង់ ៧-១ កាលពី៤ឆ្នាំមុនម្តងដែរ។ ដូច្នេះសម្រាប់ព្រឹត្តិការណ៍លំដាប់ពិភពលោកលើកនេះក្រុមរហស្សនាមសាំបាសង្ឃឹមថាតារាឆ្នើមរបស់ខ្លួននឹងមិនមិនជួបបញ្ហាទៀតនោះទេ៕
Tag:
បាល់ទាត់
Neymar
World Cup
© រក្សាសិទ្ធិដោយ thmeythmey.com