អន្តរជាតិ
បារាំង៖ ចំនួនបក្សីធ្លាក់ចុះនៅតាមជនបទ ដោយសារមិនសូវមានសត្វល្អិត និងដំណាំកសិកម្ម រូបថត AFP
× អ្នករស់នៅក្រុងអាចបន្តឮសំឡេងរថយន្ត ប៉ុន្តែអ្នករស់នៅតាមទីជនបទប្រឈមនឹងបាត់បង់សំឡេងបក្សី។ តាមការសិក្សារួមគ្នារបស់សារមន្ទីរជាតិប្រវត្តិសាស្ត្រធម្មជាតិ (MNHN) និងមជ្ឈមណ្ឌលជាតិស្រាវជ្រាវវិទ្យាសាស្ត្រ (CNRS) របស់បារាំង បានបង្ហាញថា ចំនួនសត្វបក្សីនៅតាមទីជនបទនៃប្រទេសបារាំង ធ្លាក់ចុះយ៉ាងខ្លាំងក្នុងរយៈពេល១៥ឆ្នាំ។
ការសិក្សាដែលចាប់ផ្តើមតាំងពីឆ្នាំ១៩៩៤មក បានរកឃើញពីការបាត់បង់បក្សីក្នុងចំនួនដ៏ច្រើនគួរឲ្យកត់សម្គាល់។ MNHN និង CNRS បានប្រកាសរួមគ្នាទាក់ទងនឹងលទ្ធផលនៃការស្រាវជ្រាវរបស់ខ្លួន ហើយត្រូវបានដកស្រង់ដោយសារព័ត៌មាន Le Monde។
ជាមធ្យមប្រភេទសត្វបក្សីនីមួយៗ បានបាត់បង់រហូតដល់ទៅមួយភាគបី ក្នុងចន្លោះពេល១៥ឆ្នាំ។ ក្រុមអ្នកស្រាវជ្រាវបានលើកឡើងថា ការផ្លាស់ប្តូរការអនុវត្តគោលនយោបាយកសិកម្មនារយៈពេល២៥ឆ្នាំចុងក្រោយ ជាមូលហេតុចម្បងនៃការបាត់បង់ចំនួនបក្សី។
កសិកម្មទំនើប បានកាត់បន្ថយវត្តមានរបស់ឃ្មុំ និងសត្វល្អិតទូទៅ ដែលជាចំណីបក្សី។ អ្នកជំនាញបានព្រមានថា តួលេខបក្សីនៅតាមជនបទ នឹងបន្តធ្លាក់ចុះ ខណៈដំណាំកសិកម្មមិនសូវសម្បូរបែបដូចមុន។
លោក Frederic Jiguet សាស្ត្រាចារ្យផ្នែកជីវវិទ្យារបស់ MNHN បានត្អូញត្អែរថា៖ «សត្វល្អិតថយចុះ ប៉ុន្តែស្របពេលជាមួយគ្នានេះ ដំណាំ និងធញ្ញជាតិ ដែលជាចំណីរបស់បក្សីក៏ថយចុះផងដែរ ដូច្នេះបក្សីពិតជាពិបាកចិញ្ចឹមជីវិតខ្លាំងណាស់»៕
© រក្សាសិទ្ធិដោយ thmeythmey.com