ជាតិ
សេដ្ឋកិច្ច
ADB គ្រោងផ្ដល់៦០លានដុល្លារ ដើម្បីអនុវត្តគម្រោងអភិវឌ្ឍន៍ជំនាញនៅកម្ពុជា រូបពីក្រសួងការងារ និងបណ្ដុះបណ្ដាលវិជ្ជាជីវៈ
× ភ្នំពេញ៖ បើតាមការឲ្យដឹងរបស់ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ធនាគារអភិវឌ្ឍន៍អាស៊ី (ADB) គ្រោងនឹងផ្ដល់ថវិកា ៦០លានដុល្លារបន្ថែមទៀតសម្រាប់អនុវត្តគម្រោងអភិវឌ្ឍន៍ជំនាញនៅកម្ពុជា រយៈពេល ៥ឆ្នាំ។
លោក អ៊ិត សំហេង បានជួបលោក Jan Hansen នាយកស្ដីទី ADB ប្រចាំកម្ពុជា នៅថ្ងៃទី២០ខែមីនា ដើម្បីពិភាក្សាលើកម្មវិធីបណ្ដុះបណ្ដាលវិជ្ជាជីវៈ ដែលកំពុងដំណើរសព្វថ្ងៃ ហើយកម្មវិធីដែលផ្ដល់មូលនិធិដោយ ADB នេះ នឹងត្រូវបញ្ចប់នៅឆ្នាំ២០២១។
លោក អ៊ិត សំហេង មានប្រសាសន៍ថា ADB នឹងរៀបចំឲ្យមានគម្រោងមួយទៀតដែលផ្ដោតលើការអភិវឌ្ឍន៍ជំនាញសម្រាប់ការប្រកួតប្រជែង ដែលរំពឹងថានឹងត្រូវអនុវត្តពីឆ្នាំ២០១៩ ដល់ឆ្នាំ២០២៤ លើទឹកប្រាក់ប្រមាណ ៦០លានដុល្លារអាមេរិក។
លោក អ៊ិត សំហេង ថ្លែងថា គម្រោងនេះមានអត្ថប្រយោជន៍ធំណាស់សម្រាប់ប្រជាពលរដ្ឋ ពិសេសយុវជន ស្របពេលតម្រូវការកម្លាំងពលកម្មជំនាញមានកាន់តែច្រើន ក្នុងសម័យកាលសមាហរណកម្មសហគមន៍សេដ្ឋកិច្ចអាស៊ាន និងសាកលភាវូបនីយកម្ម៕
Tag:
អ៊ិត សំហេង
ADB
ការងារ
© រក្សាសិទ្ធិដោយ thmeythmey.com