ជាតិ
នយោបាយជាតិ
ភាសាបារាំងធ្លាក់ចុះឥទ្ធិពលនៅកម្ពុជា ដោយសារតែបារាំងមិនស្ដាប់យោបល់សម្ដេច ហ៊ុន សែន?
× ភ្នំពេញ៖ ភាសាបារាំងនៅកម្ពុជាបច្ចុប្បន្ន ហាក់ធ្លាក់ចុះឥទ្ធិពលខ្លាំង ក្រោយពីកម្ពុជាងើបខ្លួនចេញពីនឹមអាណានិគមបារាំង។ នេះជាការមើលឃើញសម្ដេចនាយករដ្ឋមន្ត្រី ហ៊ុន សែន ដែលបានបន្ថែមថា មូលហេតុដែលភាសាបារាំងចុះឥទ្ធិពលនេះ ដោយសារតែបារាំងមិនព្រមទទួលយកយោបល់សម្ដេច ដែលបានស្នើឲ្យមានការលើកស្ទួយភាសាបារាំងនៅកម្ពុជា។
ថ្លែងក្នុងពិធីចែកសញ្ញាបត្រដល់គរុសិស្ស-និស្សិត នៅវិទ្យាស្ថានជាតិអប់រំ នៅព្រឹកថ្ងៃទី២២ មីនានេះ សម្ដេច ហ៊ុន សែន បានរម្លឹកថា សម្ដេចធ្លាប់បានផ្ដល់យោបល់ឲ្យបារាំងបង្កើតសាលាបង្រៀនភាសានៅកម្ពុជា កាលពីឆ្នាំ១៩៨២ ។ ប៉ុន្តែយោបល់នេះ ត្រូវបានអ្នកនយោបាយបារាំងបដិសេធ ហើយឆ្លើយថា បារាំងមិនបង្កើតសាលាភាសាបារាំងនៅកម្ពុជាឡើយ ដោយសារពួកគេមិនពេញចិត្តរដ្ឋាភិបាលកម្ពុជា។ ត្រង់ចំណុចនេះសម្ដេច ហ៊ុន សែន បាននិយាយថា ទស្សនៈរបស់បារាំងនៅគ្រានោះ គឺជាការគិតខុសឆ្គងមួយមកលើរដ្ឋាភិបាលកម្ពុជា ទើបធ្វើឲ្យឥទ្ធិពលភាសាបារាំងនៅកម្ពុជា ធ្លាកចុះបែបនេះ។
សូមស្ដាប់ប្រសាសន៍សម្ដេច ហ៊ុន សែន៖
តែយ៉ាងណាប្រមុខរដ្ឋាភិបាលកម្ពុជា នៅតែលើកទឹកចិត្តឲ្យរដ្ឋាភិបាលបារាំង មកផ្សព្វផ្សាយភាសាបារាំងនៅកម្ពុជា ឲ្យកាន់តែទូលំទូលាយដូចមុន តាមរយៈវិស័យអប់រំ ឬការបង្កើតសាលាបង្រៀនភាសាបារាំងជាដើម។
គួរបញ្ជាក់ថា បារាំងបានបង្កើតវិទ្យាស្ថានបារាំងអាលីយ៉ង់ ហ្វ្រង់សេ (Alliance française )មួយ នៅឆ្នាំ១៩៩០ ។ ប៉ុន្តែក្រោយមកវិទ្យាស្ថានបារាំង Alliance française បានប្តូរទៅជាមជ្ឈមណ្ឌលវប្បធម៌បារាំង(CCF)ខែមេសា ឆ្នាំ១៩៩២ រហូតដល់ខែមករា ឆ្នាំ២០១១ មជ្ឈមណ្ឌលវប្បធម៌បារាំងនៅកម្ពុជាបានប្តូរទៅជាវិទ្យាស្ថានបារាំង៕
© រក្សាសិទ្ធិដោយ thmeythmey.com