ជាតិ
ជប៉ុន ចង់ឲ្យកម្ពុជា រៀបចំការបោះឆ្នោត ដែលមានលក្ខណៈសេរី និងយុត្តិធម៌ ជំនួបរវាងលោក កេនតារ៉ូ ស៊ូនូរ៉ា និងលោក ប្រាក់ សុខុន កាលពីថ្ងៃទី២៣ ខែមីនា ឆ្នាំ២0១៨។ រូបពីក្រសួងការបរទេសកម្ពុជា
× លោក កេនតារ៉ូ ស៊ូនូរ៉ា (Kentaro Sonoura) ទីប្រឹក្សារបស់នាយករដ្ឋមន្ត្រីជប៉ុន បាននិយាយនៅចំពោះមុខលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជាថា ជប៉ុន ចង់ឃើញការបោះឆ្នោតនៅកម្ពុជា នាឆ្នាំ២០១៨ ប្រព្រឹត្តទៅដោយសេរី និងយុត្តិធម៌។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា (AKP)។
ជំនួបរវាងអ្នកទាំងពីរ ធ្វើឡើង កាលពីព្រឹកថ្ងៃទី២៣ ខែមីនា ឆ្នាំ២0១៨ នៅទីស្តីការក្រសួងការបរទេសកម្ពុជា ។ បើតាម AKP លោក ប្រាក់ សុខុន បានប្រាប់លោក កេនតារ៉ូ ស៊ូនូរ៉ា ថា បច្ចុប្បន្ននេះ កម្ពុជា មានគណបក្សនយោបាយចំនួន២៥ ហើយ ដែលបានចុះបញ្ជីសម្រាប់ការចូលរួមប្រកួត ប្រជែងដោយសេរី និង យុត្តិធម៌ ។ លោក ប្រាក់ សុខុន បន្តថា នៅពេលខាង អាចនឹងមានគណបក្សនយោបាយច្រើនទៀត ដែលចូលរួមក្នុងការបោះឆ្នោត ជ្រើសរើសតំណាងរាស្ដ្រឆ្នាំនៅ២០១៨។
លោក កេន តារ៉ូ ស៊ូនូរ៉ា ក៏បានជួបសម្តេចនាយករដ្ឋមន្ត្រី ហ៊ុន សែន ផងដែរ នៅរសៀលថ្ងៃទី២៣ ខែមីនា ឆ្នាំ២0១៨។ បើតាមទំព័រហ្វេសបុករបស់សម្តេច ហ៊ុន សែន លោក កេន តារ៉ូ ស៊ូនូរ៉ា បានអះអាងថា ជប៉ុន នឹងបន្តគាំទ្រកម្ពុជា ក្នុងការអនុវត្តនីតិរដ្ឋ និងការថែរក្សាសុខសន្តិភាព ដើម្បីជំរុញការអភិវឌ្ឍ ឲ្យកាន់តែរីកចម្រើន។
គេ សង្កេតឃើញថា ប្រទេសជប៉ុន នៅតែបន្តសហការនិងផ្តល់ជំនួយដល់ប្រទេសកម្ពុជាដដែល ទោះជាប្រទេសកម្ពុជា រងការរិះគន់ផ្ទួនៗពីសហគមន៍អន្តរជាតិ ព្រោះតែការរំលាយគណបក្សសង្គ្រោះជាតិ និងការចាប់លោក កឹម សុខា ដាក់ពន្ធានាគារ ក៏ដោយ។ ថ្មីៗនេះ ជប៉ុន ទើបនឹងផ្តល់ហិបឆ្នោត១ម៉ឺន៥ពាន់ ដែលមានតម្លៃប្រមាណ៧លានដុល្លារ ដល់គណៈកម្មាធិការជាតិរៀបចំការបោះឆ្នោត ដើម្បីបម្រើឲ្យការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២0១៨។
ដោយសារតែយល់ថារដ្ឋាភិបាលកម្ពុជា ធ្វើឲ្យប្រជាធិបតេយ្យនិងសិទ្ធិមនុស្ស ធ្លាក់ចុះ សហរដ្ឋអាមេរិកនិងសហភាពអឺរ៉ុប បានផ្តាច់ជំនួយលើការបោះឆ្នោត។ ប្រទេសធំៗទាំងពីរនេះ នឹងមិនទទួលស្គាល់ការបោះឆ្នោតនៅកម្ពុជាឡើយ បើគណបក្សសង្គ្រោះជាតិ មិនបានចូលរួមប្រកួតប្រជែង ហើយលោក កឹម សុខា ដែលជាប្រធានគណបក្សប្រឆាំងដ៏ធំមួយនេះ មិនត្រូវបានដោះលែង៕
© រក្សាសិទ្ធិដោយ thmeythmey.com