ជាតិ
ព្រោះខុសនឹងច្បាប់ គណបក្ស កែម ឡី ត្រូវបានប្តូរឈ្មោះជាគណបក្សខ្មែរតែមួយ វិញ
× ក្រុមស្ថាបនិក បានសម្រេចប្តូរឈ្មោះគណបក្ស កែម ឡី ទៅជាគណបក្សខ្មែរតែមួយ។ ក្រោយពីបានផ្តូរឈ្មោះរួចហើយ គណបក្សខ្មែរតែមួយ ដែលមានលោក កែម រិទ្ធិសិត ជាប្រធាន ក៏បានដាក់ពាក្យទៅកាន់ក្រសួងមហាផ្ទៃម្តងទៀត កាលពីថ្ងៃទី២៣ ខែមីនា ឆ្នាំ២0១៨ ដើម្បីសុំចុះបញ្ជីជាផ្លូវការ។
សេចក្តីប្រកាសព័ត៌មាន ស្តីពីការប្តូរឈ្មោះគណបក្ស កែម ឡី ទៅជាគណបក្សខ្មែរតែមួយ និងពាក្យសុំចុះបញ្ជីគណបក្សនយោបាយ ត្រូវបានបង្ហោះនៅលើទំព័រហ្វេសបុករបស់លោក គុជ លី ដែលជាអ្នកនាំពាក្យគណបក្សខ្មែរតែមួយ។ លោក គុជ លី ប្រាប់សារព័ត៌មានថ្មីៗ តាមទូរសព្ទថា យ៉ាងដូច្នេះថា៖«តាមពិតក្រសួងមហាផ្ទៃ បានទទួលស្គាល់រួចហើយ គ្រាន់តែស្នើឲ្យប្តូរឈ្មោះតែប៉ុណ្ណោះ។ ឥឡូវ តំណាក់កាលចុងក្រោយ គឺយើងសុំចុះបញ្ជីគណបក្ស ដោយច្បាប់ទាមទារឲ្យមានស្នាមមេដៃអ្នកគាំទ្រ៤ពាន់នាក់ និងស្ថាបនិក ចាប់ពី៧នាក់ឡើងទៅ»។
បើតាមលោក គុជ លី គណបក្សខ្មែរតែមួយ នឹងធ្វើសមាជនៅថ្ងៃទី៨ ខែមេសា ឆ្នាំ២0១៨ ដើម្បីរៀបចំរចនាសម្ព័ន្ធនៃថ្នាក់ដឹកនាំ រួមទាំងធ្វើសម្រេចពីបញ្ហាសំខាន់ៗមួយចំនួន។ អ្នកនាំពាក្យគណបក្សខ្មែរតែមួយរូបនេះ បញ្ជាក់ថា៖«បើកិច្ចការរបស់យើង ដំណើរការបានល្អ យើងនឹងពិចារណាពីការចូលរួមបោះឆ្នោតនៅឆ្នាំ២0១៨»។
មុនដំបូង លោក កែម រិទ្ធិសិត បានយកឈ្មោះលោកបណ្ឌិត កែម ឡី ដែលជាបងប្រុសបង្កើត ដាក់ជាឈ្មោះគណបក្សតែម្តង។ ប៉ុន្តែ ក្រសួងមហាផ្ទៃ បានណែនាំឲ្យតំណាងគណបក្ស កែម ឡី កែសម្រួលឡើងវិញ ដើម្បីឲ្យស្របនឹងច្បាប់ស្តីពីគណបក្សនយោបាយ។
ច្បាប់ស្តីពីគណបក្សនយោបាយ ពុំអនុញ្ញាតឲ្យយកឈ្មោះបុគ្គលណាម្នាក់ ដាក់ជាឈ្មោះគណបក្សនោះទេ ហើយក៏មិនអនុញ្ញាតឲ្យយករូបបុគ្គល ទៅធ្វើជាសញ្ញាសម្គាល់ (Logo) របស់គណបក្សដែរ។ ព្រោះតែច្បាប់ស្តីពីគណបក្សនយោបាយ ត្រូវបានកែប្រែបែបនេះហើយ ទើបគណបក្ស សម រង្ស៊ី ត្រូវបង្ខំចិត្តប្តូរឈ្មោះទៅជាគណបក្សភ្លើងទៀន ឯរូបរបស់សម្តេចក្រុមព្រះ នរោត្តម រណឫទ្ធិ ក្នុងសញ្ញាសម្គាល់គណបក្សហ្វ៊ុនស៊ិនប៉ិច ត្រូវបានដកចេញ៕
© រក្សាសិទ្ធិដោយ thmeythmey.com