កីឡាជាតិ
ជាតិ
អុកចត្រង្គជាកីឡាជួយបង្កើនការគិត និងធ្វើឲ្យគំនិតចាស់ជាងវ័យ កីឡាករ ឆយ វីរ៉ា ពេលចូលរួមប្រកួតអុកចត្រង្គចម្រាញ់ជើងខ្លាំងប្រចាំមណ្ឌលភ្នំពេញក្នុងពិធីបុណ្យទន្លេ
× អុកចត្រង្គជាកីឡាអត្តសញ្ញាណជាតិមួយដែលជួយបង្កើនការគិត និងធ្វើឲ្យចិត្តកីឡាករមានភាពស្ងប់ស្ងាត់។ ទន្ទឹមនឹងនេះកម្ពុជា ក៏គ្រោងយកកីឡានេះដាក់ក្នុងកម្មសិក្សារបស់ក្រសួងអប់រំយុវជន និងកីឡាផងដែរ ព្រោះមានបណ្តាប្រទេសមួយចំនួនបានយកកីឡានេះដាក់ក្នុងវិធីសិក្សារបស់គេរួចទៅហើយ។ ជាមួយគ្នានេះកីឡាករ ឆយ វីរ៉ា ដែលជាអ្នកលេងអុកចត្រង្គមួយដ៏ពូកែ បានលើកជាបទពិសោធថា កីឡានេះអាចជួយរម្ងាប់ភាពខឹងក្រោធ និងធ្វើឲ្យចិត្តមិនងាយងាករេ។
មិនខុសពីកីឡាករដទៃឡើយ កីឡាករ ឆយ វីរ៉ា ម្ចាស់ជើងឯកពានរង្វាន់សម្តេច ហ៊ុន សែន ឆ្នាំ២០១០ បានអះអាងថា អុកចត្រង្គជាកីឡាមួយដែលជួយបង្កើនការគិតខ្លាំងបំផុតដល់កីឡាករ ពោលគឺធ្វើឲ្យកីឡាករគិតបានវែងឆ្ងាយ និងមានស្មារតីរហ័យរហួន។ លើសពីនេះកីឡាកររូបនេះ បានចាត់ទុកអុកចត្រង្គជាកីឡាសម្មាធិ ព្រោះវាអាចជួយឲ្យមនុស្សមានចិត្តស្ងប់ និងមិនងាយងាករេ។
ក្នុងបទសម្ភាសជាមួយព័ត៌មាន thmeythmey.com ម្ចាស់លេខ៣ព្រឹត្តិការណ៍អង្គរសង្ក្រាន្តឆ្នាំ២០១៧រូបនេះបានអះអាងថា៖«កីឡាករអុកចត្រង្គវាជួយឲ្យយើងគិតបានល្អ ហើយចិត្តយើងក៏ស្ងប់...។ ប្រសិនបើយើងលេងអុកចត្រង្គពូកែមែន វាធ្វើឲ្យយើងមានចិត្តស្ងប់ស្ងាត់ គឺមិនងាយងាករេម្តងទៅនេះ ម្តងទៅនោះឡើយ។ ក្នុងកម្មវិធីហ្វឹកហាត់របស់ជម្រើសជាតិ គេឲ្យកីឡាករធ្វើសមាធិ ដើម្បីហាត់ពត់ចិត្តឲ្យស្ងប់ និងបំបាត់ភាពខឹងក្រោធ»។
ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបាននិយាយថា អុកចត្រង្គជាកីឡាមួយដែលអាចសង្រួមអារម្មណ៍ ស្មារតី និងបង្កើនការគិតដល់មនុស្ស ពិសេសធ្វើគំនិតរបស់មនុស្សចាស់ជាងវ័យ។ ត្រង់ចំណុចនេះលោកបានបញ្ជាក់យ៉ាងដូច្នេះថា៖«ប្រសិនបើកុមារអាយុ៦ឆ្នាំអង្គុយលេងអុកចត្រង្គ គាត់ក្លាយជាមនុស្ស ដែលមានភាពនឹងធឹងដូចមនុស្សមានវ័យពី២០ទៅ៣០ឆ្នាំ។ តែបើគាត់មានអាយុជាង១០ឆ្នាំ មើលទៅមានឥរិយាបទដូចមនុស្សចាស់»។
ដោយមើលឃើញពីគុណសម្បត្តិនៃវិស័យកីឡាអុកចត្រង្គ រាជរដ្ឋាភិបាលកម្ពុជា គ្រោងយកកីឡាអត្តសញ្ញាណជាតិមួយនេះដាក់ក្នុងកម្មវិធីសិក្សារបស់ក្រសួងអប់រំយុវជន និងកីឡាក្នុងកម្រិតបឋមសិក្សារហូតដល់កម្រិតវិទ្យាល័យ។ នៅប្រទេសមួយចំនួនរួមមានសិង្ហបុរី ម៉ាឡេស៊ី និងរុស្ស៊ីជាដើមបានអនុវត្តកម្មវិធីតាមរយៈការក្នុងកម្មវិធីសិក្សានៅកម្រិតបឋម ដើម្បីបង្រៀនពីការសង្រួមអារម្មណ៍របស់កុមារ។
«យើងគ្រោងនឹងបញ្ជ្រាបកីឡាអុកចត្រង្គក្នុងកម្មវិធីសិក្សារបស់ក្រសួងអប់រំ ព្រោះកីឡានេះជួយអប់រំខាងផ្លូវចិត្ត ស្មារតី និងបញ្ញារបស់ក្មេងឲ្យមានការលូតលាស់ផ្នែកសង្រួមអារម្មណ៍ និងការគិតពិចារណា ដូចនៅសិង្ហបុរី ម៉ាឡេស៊ី និងប្រទេសចំនួនទៀតរួមទាំងរុស្ស៊ីជាដើម គេបានដាក់កីឡានេះក្នុងកម្មសិក្សា ដើម្បីបង្រៀនក្មេងពីការសង្រួមអារម្មណ៍ និងចិត្តសាស្ត្រ»។ នេះជាបញ្ជាក់របស់លោក វ៉ាត់ ចំរើន ដែលលោកបានបន្ថែមថា រាជរដ្ឋាភិបាលកម្ពុជាក៏គ្រោងដាក់កីឡាអុកចត្រង្គក្នុងព្រឹត្តិការណ៍កីឡាស៊ីហ្គេមនាឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ៕
Tag:
អុកចត្រង្គ
ឆយ វិរ៉ា
វ៉ាត់ ចំរើន
© រក្សាសិទ្ធិដោយ thmeythmey.com