វៀតណាម ត្រៀមដំឡើងរថយន្តតាមផ្សារដើម្បីពិនិត្យអាហារគីមី និងអាហារគ្មានគុណភាព

អន្តរជាតិ

វៀតណាម ត្រៀមដំឡើងរថយន្តតាមផ្សារដើម្បីពិនិត្យអាហារគីមី និងអាហារគ្មានគុណភាព

25, Mar 2018 , 1:59 pm

រូបភាព

ដោយ:

ក្រុងហាណូយ ត្រៀមដំឡើងរថយន្ត ដែលមានបច្ចេកវិទ្យាខ្ពស់ផ្នែកចំណីអាហារច្រើនគ្រឿងដើម្បីពិនិត្យគុណភាពចំណីអាហារនៅតាមផ្សារ, ផ្សារទំនើប និងអាហារតាមហាងនានា ។ ចំណាត់ការនេះ ធ្វើឡើងក្នុងគោលដៅដើម្បីទប់ស្កាត់ការប្រើប្រាស់ និងការដាក់អាហារដែលគ្មានគុណភាពនៅតាមទីផ្សារ ។

អនុប្រធានមន្ទីរសុខាភិបាលវៀតណាម លោក Trần Văn Chung នៅថ្ងៃ២១ មីនា បានឲ្យដឹងថា ក្នុងឆ្នាំ២០១៨នេះ ក្រុងហាណូយ នឹងបំពាក់រថយន្តពិនិត្យចំណីអាហារចំនួនប្រាំគ្រឿងនៅតាមផ្សារនានា ដើម្បីពិនិត្យគុណភាពចំណីអាហារ មុនពេលប្រជាជនជាវយកទៅបរិភោគ ។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News ។

តាមអះអាងរបស់លោកអនុប្រធានមន្ទីរដដែលនោះ នៅពេលដែលរថយន្តទាំងនោះ បានពិនិត្យលើចំណីអាហាររួចហើយ គេ នឹងបង្ហាញពីលទ្ធផលទៅលើផ្ទាំងកញ្ចក់តែម្តង ហើយ ប្រសិនបើ ផលិតផលចំណីអាហារណាមួយ រកឃើញថា មានផ្ទុកសារធាតុគីមី អាជ្ញាធរ នឹងរឹបអូសផលិតផលទាំងនោះតែម្តង ។

លោក សង្កត់ធ្ងន់ថា៖« នេះ គឺជាគោលនយោបាយមួយ ដែលបង្ហាញថា រដ្ឋាភិបាលពិតជាព្រួយបារម្ភចំពោះសុវត្ថិភាពចំណីអាហារក្នុងការរស់នៅរបស់ប្រជាជន» ។

បើតាមអនុប្រធានមន្ទីរ នេះ មិនមែនជាលើកដំបូងឡើយ ដែល ក្រុងហាណូយ បំពាក់រថយន្តតាមផ្សារនានាដើម្បីពិនិត្យគុណភាពចំណីអាហារនោះ ។ លោក អះអាងថា កន្លងមក រដ្ឋាភិបាលវៀតណាម បានដំឡើងឧបករណ៍បច្ចេកវិទ្យាតាមមធ្យោបាយជាច្រើននៅក្នុងសង្វាក់ផលិតកម្ម និងធ្វើការជាមួយនឹងប្រជាជនតាមតំបន់ក្នុងការគ្រប់គ្រងចំណីអាហារ ដែលមានបន្លែជាដើម ។

ខណៈទទួលស្គាល់ពីបញ្ហាជាច្រើន ដែល រដ្ឋាភិបាលវៀតណាម ត្រូវប្រឈម លោកអនុប្រធាន បានលើកឡើងប្រជាជន ដែលពាក់ព័ន្ធនឹងផលិតកម្មចំណីអាហារ និងអាជីវកម្ម តែងតែមើលផលប្រយោជន៍ជាធំ ដែលកត្តានេះ ធ្វើឲ្យពួកគេ បរាជ័យក្នុងការគោរពតាមច្បាប់សុវត្ថិភាពចំណីអាហារ និងខ្វះការទទួលខុសត្រូវ ក្នុងការធានាឲ្យបានសុខភាពសហគមន៍ ៕