នារីគួរកាត់បន្ថយក្តីរំពឹងខ្ពស់ក្នុងរឿងស្នេហា ដើម្បីការពារភាពឈឺចាប់

ជាតិ

បទយកការណ៍ / បទសម្ភាសន៍

នារីគួរកាត់បន្ថយក្តីរំពឹងខ្ពស់ក្នុងរឿងស្នេហា ដើម្បីការពារភាពឈឺចាប់

25, Mar 2018 , 9:19 pm

រូបភាព

ដោយ:

ភ្នំពេញ៖ «មានស្នេហា មានការឈឺចាប់»។ នេះគឺជាសុភាសិតមួយឃ្លា ដែលផ្ដល់ដំបូន្មាន និងដាស់តឿនយុវជនប្រុស-ស្រី កុំឲ្យលលេងជាមួយរឿងស្នេហា។ សុភាសិតនេះ នៅតែបន្តមកដាស់អារម្មណ៍នារីនាពេលបច្ចុប្បន្ន ឲ្យគិតច្បាស់លាស់មុន នឹងចង់ផ្ដើមស្នេហាជាមួយបុរសណាម្នាក់ ព្រោះថាមានស្នេហាត្រូវប្រឈមមុខនឹងភាពឈឺចាប់គ្រប់ពេលវេលា។

«បុប្ផា» គឺជាឈ្មោះប្រឌិត សម្រាប់នារីម្នាក់ ដែលធ្លាប់រងគ្រោះព្រោះស្នេហា។ ស្នេហាដំបូងរបស់ស្ត្រីវ័យ២៣ឆ្នាំរូបនេះ បានផ្ដើមនៅពេលដែលនាងរៀនថ្នាក់ទី១១ ហើយពួកគេសន្យាថា នឹងរៀបការជាមួយគ្នាពេលរៀនចប់។ ដោយសារតែការទុកចិត្ត នាងក៏ព្រមប្រគល់ខ្លួនឲ្យទៅសង្សាររបស់នាង តែមួយឆ្នាំក្រោយមក សង្សាររបស់នាងបានសុំបែកពីនាង។

ការឈឺចាប់ក្នុងស្នេហាដំបូង បុប្ផា បានប្ដូរពីនារីដែលមានភាពរីករាយ ក្លាយជាស្ត្រីម្នាក់ដែលចូលចិត្តដើរលេងច្រើន និងចូលចិត្តផឹកស្រា ដើម្បីបំភ្លេចភាពឈឺចាប់។ ទីបំផុតនាងក៏រត់ចេញពីផ្ទះ ហើយក្លាយខ្លួនជាស្ត្រីបម្រើសេវាផ្លូវភេទ។ នារីសម្បុរស និងមានរាងតូចស្ដើងរូបនេះ បានរៀបរាប់ដូច្នេះថា៖ «ក្រោយពេលដែលប៉ាម៉ាក់ខ្ញុំដឹង គាត់តែងតែស្ដីបន្ទោសឲ្យខ្ញុំ។ ពេលនោះខ្ញុំមិនចង់នៅផ្ទះទេ ខ្ញុំធុញថប់ គឺមានតែចេញក្រៅ ផឹកស្រា ទើបខ្ញុំភ្លេចរឿងពិបាកចិត្តបានមួយគ្រាៗ»។

ក្លាយជានារីបម្រើផ្លូវភេទ ជាលទ្ធផលមួយរបស់បុប្ផា បន្ទាប់ពីបែកបាក់ស្នេហា។ ប៉ុន្តែជម្រើសរបស់ បុប្ផា ដែលបណ្ដោយខ្លួនឲ្យក្លាយជានារីបម្រើផ្លូវភេទនេះ ជាជម្រើសមិនសមស្របនឹងទស្សនៈសង្គម ដែលកំពុងលើកម្ពស់តម្លៃស្ត្រីឡើយ។

ផ្ទុយពី បុប្ផា ដែលបណ្ដោយខ្លួនចូលភពងងឹតកាន់តែជ្រៅនេះ កញ្ញា គន្ធា បានយកការឈឺចាប់នេះ មកធ្វើជាបទពិសោធន៍នៅក្នុងជីវិត ដើម្បីជ្រើសរើសបុរសដែលល្អសម្រាប់រូបនាង។ គន្ធា ដែលកំពុងសិក្សានៅមហាវិទ្យាល័យឆ្នាំទី៣ បានខកចិត្តក្នុងរឿងស្នេហាចំនួន៣ដងរួចមកហើយក្ដី ក៏វាមិនមែនជាបញ្ហាដែលធ្វើឲ្យនាង គិតខ្លីចំពោះអនាគតខ្លួនឡើយ។ សម្រាប់ គន្ធា ក្រោយពីទំនេរពីការសិក្សា កញ្ញាតែងតែឆ្លៀតទៅចូលរួមសិក្ខាសាលា និងការងារសង្គម ដែលកញ្ញាចូលចិត្ត ដើម្បីបំបាត់ទុកក្រៀមក្រំ ដែលកើតចេញពីការបែកបាក់ស្នេហានេះ។

ស្ត្រីមានសម្បុរស្រអែមស្រស់រូបនេះ និយាយថា៖ «ឈឺចាប់ណាស់ពេលបែកគ្នាដំបូង ប៉ុន្តែមានតែកាត់ចិត្ត បើប្រឹងពិបាកចិត្តក៏គេមិនមកវិញដែរ មានតែគេមើលងាយថែម។ បើអ្នកថ្មីមក ខ្ញុំមើលទៅថាអាចទទួលយកបានខ្ញុំនឹងទទួលយក»។

អ្នកជំនាញដោះស្រាយវិបត្តិស្នេហា កញ្ញា នាង សុវ៉ាតនា ហៅ Dj NaNa លើកឡើងថា ការបែកបាក់ស្នេហាដំបូង អាចធ្វើឲ្យមនុស្សស្រីមានការខ្លាចរអា ឬសម្រេចចិត្តលើអ្វីមួយដែលខុសលើបញ្ហាអនាគតខ្លួន។ ប៉ុន្តែពេលខ្លះភាពឈឺចាប់ក្នុងរឿងស្នេហានេះ ក៏ធ្វើឲ្យស្ត្រីមានភាពរឹងមាំច្រើនជាងមុន ក្នុងការសម្រេចចិត្តធ្វើអ្វីមួយ ដែលមានការគិតពិចារណាឲ្យបានច្បាស់លាស់ ជាជាងការសម្រេចចិត្តទៅតាមតែបេះដូង។ ដើម្បីកាត់បន្ថយការឈឺចាប់ ក្រោយពេលបែកបាក់ស្នេហានោះ កញ្ញា ណាណា លើកឡើងថា ស្ត្រីកុំរំពឹងទុកខ្ពស់ក្នុងរឿងស្នេហា ព្រោះបុរសអាចមានចិត្តផ្ដល់តម្លៃទាប ក្នុងរឿងស្នេហាជាងស្ត្រី ដើម្បីទុកផ្លូវដើរផ្សេងក្នុងរឿងស្នេហារបស់ពួកគេ។

Dj NaNa ដែលល្បីខាងដោះស្រាយវិបត្តិស្នេហារូបនេះ បានបញ្ជាក់ដូច្នេះថា៖ « មនុស្សស្រីត្រូវបន្ថយការរំពឹងទុកខ្ពស់របស់ខ្លួន លើស្នេហាដែលកំពុងមាន។ ត្រូវចាំថាមនុស្សយើងទោះជាកំពុងស្រលាញ់គ្នា ក៏នៅតែមានជម្រើសសម្រាប់ខ្លួនឯងរៀងៗខ្លួនដែរ ដូច្នេះត្រូវគិតពីជីវិតខ្លួនឯងសិនមុនពេលគិតដល់ជីវិតគូ»។

លោកវេជ្ជបណ្ឌិតចិត្តសាស្ត្រ ឈឹម សុធារ៉ា បាននិយាយថា វិបត្តិស្នេហា អាចធ្វើឲ្យមនុស្សលែងហ៊ានទទួលស្នេហាថ្មី មានជំងឺបាក់ទឹកចិត្ត ផ្លាស់ទៅស្រលាញ់មនុស្សភេទដូចគ្នា ឬទៅជាស្រលាញ់សត្វវិញម្ដង។ បើកាន់តែធ្ងន់ធ្ងរ វិបត្តិស្នេហាអាចធ្វើឲ្យមនុស្សហ៊ានសម្លាប់ខ្លួន ឬសម្លាប់មនុស្សដែលខ្លួនឯងស្រលាញ់ទៀតផង។ បើតាមលោក ឈឹម សុធារ៉ា វិធីព្យាបាល ឬកាត់បន្ថយការឈឺចាប់ដោយសារស្នេហាទាំងនេះ គឺមានតែការព្យាបាលតាមរយៈចិត្តសាស្ត្រ ឬពីអ្នកជំនាញផ្នែកចិត្តសាស្ត្រប៉ុណ្ណោះ ដើម្បីទប់ស្កាត់វិបត្តិស្នេហា កុំឲ្យឈានទៅកាន់ភាពធ្ងន់ធ្ងរ ៕