មហាយក្សចិនធ្វើសមយុទ្ធកងទ័ពអាកាសទ្រង់ទ្រាយធំនៅសមុទ្រចិនខាងត្បូង

អន្តរជាតិ

មហាយក្សចិនធ្វើសមយុទ្ធកងទ័ពអាកាសទ្រង់ទ្រាយធំនៅសមុទ្រចិនខាងត្បូង

25, Mar 2018 , 9:59 pm

រូបភាព

ដោយ: ថ្មីៗ

ចិនបានប្រកាសនាថ្ងៃអាទិត្យទី ២៥ ខែមីនានេះថាខ្លួនបានរៀបចំសមយុទ្ធយោធាទ្រង់ទ្រាយធំមួយដោយមានការចូលរួមដោយយន្តហោះទម្លាក់គ្រាប់បែក និងយន្តហោះចម្បាំងជាច្រើនគ្រឿងផងដែរនៅក្នុងតំបន់សមុទ្រចិនខាងត្បូង និងប៉ាស៊ីហ្វិកខាងលិច។

កងទ័ពអាកាសចិនបានរៀបចំលំហាត់យោធាដោយជោគជ័យនៅសមុទ្រចិនខាងត្បូង និងតំបន់ភាគលិចមហាសមុទ្រប៉ាស៊ីហ្វិក។ នេះជាបើតាមការអះអាងរបស់កងទ័ពអាកាសចិនក្នុងសេចក្តីប្រកាសព័ត៌មានរបស់ខ្លួនចេញផ្សាយនៅថ្ងៃអាទិត្យទី ២៥ មីនានេះ។

យោងតាមទីភ្នាក់ងារព័ត៌មាន AFP សេចក្តីប្រកាសព័ត៌មាននេះមិនបានបញ្ជាក់ច្បាស់ថា សមយុទ្ធយោធាថ្មីនេះត្រូវបានរៀបចំកាលពីថ្ងៃណាពិតប្រាកដឬនៅតំបន់ណាពិតប្រាកដក្នុងសមុទ្រចិនខាងត្បូងឡើយ គ្រាន់តែបញ្ជាក់ថា លំហាត់យោធានេះត្រូវបានរៀបចំរួចរាល់ និងជាការល្បាតត្រៀមខ្លួនសម្រាប់ធ្វើប្រយុទ្ធ។

ក្នុងលំហាត់យោធានេះ វាមានការចូលរួមពីយន្តហោះទម្លាក់គ្រាប់បែក H-6K និងយន្តហោះចម្បាំង Su-30 និង Su-35 ជាច្រើនគ្រឿងផងដែរ ហើយយន្តហោះនេះហោះហើរឆ្លងកាត់ជ្រោយ Miyako ស្ថិតនៅចន្លោះកោះរបស់ជប៉ុន។

តាមពិតទៅការរៀបចំសមយុទ្ធយោធានេះកើតឡើងក្នុងពេលដែលរដ្ឋាភិបាលលោក ស៊ី ជិនភីង បន្តធ្វើទំនើបកម្មយោធាចិនឲ្យមានកម្រិតខ្ពស់ដល់ស្តង់ដារពិភពលោកផង។ យ៉ាងណាមិញប្រទេសជិតខាងចិនជាពិសេសភាគីជម្លោះសមុទ្រចិនខាងត្បូងបានចាត់ទុកសកម្មភាពយោធារបស់ចិនជាការគំរាមកំហែង។

ប៉ុន្តែរដ្ឋាភិបាលចិនជានិច្ចជាកាលបានបញ្ជាក់ថាខ្លួនគ្មានចេតនាប្រឆាំងឬគំរាមកំហែងអ្នកណាមួយឡើយ។ ការរៀបចំសមយុទ្ធគឺដើម្បីពង្រឹងសមត្ថភាពកងទ័ព និងដើម្បីរក្សាសន្តិសុខ និងស្ថិរភាពតំបន់ប៉ុណ្ណោះ។

ដោយឡែកការប្រកាសពីលំហាត់យោធានេះគឺកើតឡើងក្រោយពេលដែលអាមេរិកបញ្ជូននាវាចម្បាំងរបស់ខ្លួនមួយគ្រឿងទៅក្បែរសមុទ្រចិនខាងត្បូងដើម្បីអនុវត្តសេរីភាពក្នុងការធ្វើនាវាចរណ៍កាលពីថ្ងៃសុក្រទី ២៤ ខែមីនា។ នាវាចម្បាំងអាមេរិកនោះធ្វើដំណើរចម្ងាយ ១២ ម៉ាល៍ពីកោះសិប្បនិម្មិតដែលចិនបានសាងសង់នៅក្នុងសមុទ្រចិនខាងត្បូង ហើយវត្តមាននាវាអាមេរិកនេះធ្វើឲ្យចិនខឹងក្តៅស្លឹកត្រចៀកខ្លាំងផងដែរ៕