វ៉ាន់យ៉ា៖ ពិការភាពមិនមែនជាឧបសគ្គសម្រាប់ខ្ញុំធ្វើការនៅសណ្ឋាគារឡើយ

ជាតិ

បទយកការណ៍ / បទសម្ភាសន៍

បទសម្ភាសន៍

វ៉ាន់យ៉ា៖ ពិការភាពមិនមែនជាឧបសគ្គសម្រាប់ខ្ញុំធ្វើការនៅសណ្ឋាគារឡើយ

15, Apr 2018 , 10:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ កញ្ញា ហេង វ៉ាន់យ៉ា អាយុ១៨ឆ្នាំ បានធ្លាក់ខ្លួនពិការដៃម្ខាង ដោយសារជំងឺមហារីកឆ្អឹង។ ជំងឺនេះបានយាយីកញ្ញាកាលពីកុមារ ហើយក្រុមគ្រូពេទ្យសម្រេចកាត់ប្រអប់ដៃនាង ដើម្បីទប់ស្កាត់ការរាតត្បាត នៃជំងឺដ៏សាហាវនេះ។ ទោះធ្លាក់ខ្លួនពិការយ៉ាងណាក្តី តែវាមិនមែនជាឧបសគ្គសម្រាប់ វ៉ាន់យ៉ា ធ្វើការនៅសណ្ឋាគារ ដែលជាក្តីស្រមៃរបស់នាងឡើយ។

មានស្រុកកំណើតនៅស្រុកគងពិសី ខេត្តកំពង់ស្ពឺ សព្វថ្ងៃ វ៉ាន់យ៉ា ជាបុគ្គលិកផ្នែកធនធានមនុស្ស នៃសណ្ឋាគារផ្កាយប្រាំ ក្នុងក្រុងសៀមរាប។ នាងមានតួនាទីរៀបចំថ្ងៃសម្រាកសម្រាប់បុគ្គលិក។ វ៉ាន់យ៉ា បានធ្វើការនេះក៏ដោយសារនាងមានសមត្ថភាព ក៏ដូចជាការផ្តល់ឱកាស និងលើកទឹកចិត្តឱ្យនាងខិតខំប្រឹងប្រែងតទៅមុខទៀត ពីខាងសណ្ឋាគារដែរ។

សូមអញ្ជើញទស្សនាបទសម្ភាស រវាងអ្នកស្រី អ៊ីសា រ៉ហានី អ្នកកាសែតនៃសារព័ត៌មានថ្មីៗ និងកញ្ញា ហេង វ៉ាន់យ៉ា ដូចតទៅ៖

វ៉ាន់យ៉ា រម្លឹកថា ក្រោយធ្លាក់ខ្លួនពិការ គ្រួសារនាងមានលើកទឹកចិត្តនាងឱ្យខំតស៊ូទៅមុខទៀត ដើម្បីអនាគតខ្លួនឯង។ ពាក្យទាំងនេះធ្វើឱ្យនាងខំប្រឹង និងឆ្លៀតរៀនភាសាបន្ថែម ក្រោយឈប់រៀននៅសាលារដ្ឋត្រឹមថ្នាក់ទី៨។

វ៉ាន់យ៉ា បានមករស់នៅជាមួយម្តាយមីងនៅខេត្តសៀមរាប នៅដើមឆ្នាំ២០១៧។ នាងក៏ត្រៀមរៀបការជាមួយជនជាតិប៊ែលហ្សិកផងដែរ ក្រោយស្គាល់គ្នា ពិសេសនោះ គឺខាងប្រុសបានកោតសរសើរពីភាពក្លាហានរបស់នាង និងតែងលើកទឹកចិត្តនាងជានិច្ច។ សម្រាប់អនាគត វ៉ាន់យ៉ា ចង់មានអាជីវកម្មខ្នាតតូចមួយសម្រាប់ខ្លួនឯង៕