អន្តរជាតិ
ដូណាល់ ត្រាំ បណ្តេញមន្ត្រីទូតរស្ស៊ី ៦០នាក់ និង បិទស្ថានកុងស៊ុលរុស្ស៊ីដើម្បីគាំទ្រអង់គ្លេស
× ដូចការរំពឹងទុកប្រធានាធិបតីអាមេរិកបានសម្រេចបណ្តេញមន្ត្រីទូតរុស្ស៊ី ៦០ នាក់ និងបញ្ជាឲ្យគេបិទស្ថានកុងស៊ុលរុស្ស៊ីប្រចាំនៅក្រុង Seattle ថែមទៀតផង។ ការសម្រេចធ្វើបែបនេះគឺដើម្បីបង្ហាញការគាំទ្រ និងសាមគ្គីភាពជាមួយអង់គ្លេសដែលកំពុងឈ្លោះជាមួយរុស្ស៊ីលើករណីបំពុលអតីតចារកម្មរុស្ស៊ីនោះ។
មន្ត្រីទូតរុស្ស៊ី ៦០ នាក់ទៀតហើយនឹងត្រូវវេចបង្វិចចាកចេញពីទឹកដីអាមេរិក តាមការទាមទាររបស់ប្រធានាធិបតីអាមេរិកលោក ដូណាល់ ត្រាំ។ ចំណែកស្ថានកុងស៊ុលនៅក្រុង Seattle ក៏ត្រូវប្រឈមមុខនឹងការបិទទ្វារផងដែរ។ នេះបើតាមការបញ្ជាក់របស់សេតវិមានអាមេរិកនៅថ្ងៃចន្ទទី ២៦ ខែមីនា។
ការទាមទារនេះធ្វើឡើងបន្ទាប់ពីមានការផ្សព្វផ្សាយថា លោក ត្រាំ កំពុងពិចារណាចាត់វិធានការប្រឆាំងរុស្ស៊ីដែលត្រូវគេចោទប្រកាន់រឿងវាយប្រហារ ប៉ុនប៉ងសម្លាប់អតីតចារកម្មរុស្ស៊ី Sergei Skripal និងកូនស្រី Yulia កាលពីថ្ងៃទី៤ ខែមីនាកន្លងទៅនៅចក្រភពអង់គ្លេស។
មន្ត្រីទូតរុស្ស៊ីទាំង ៦០នាក់ និងក្រុមគ្រួសារមានពេលវេលាប្រាំពីរថ្ងៃដើម្បីរៀបចំខ្លួនចាកចេញពីអាមេរិកផងដែរ។ ក្នុងចំណោមមន្ត្រីទូតទាំង ៦០នាក់នោះមាន ៤៨ នាក់ជាមន្ត្រីស្ថានទូតរុស្ស៊ី និង១២ នាក់ជាមន្ត្រីទូតរុស្ស៊ីប្រចាំបេសកកម្មរុស្ស៊ីអង្គការសហប្រជាជាតិនាទីក្រុងញូវយ៉ក។
មន្ត្រីអាមេរិកបានអះអាងថា ការបិទស្ថានកុងស៊ុលរុស្ស៊ីនៅក្រុង Seattle គឺដោយសារវាស្ថិតនៅជិតមូលដ្ឋានកងនាវាមុជទឹកអាមេរិក និងនៅក្បែរទីតាំងក្រុមហ៊ុនប៊ូអ៊ីងផង។ អាមេរិកផ្តល់ពេលឲ្យរុស្ស៊ីដល់ថ្ងៃ ២ ខែមេសាដើម្បីរៀបចំបិទទីតាំងនេះ។
បើតាមទីភ្នាក់ងារព័ត៌មាន Reuters មន្ត្រីអាមេរិកបានបញ្ជាក់ដូច្នេះ៖ «អាមេរិកចាត់វិធានការបែបនេះដោយឈរជាមួយសម្ព័ន្ធមិត្តណាតូរបស់យើង និងដៃគូនៅជុំវិញពិភពលោកដើម្បីឆ្លើយតបនឹងការប្រើប្រាស់អាវុធគីមីរបស់រុស្ស៊ីដែលជាការប្រើប្រាស់កម្លាំងយោធាលើដីអង់គ្លេស។ វាជាសកម្មភាពបង្កអសិ្ថរភាពចុងក្រោយរបស់រុស្ស៊ី»។
តបនឹងការបណ្តេញមន្ត្រីទូត ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក Anatoly Antonov បានហៅការសម្រេចចិត្តរបស់អាមេរិកនេះថាជារឿងខុសឆ្គង ហើយលោកគិតថា វានឹងប៉ះពាល់ខ្លាំងដល់ទំនាក់ទំនងរវាងអាមេរិក និងរុស្ស៊ីដែលត្រដាបត្រដួសស្រាប់នោះ។ យ៉ាងណាមិញរុស្ស៊ីក៏ត្រៀមសងសឹកវិញដែរ ដោយខ្លួនត្រៀមបណ្តេញមន្ត្រីទូតអាមេរិកយ៉ាងហោចណាស់ ៦០នាក់ ចេញពីប្រទេសខ្លួននៅពេលឆាប់ៗ។
យ៉ាងណាក៏ដោយចុះ ការសម្រេចចិត្តរបស់លោក ត្រាំ មិនមែនជារឿងចម្លែកទេ។ ការសម្រេចចិត្តនេះកើតក្រោយពេលដែលជម្លោះផ្ទៃក្នុងរវាងក្រសួងការបរទេស និងសេតវិមានកាន់តែក្តៅជុំវិញការដោះស្រាយជាមួយរុស្ស៊ី។ រឿងដែលគេចោទ ថា ក្រេមឡាំងមានចំណែកជួយឲ្យលោក ត្រាំ ជាប់ឆ្នោតមិនទាន់ទាំងចប់ផង លោក ត្រាំ នេះក៏ចេញមុខសាទរលោក វ្ល៉ាឌីមៀ ពូទីន ទៀតក្រោយលោកជាប់ឆ្នោតជាថ្មីកាលពីសប្តាហ៍មុននោះ៕
Tag:
រុស្ស៊ី
អាមេរិក
ដូណាល់ ត្រាំ
អង់គ្លេស
Sergei Skripal
© រក្សាសិទ្ធិដោយ thmeythmey.com