ហ្វីលីពីន បន្តល្បាតក្បែរតំបន់ជម្លោះសមុទ្រចិនខាងត្បូង បើទោះមានការតវ៉ាពីចិនក៏ដោយ

អន្តរជាតិ

ហ្វីលីពីន បន្តល្បាតក្បែរតំបន់ជម្លោះសមុទ្រចិនខាងត្បូង បើទោះមានការតវ៉ាពីចិនក៏ដោយ

28, Mar 2018 , 9:19 am

រូបភាព

រដ្ឋមន្ត្រីការពារជាតិហ្វីលីពីនលោក Delfin Lorenzana ។ រូបថត AFP

ដោយ:

រដ្ឋាភិបាលក្រុងម៉ានីល បានអះអាងជាថ្មី ពីការប្តេជ្ញាចិត្តក្នុងការបន្តសកម្មភាពល្បាតនៅក្នុងតំបន់ដែលខ្លួនចាត់ទុកថាក្នុងអធិបតេយ្យហ្វីលីពីននៅក្នុងដែនសមុទ្រចិនខាងត្បូង ។ ក្រុងម៉ានីលអះអាងបែបនេះ ដោយមិនមានការភ័យព្រួយពីការប្រតិកម្មពីសំណាក់ក្រុងប៉េកាំង ដែលជាដៃគូប្រជែងក្នុងដែនសមុទ្រចិនខាងត្បូងនោះឡើយ ។

នៅពេលដែលអ្នកសារព័ត៌មាន បានសាកសួរនាសន្និសីទសារព័ត៌មានថ្ងៃ២៦ មីនា ថាតើកងទ័ពហ្វីលីពីន នឹងបន្តសកម្មភាពល្បាតនៅក្នុងតំបន់ថ្មប៉ប្រះទឹក Scarborough Shoal នៃសមុទ្រចិនខាងត្បូង ឬយ៉ាងណា លោករដ្ឋមន្ត្រីការពារជាតិហ្វីលីពីន Delfin Lorenzana បានអះអាងថា ហ្វីលីពីន មិនបញ្ឈប់ឡើយ ។ នេះបើយោងតាមការចុះផ្សាយរបស់ភ្នាក់ងារសារព័ត៌មាន AP ។

តាមប្រភពព័ត៌មានដដែលនោះ លោករដ្ឋមន្ត្រី បានសង្កត់ធ្ងន់ថា ៖« ការហោះល្បាតក្បែរតំបន់ថ្មប៉ប្រះទឹក Scarborough Shoal នឹងបន្ត ដ្បិត តំបន់នោះ ស្ថិតនៅក្នុងតំបន់សេដ្ឋកិច្ចផ្តាច់មុខ (EEZ)របស់ហ្វីលីពីន ដែលត្រូវបានផ្តល់ និងទទួលស្គាល់តាមច្បាប់អន្តរជាតិ » ។

បើតាមការលើកឡើងរបស់មន្ត្រីជាន់ខ្ពស់ហ្វីលីពីន នាជំនួបកាលពីខែមុននៅក្នុងរដ្ឋធានីម៉ានីល ចិន បានសម្តែងការព្រួយបារម្ភពីការសកម្មភាពរបស់ហ្វីលីពីន នៅក្បែរតំបន់មានវិវាទអធិបតេយ្យ ។ ការព្រួយបារម្ភនោះដែរ ក៏រាប់បញ្ចូលទាំងការប្រើប្រាស់យន្តហោះល្បាតប្រភេទ TC-90 ដែលជប៉ុន បានឧបត្ថម្ភឲ្យហ្វីលីពីនដើម្បីប្រើប្រាស់បង្កើនសន្តិសុខប្រទេសផងដែរ ។

គួរជម្រាបផងដែរ ហ្វីលីពីន គឺជាភាគីមួយ នៃចំណោមបណ្តាភាគី នៃសមាជិកអាស៊ាន ដែលរួមមានព្រុយណេ ម៉ាឡេស៊ី និងវៀតណាមផងដែរនោះ ដែលមានវិវាទជាមួយនឹងចិនក្នុងការទាមទារលើតំបន់ត្រួតស៊ីគ្នានៅក្នុងសមុទ្រចិនខាងត្បូង ។ ចិន បានទាមទារស្ទើរតែតំបន់ទាំងស្រុងនៃតំបន់មានវិវាទ ដោយយោងតាមកត្តាប្រវត្តិសាស្ត្រ ខណៈរដ្ឋអាស៊ានទាមទារដោយអំណេះអំណាងផ្នែកច្បាប់ ។

តាមរយៈសន្និសីទសារព័ត៌មានដដែលនោះ ប្រមុខការពារជាតិហ្វីលីពីន ក៏បានលើកឡើងផងដែរថា បើទោះបីជា ទំនាក់ទំនងទ្វេភាគីរវាងហ្វីលីពីន និងចិន មានភាពល្អប្រសើរបន្តិចហើយក៏ដោយ ហ្វីលីពីន នៅតែមានការព្រួយបារម្ភបញ្ហានៃការប្រឈមមុខគ្នានៅក្នុងសមុទ្រចិនខាងត្បូងជាមួយនឹងចិនដដែល ៕