ជាតិ
IPU ជំរុញឲ្យរដ្ឋាភិបាលកម្ពុជា បើកផ្លូវនយោបាយឲ្យគណបក្សប្រឆាំង ស្របពេលរដ្ឋាភិបាលថា គ្មានផ្លូវ សមាជិកគណៈកម្មការសិទ្ធិមនុស្សនិងសភារបស់IPU
× ភ្នំពេញ៖ សហភាពអន្តរសភា (IPU) ជំរុញឲ្យរដ្ឋាភិបាលកម្ពុជា បើកផ្លូវនយោបាយឲ្យគណបក្សសង្គ្រោះជាតិ អាចមានសិទ្ធិធ្វើនយោបាយឡើយវិញ សម្រាប់ដំណើរការលទ្ធិប្រជាធិបតេយ្យនៅកម្ពុជា។ ប៉ុន្តែរដ្ឋាភិបាលកម្ពុជា ប្រកាសជំហរមិនចរចាជាមួយអតីតគណបក្សសង្គ្រោះជាតិឡើយ។
មិនមែនជាលើកទីមួយទេ ដែលសហភាពអន្តរសភា លើកយកបញ្ហានយោបាយកម្ពុជា ដាក់ចូលក្នុងកិច្ចប្រជុំ។ បញ្ហាផ្អាកសកម្មភាពនយោបាយមនុស្ស១១៨នាក់ និងការរំលាយអតីតគណបក្សប្រឆាំងនៅកម្ពុជា ត្រូវបានសហភាពអន្តរសភា ដាក់បញ្ចូលពិភាក្សារួមក្នុងករណីស្រដៀងគ្នាជាមួយប្រទេសចំនួន៧ទៀត ។
តាមរយៈការពិភាក្សាគ្នានោះ សហភាពអន្តរសភា បាននិយាយថា សកម្មភាពរបស់រដ្ឋាភិបាល បង្ហាញយ៉ាងច្បាស់ពីការរំលោភសិទ្ធិមនុស្សជាមូលដ្ឋានលើតំណាងរាស្ត្រអតីតគណបក្សសង្គ្រោះជាតិកន្លងមក។
សេចក្តីប្រកាសព័ត៌មានរបស់សហភាពអន្តរសភា (IPU) ដែលពិភាក្សាផ្តោតលើបញ្ហារំលោភបំពានសិទ្ធិមនុស្ស និងតំណាងរាស្ត្រសភា ក្នុងបណ្ដាប្រទេសជាសមាជិកខ្លួន កាលពីថ្ងៃទី២៨ មីនា បានបញ្ជាក់ដូច្នេះថា៖«យើងពិតជាសោកស្ដាយដែលពួកគេ(រដ្ឋាភិបាល) នៅតែប្រព្រឹត្តទង្វើរដដែលៗអស់រយៈពេលជាច្រើនឆ្នាំមកហើយ នៃការរំលោភបំពានទៅលើគណបក្សប្រឆាំង ដែលវាជាឯកសារមួយរបស់IPU កត់ត្រាទុកមុនការបោះឆ្នោតនៅកម្ពុជាជារៀងរាល់ឆ្នាំ តាំងពីអតីតកាលមក»។
បន្ថែមពីនេះសហភាពអន្តរសភា ជំរុញឲ្យរដ្ឋាភិបាលកម្ពុជា បើកផ្លូវនយោបាយឲ្យអតីតគណបក្សសង្គ្រោះជាតិ និងតំណាងរាស្ត្រ៥៥រូប អាចមានសិទ្ធិធ្វើនយោបាយឡើយវិញ។ ជាពិសេសការបើកច្រកចរចាជាមួយគណបក្សប្រឆាំងមួយនេះ សម្រាប់ដំណើរការលទ្ធិប្រជាធិបតេយ្យនៅកម្ពុជា។ ហើយសហភាពអន្តរសភា សន្យាជួយគាំទ្រការចរចានេះផងដែរ ប្រសិនជាមានតម្រូវការចាំបាច់ណាមួយ។
ជុំវិញបញ្ហានយោបាយនេះ អតីតប្រធានគណបក្សសង្គ្រោះជាតិ ធ្លាប់បានបង្ហាញបំណងចរចាជាមួយសម្ដេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ដើម្បីរកផ្លូវដោះស្រាយនយោបាយ ។ ប៉ុន្តែបំណងនេះត្រូវបានរាំងខ្ទប់ ដោយសារសារនយោបាយរបស់សម្ដេច ហ៊ុន សែន ដែលបានប្រកាសជំហរជាថ្មី កាលពីថ្ងៃទី២៧ មីនា ថា សម្ដេច មិនចរចាជាមួយអតីតមេបក្សប្រឆាំង និងលើកលែងទោសឲ្យអ្នកនយោបាយអតីតបក្សប្រឆាំងឡើយ។ ប្រមុខរដ្ឋាភិបាល ប្រកាសជំហរបែបនេះ ដោយសារសម្ដេច ខឹងនឹងមេដឹកនាំបក្សប្រឆាំង និងសកម្មជនបក្សនេះ ដែលនៅតែបញ្ចេញសកម្មភាពគឃ្លើន ក្នុងការរិះគន់មកលើរដ្ឋាភិបាល និងការដុតរូបសម្ដេច នៅលើទឹកដីអូស្ត្រាលី កាលពីពេលថ្មីៗនេះ។ទាំងនេះជាមូលហេតុដែលត្រូវបានសម្ដេច លើកឡើងនៅក្នុងពិធីចែកសញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប។
មកដល់ពេលនេះ បញ្ហានយោបាយហាក់ដូចជា នៅជាប់ទ្រឹង ដែលពិបាកវាស់ស្ទង់ពីដំណោះស្រាយនយោបាយរវាងមេដឹកនាំគណបក្សកាន់អំណាច និងមេដឹកនាំអតីតគណបក្សសង្គ្រោះជាតិ។ សម្រាប់អ្នកតាមដានស្ថានការណ៍នយោបាយវិញ នៅជឿជាក់ថា ដំណោះស្រាយនយោបាយ នៅតែអាចកើតមានក្នុងរូបភាពសម្បទាននយោបាយណាមួយ តាមរយៈវប្បធម៌សន្ទនា នាពេលខាងមុខ៕
Tag:
IPU
ហ៊ុន សែន
សម រង្ស៊ី
CNRP
© រក្សាសិទ្ធិដោយ thmeythmey.com