អន្តរជាតិ
លោក ត្រាំ ដកតំណែងរដ្ឋមន្ត្រីម្នាក់ទៀត ហើយដាក់គ្រូពេទ្យផ្ទាល់ខ្លួនជំនួសវិញ ឧត្តមនាវីទោ Ronny Jackson (ឆ្វេង) ដែលត្រូវជំនួសតំណែងរដ្ឋមន្រ្តីកិច្ចការអតីតយុទ្ធជនពីលោក David Shulkin (ស្ដាំ) (រូបភាព៖ AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃទី២៨ ខែមីនា បានបណ្ដេញលោក David Shulkin ចេញពីតំណែងរដ្ឋមន្ត្រីកិច្ចការអតីតយុទ្ធជន ក្រោយពីលោក Shulkin ជួបរឿងអាស្រូវប្រើប្រាស់ថវិកាក្រសួងខុសគោលដៅ។ លោក Shulkin គឺជាសមាជិកគណៈរដ្ឋមន្ត្រីទីពីររបស់លោក ត្រាំ ដែលត្រូវអស់តំណែងក្នុងខែមីនានេះ បន្ទាប់ពីលោក រិច ធីល័រសិន អស់តំណែងរដ្ឋមន្ត្រីការបរទេសរួចមក។ គ្រូពេទ្យប្រចាំសេតវិមានលោក Ronny Jackson គឺជាបេក្ខភាពជំនួសតំណែងលោក Shulkin ។
លោក David Shulkin ក្លាយជារដ្ឋមន្ត្រីចុងក្រោយគេដែលត្រូវចាកចេញពីរដ្ឋាភិបាលប្រធានាធិបតី ដូណាល់ ត្រាំ ។ នៅថ្ងៃទី២៨ ខែមីនា លោក ត្រាំ បានដកតំណែងលោក Shulkin ពីរដ្ឋមន្ត្រីកិច្ចការអតីតយុទ្ធជន និងដាក់ជំនួសដោយគ្រូពេទ្យផ្ទាល់ខ្លួន គឺលោកឧត្តមនាវីទោ Ronny Jackson ។ ការបញ្ចប់តំណែងលោក Shulkin ជាការរុះរើសមាជិករដ្ឋាភិបាលដ៏ធំរបស់លោក ត្រាំ ដែលក្នុងនោះមន្ត្រីសំខាន់ៗជាច្រើនត្រូវបានបណ្ដេញចេញ ឬលាលែងពីតំណែងខ្លួនឯង។
ដើមហេតុនៃការអស់តំណែងរបស់លោក Shulkin គឺបណ្ដាលមកពីការប្រើប្រាស់ថវិកាក្រសួងខុសគោលដៅ។ ការស៊ើបអង្កេតផ្ទៃក្នុងក្រសួងរកឃើញថា ក្នុងទស្សនកិច្ចទៅកាន់អង់គ្លេស និងដាណឺម៉ាក លោក Shulkin បានទទួលសំបុត្រចូលទស្សនាការប្រកួតកីឡាវាយកូនបាល់ដោយមិនត្រឹមត្រូវ។ លើសពីនោះ មន្ត្រីរបស់លោកបានផ្ដល់ព័ត៌មានមិនពិតដើម្បីឲ្យប្រពន្ធលោកប្រើប្រាស់លុយរដ្ឋដើម្បីចំណាយក្នុងការធ្វើដំណើរទៀតផង។
លោក ត្រាំ បានប្រកាសពីការជ្រើសរើសលោក Jackson តាមបណ្ដាញសង្គម Twitter របស់លោក ហើយលោកក៏បានលើកសរសើរសមត្ថភាពរបស់អនាគតរដ្ឋមន្ត្រីថ្មីរូបនេះដែរ។ បើតាមទីភ្នាក់ងារព័ត៌មាន Xinhua លោក Jackson ជាគ្រូពេទ្យនៅសេតវិមានក្រោមការដឹកនាំរបស់ប្រធានាធិបតីជាច្រើននាក់។ ក្រោយការជ្រើសរើសរបស់លោក ត្រាំ បេក្ខភាពជារដ្ឋមន្ត្រីអតីតយុទ្ធជនរបស់លោក Jackson ត្រូវព្រឹទ្ធសភាយល់ព្រមសិន ទើបអាចបំពេញការងារបាន។
លោក Jackson បានទាក់ទាញចំណាប់អារម្មណ៍សាធារណៈកាលពីដើមឆ្នាំ ពេលលោកបង្ហាញមុខជម្រះមន្ទិលជុំវិញសុខភាពលោក ត្រាំ ។ វេជ្ជបណ្ឌិតរូបនេះហើយ ដែលចេញមកអះអាងថា លោក ត្រាំ មានសុខភាពផ្លូវចិត្តល្អប្រសើរ ខណៈរងការសង្ស័យថា មានបញ្ហាសតិអារម្មណ៍នោះ។ លោក Jackson បញ្ជាក់ថា លោក ត្រាំ ដែលមានអាយុ៧១ឆ្នាំនោះ មានហ្សែនអស្ចារ្យ ដែលអនុញ្ញាតឲ្យលោកមានសុខភាពល្អ។
រយៈពេលពីរខែចុងក្រោយនេះ មន្ត្រីជាន់ខ្ពស់សេតវិមាន និងគណៈរដ្ឋមន្ត្រីលោក ត្រាំ ត្រូវបានបណ្ដេញចេញ ឬលាលែងពីតំណែងមុនត្រូវបញ្ចប់តំណែង។ ការបញ្ចប់តំណែងដ៏ភ្ញាក់ផ្អើលបំផុត គឺការដកលោក រិច ធីល័រសិន ពីតំណែងរដ្ឋមន្ត្រីការបរទេស និងជំនួសដោយប្រមុខ CIA លោក Mike Pompeo ។ មិនបានប៉ុន្មានផង លោក ត្រាំ ដកតំណែទីប្រឹក្សាសន្តិសុខរបស់លោក HR McMaster ទៀត និងជំនួសដោយលោក John Bolton ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com