អ្នកប្រឹក្សាទេសចរណ៍ ទទូចឲ្យរដ្ឋាភិបាលមីយ៉ាន់ម៉ាបញ្ឈប់កម្មករចិនដែលបន្លំជាភ្ញៀវទេសចរ

អន្តរជាតិ

អ្នកប្រឹក្សាទេសចរណ៍ ទទូចឲ្យរដ្ឋាភិបាលមីយ៉ាន់ម៉ាបញ្ឈប់កម្មករចិនដែលបន្លំជាភ្ញៀវទេសចរ

30, Mar 2018 , 8:59 am

រូបភាព

ដោយ:

អ្នកប្រឹក្សាក្រសួងទេសចរណ៍ និងសណ្ឋាគារមីយ៉ាន់ម៉ា បានទទូចឲ្យរដ្ឋាភិបាលរបស់ខ្លួនបញ្ឈប់ការអនុញ្ញាតឲ្យភ្ញៀវទេសចរជនជាតិចិនចូលទៅក្នុងប្រទេសខ្លួន តាមរយៈមធ្យោបាយធ្វើដំណើររបស់ពួកគេ ។ អ្នកប្រឹក្សាបានមើលឃើញថា កន្លងមក ពួកគេ មិនមែនជាភ្ញៀវទេសចរសុទ្ធសាធឡើយ ពោលគឺមួយចំនួន នៃមួយពួកគេ បានបន្លំខ្លួនដើម្បីចូលទៅធ្វើការនៅតាមតំបន់សំណង់ និងរ៉ែនោះទេ ។

លោក Khin Zaw អ្នកប្រឹក្សាជាន់ខ្ពស់របស់មីយ៉ាន់ម៉ា បានអះអាងថា មានកម្មករជនជាតិចិនជាច្រើន បានចូលមកកាន់មីយ៉ាន់ម៉ាក្នុងនាមជាភ្ញៀវទេសចរតាមរយៈព្រំដែន ក៏ប៉ុន្តែតាមពិតពួកគេ ចូលមកដើម្បី ស្វែងរកការងារសំណង់ និងការងារតាមតំបន់រ៉ែនោះទេ ។ លោក បន្ថែមថា អ្នកខ្លះចុងក្រោយក្លាយជាឈ្មួញនៅក្នុងប្រទេសមីយ៉ាន់ម៉ាទៀតផង ។

តាមការចុះផ្សាយរបស់សារព័ត៌មានមីយ៉ាន់ម៉ា The Myanmar Times លោកអ្នកប្រឹក្សា បានលើកឡើងយ៉ាងដូច្នេះ ៖« ខ្ញុំ សូមផ្តល់យោបល់ដល់រដ្ឋាភិបាល ដោយមិនគួរអនុញ្ញាតឲ្យភ្ញៀវទេសចរដែលឆ្លងកាត់តាមព្រំដែនចិន-មីយ៉ាន់ម៉ាចូលក្នុងប្រទេស ដោយគ្មានច្បាប់ទម្លាប់នោះទេ ព្រោះយើង មិនអាចគ្រប់គ្រងពួកគេ ទាំងអស់នោះបានឡើយ» ។

តាមប្រភពព័ត៌មានដដែលនោះ អ្នកប្រឹក្សា លើកឡើងយ៉ាងដូច្នេះហើយ ក៏បានបន្តទៀតថា៖« ប្រសិនបើ រដ្ឋាភិបាលមិនមែនវិធានតឹងរឹងក្នុងការធានា និងបញ្ជាក់ ថាពួកគេ (ជនជាតិចិន) ជាភ្ញៀវទេសចរនោះទេ មីយ៉ាន់ម៉ា នឹងត្រូវបាត់បង់ធនធានធម្មជាតិហើយ » ។

សម្រាប់អ្នកប្រឹក្សារូបនេះ បានមើលឃើញថា កញ្ចប់ទេសចរណ៍របស់ជនជាតិចិនតាមរយៈយន្តហោះ មានការទទួលខុសត្រូវច្រើនជាងអ្នកធ្វើដំណើរជនជាតិចិន តាមរយៈព្រំដែន ។ លោកសង្កត់ធ្ងន់ថា៖« វា មានគុណវិបត្តិច្រើនជាង គុណសម្បត្តិ ក្នុងការស្វាគមន៍ភ្ញៀវទេសចរចិនតាមព្រំដែន» ៕