អន្តរជាតិ
រុស្ស៊ីបណ្ដេញមន្ត្រីទូតអាមេរិក៦០នាក់ចេញពីប្រទេស ឯប្រទេសផ្សេងទៀតក៏មិនរួចខ្លួនដែរ រដ្ឋមន្រ្តីការបរទេសរុស្ស៊ី Sergei Lavrov (រូបភាព AFP)
× សំណុំរឿងបំពុលអតីតចារកម្មរុស្ស៊ីនៅអង់គ្លេស កំពុងធ្វើឲ្យអាមេរិក និងរុស្ស៊ីប្រឈមមុខបញ្ហាការទូតនឹងគ្នា។ នៅដើមសប្ដាហ៍នេះ អាមេរិកបានបណ្ដេញមន្ត្រីការទូតរុស្ស៊ីចំនួន៦០នាក់ចេញពីទឹកដីរបស់ខ្លួន។ ជាការសងសឹក នៅថ្ងៃទី២៩ ខែមីនា រុស្ស៊ីក៏បានសម្រេចចិត្តបណ្ដេញមន្ត្រីការទូតអាមេរិកចំនួន៦០នាក់ចេញពីប្រទេសវិញ។ ចំណែកឯប្រទេសផ្សេងទៀតដែលបណ្ដេញមន្ត្រីទូតរុស្ស៊ីនោះ ក៏ត្រូវរងទទួលចំណាត់ការដូចគ្នាដែរ។
ស្របពេលទំនាក់ទំនងទ្វេភាគីកំពុងដុនដាបស្រាប់ រុស្ស៊ី និងអាមេរិកបែរជាឈ្លោះគ្នាដោយសារបញ្ហាមួយទៀត។ ករណីបំពុលអតីតចារកម្មរុស្ស៊ីធ្វើការឲ្យអង់គ្លេស Sergei Skripal នៅភាគខាងត្បូងអង់គ្លេសកាលពីដើមខែមីនានេះ ធ្វើឲ្យរុស្ស៊ី និងអាមេរិកចាត់វិធានការសងសឹកគ្នាទៅមក។ ក្នុងសប្ដាហ៍នេះ ភាគីទាំងសងខាងបានបណ្ដេញមន្ត្រីការទូតរៀងៗខ្លួន ទោះជាមិនទាន់ភស្តុតាងជាក់លាក់លើការប៉ុនប៉ងសម្លាប់លោក Skripal និងកូនស្រីក្ដី។
កាលពីដើមសប្ដាហ៍ អាមេរិកបានបណ្ដេញមន្ត្រីការទូតរុស្ស៊ីចំនួន៦០នាក់ដែលក្នុងនោះចំនួន៤៨នាក់ជាមន្ត្រីនៃស្ថានបេសកកម្មរុស្ស៊ី និង១២នាក់ទៀតជាមន្ត្រីតំណាងរុស្ស៊ីប្រចាំអង្គការសហប្រជាជាតិ។ ក្រុងវ៉ាស៊ីនតោនអះអាងថា ខ្លួនមិនត្រូវការភស្តុតាងអ្វីដើម្បីបញ្ហាញកំហុសរបស់ក្រុងមូស្គូឡើយ ហើយជឿជាក់លើសម្ដីរបស់ក្រុងឡុងដ៍ទាំងស្រុង ដ្បិតមូស្គូមានបណ្ដាញច្រើនដែលអាចធ្វើសកម្មភាពបានគ្រប់កន្លែង។
ឆ្លើយតបនឹងទង្វើរបស់អាមេរិក រុស្ស៊ីបានសម្រេចចិត្តបណ្ដេញមន្ត្រីការទូតអាមេរិកចំនួន៦០នាក់ដូចគ្នា។ បើតាមទីភ្នាក់ងារព័ត៌មាន Xinhua ក្រសួងការបរទេសរុស្ស៊ីបានប្រកាសចាត់ទុកមន្ត្រីស្ថានទូតអាមេរិកប្រចាំក្រុងមូស្គូចំនួន៥៨នាក់ និងមន្ត្រីកុងស៊ុលអាមេរិកនៅទីក្រុង Yekaterinburg ចំនួន ជា «មនុស្សមិនត្រូវបានស្វាគមន៍» ព្រមទាំងបញ្ជាឲ្យពួកគេចាកពីទឹកដីរុស្ស៊ីត្រឹមថ្ងៃទី៥ ខែមេសា។ ឯស្ថានកុងស៊ុលអាមេរិកប្រចាំទីក្រុង St. Petersburg ក៏ត្រូវបានបិទនៅថ្ងៃទី៣១ ខែមីនាដែរ។
រដ្ឋមន្ត្រីការបរទេសរុស្ស៊ី Sergei Lavrov និយាយថា ក្រសួងការបរទេសរុស្ស៊ីក៏បានហៅអគ្គរដ្ឋទូតអាមេរិក Jon Huntsman ដើម្បីប្រាប់ពីចំណាត់ការនេះ និងតវ៉ាប្រឆាំងការបណ្ដេញអ្នកការទូតរុស្ស៊ីកន្លងមក។ ដោយចោទថាអាមេរិកកំពុងលើកទឹកចិត្តឲ្យមានយុទ្ធនាការប្រឆាំងខ្លួន រុស្ស៊ីបានទាមទារឲ្យអាមេរិកគិតគូរម្ដងទៀត និងត្រូវឈប់ធ្វើសកម្មភាពមិនប្រយ័ត្នប្រយែងដែលធ្វើឲ្យទំនាក់ទំនងទ្វេភាគីល្អក់កករ។
រុស្ស៊ី៖ ក្រៅពីអាមេរិក ប្រទេសផ្សេងទៀតក៏មិនរួចខ្លួនដែរ
ក្រោយហេតុការវាយប្រហារដោយសារធាតុគីមីលើលោក Skripal និងកូនស្រីនៅ Salisbury រដ្ឋាភិបាលក្រុងឡុងដ៍បានចេញមុខបណ្ដេញមន្ត្រីរុស្ស៊ីមុនគេ គឺចំនួន២៣នាក់ ដែលសង្ស័យថា ជាមន្ត្រីចារកម្ម។ បន្ទាប់មកទៀត ប្រទេសច្រើនជាង២០ ដែលភាគច្រើនជាសម្ព័ន្ធមិត្តជិតស្និទ្ធរបស់អង់គ្លេស រួមនិងអង្គការណាតូផងនោះ ក៏បានបណ្ដេញអ្នកការទូតរុស្ស៊ីជាបន្តបន្ទាប់ ដែលធ្វើឲ្យមន្ត្រីរុស្ស៊ីត្រូវត្រឡប់ទៅស្រុកវិញមានច្រើនជាង១៣០នាក់។
ជុំវិញបញ្ហា រុស្ស៊ីរំពឹងថា នឹងចាត់វិធានការប្រឆាំងប្រទេសដែលបណ្ដេញមន្ត្រីការទូតរបស់ខ្លួន ដោយឈរលើគោលការណ៍ដូចគ្នា។ ពោល គឺបើប្រទេសណាបណ្ដេញមន្ត្រីរុស្ស៊ីប៉ុនណា រុស្ស៊ីក៏បណ្ដេញប៉ុណ្ណោះដែរ ហើយប្រទេសណាចាត់វិធានការអ្វីផ្សេង រុស្ស៊ីក៏ត្រៀមធ្វើសកម្មភាពដូចគ្នាដែរ។ ក្នុងសន្និសីទកាសែតនៅថ្ងៃទី២៩ ខែមីនា រដ្ឋមន្ត្រីការបរទេសរុស្ស៊ី Sergei Lavrov បញ្ជាក់ថា ចំណាត់ការនេះប្រៀបដូចជាកញ្ចក់ដែរ តែមិនមែននៅត្រឹមនោះឡើយ។
បញ្ហាមិនចប់ត្រឹមការបណ្ដេញមន្ត្រីទូតឡើយ
ការបណ្ដេញមន្ត្រីការទូតទៅមក ជាការសងសឹកដំបូងប៉ុណ្ណោះ ដ្បិតទាំងរុស្ស៊ី ទាំងអាមេរិក សុទ្ធតែប្រកាន់ជំហរត្រៀមចាត់វិធានការជាច្រើនទៀត។ សម្រាប់ករណីលោក Skripal អាមេរិក អង់គ្លេស និងសម្ព័ន្ធបស្ចិមលោក ជាអ្នកវាយរុស្ស៊ីមុន រួចទើបរុស្ស៊ីតដៃតាមក្រោយ។ បន្ទាប់ពីនេះ ទំនងជាដល់វេនក្រុមប្រទេសលោកខាងលិចទាំងនោះវាយរុស្ស៊ីជាថ្មីម្ដងទៀត ន្អាលនឹងរុស្ស៊ីតបតតាមក្រោយ។
ក្រោយបណ្ដេញមន្ត្រីស្ថានទូតរុស្ស៊ី អាមេរិកដឹងស្រេចមុនហើយថា រុស្ស៊ីប្រាកដជាមានចំណាត់ការតបតវិញមិនខាន។ ក្រសួងការបរទេសអាមេរិកលើកឡើងថា ខ្លួនមានសិទ្ធិតបតបចំពោះទង្វើដែលគ្មានការស្ដាយក្រោយរបស់រុស្ស៊ី។ ការលើកឡើងរបស់អាមេរិក ជាសញ្ញាបង្ហាញថា ជម្លោះការទូតជុំវិញការប៉ុនប៉ងសម្លាប់លោក Skripal នឹងកាន់តែតានតឹងខ្លាំង ដ្បិតរុស្ស៊ីច្បាស់ជាមិនស្ងៀមឲ្យអាមេរិក និងសម្ព័ន្ធមិត្តជាន់កងាយៗឡើយ៕
Tag:
រុស្ស៊ី
អាមេរិក
Sergei Skripal
© រក្សាសិទ្ធិដោយ thmeythmey.com