ជាតិ
ស្ត្រីថៃម្នាក់ត្រូវឃាត់ខ្លួននៅអាកាសយានដ្ឋានអន្តរជាតិពាក់ព័ន្ធនឹងគ្រឿងញៀន រូបពី ស្នងការនគរបាលខេត្តសៀមរាប។
× សៀមរាប៖ ស្ត្រីជនជាតិថៃម្នាក់ ត្រូវបានឃាត់ខ្លួននៅព្រលានយន្តហោះអន្តរជាតិខេត្តសៀមរាប ជាមួយនឹងកញ្ចប់ថ្នាំញៀនដែលមានទម្ងន់ជិត ២គីឡូក្រាម។
លោកឧត្តមសេនីយ៍ត្រី អ៊ុំ អមរា ស្នងការរងទទួលបន្ទុកផែនការបង្ក្រាបគ្រឿងញៀន បានប្រាប់សារព័ត៌មានថ្មីៗនៅរសៀលថ្ងៃទី៣០ ខែមីនាថា ប្រតិបត្តិការនេះធ្វើឡើងតាមការស៊ើបអង្កេតរបស់ក្រុមជំនាញ ដែលរកឃើញជនជាតិថៃម្នាក់ឈ្មោះ NOYSIM ភេទស្រី អាយុ២៣ ឆ្នាំ ជាមួយកញ្ចប់ថ្នាំញៀនប្រភេទម្សៅកូកាអ៉ីនទម្ងន់ ១,៦៩២ក្រាម នៅព្រលានយន្តហោះអន្តរជាតិខេត្តសៀមរាប។
លោកបន្ថែមថា ប្រតិបត្តិការនេះធ្វើឡើងនៅព្រឹកថ្ងៃទី២៩ វេលាម៉ោង ១០និង៤៥នាទី ក្រោមការដឹកនាំរបស់លោកឧត្តមសេនីយ៍ឯក ម៉ក់ ជីតូ អគ្គស្នងការរងនគរបាលជាតិ អភិបាលខេត្តសៀមរាប លោក ឃឹម ប៊ុនសុង និងលោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្តសៀមរាប ។ តាមការបញ្ជាក់របស់លោកឧត្តមសេនីយ៍ត្រី អ៊ុំ អមរា បច្ចុប្បន្នជនសង្ស័យត្រូវបានបញ្ជូនទៅដល់ដៃតុលាការហើយ និងរង់ចាំការជំនុំជំរះ៕
Tag:
អ៊ុំ អមរា
គ្រឿងញៀន
ថៃ
© រក្សាសិទ្ធិដោយ thmeythmey.com