ក្រសួងព័ត៌មាន ហាមចាក់ផ្សាយបទ«រាំស្កុប» នៅតាមស្ថានីយ៍ទូរទស្សន៍ និងអនឡាញ

ជាតិ

សង្គមជាតិ

ក្រសួងព័ត៌មាន ហាមចាក់ផ្សាយបទ«រាំស្កុប» នៅតាមស្ថានីយ៍ទូរទស្សន៍ និងអនឡាញ

31, Mar 2018 , 8:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ក្រសួងព័ត៌មាន ហាមស្ថានីយ៍ទូរទស្សន៍ និងទូរទស្សន៍អនឡាញ ចាក់ផ្សាយបទបម្រៀង«រាំស្កុប» របស់ផលិតកម្មសាន់ដេ ក្រោមហេតុផលថា បទចម្រៀងនេះ បង្កការប៉ះពាល់ដល់កិត្តិយសមន្ទីពេទ្យកាល់ម៉ែត្រ។

បទចម្រៀង«រាំស្កុប» នេះ ច្រៀងនិងសម្ដែងដោយកញ្ញា យូរី និងលោក Bmo ដែលចង់បង្ហាញពីអត្ថន័យរបៀបរាំយឺតៗ និងមានសកម្មភាពរាំឈប់ៗ បែបសម័យថ្មី។ អត្ថន័យបទចម្រៀង និងស្ទីលរាំបែបនេះ មិនមែនជាបញ្ហាចោទនោះទេ។ ប៉ុន្តែអ្វីដែលក្រសួងព័ត៌មាន យល់ថា ខុសឆ្គងនោះ គឺបទចម្រៀងមួយនេះ បានប្រើប្រាស់ស្លាកសញ្ញា(LOGO) របស់មន្ទីពេទ្យកាល់ម៉ែត្រ នៅលើឯកសណ្ឋានរបស់ពួកគេ។

លិខិតក្រសួងព័ត៌មាន ចុះថ្ងៃទី៣០ មីនា បានបញ្ជាក់ដូច្នេះថា៖«ក្រុមហ៊ុន សាន់ដេ វីដេអូ បានផលិតបទចម្រៀងមានចំណងជើងថា រាំស្កុប ដែលក្នុងឈុតសម្ដែងបទចម្រៀងនេះ បានប្រើប្រាស់ឯកសណ្ឋានដែលមានស្លាកសញ្ញា របស់មន្ទីពេទ្យកាល់ម៉ែត្រ ដោយពុំមានការអនុញ្ញាតពីមន្ទីពេទ្យកាល់ម៉ែត្រ ធ្វើឲ្យប៉ះពាល់ដល់សេចក្តីថ្លៃថ្នូររបស់មន្ទីពេទ្យ និងទឹកចិត្តក្នុងការបំពេញការងារវិជ្ជាជីវៈរបស់បុគ្គលិកមន្ទីពេទ្យទាំងមូល»។

ដោយសារបញ្ហានេះ ក្រសួងព័ត៌មាន តម្រូវឲ្យស្ថានីយ៍ទូរទស្សន៍ និងទូរទស្សន៍អនឡាញ បញ្ឈប់ការចាក់ផ្សាយបទបម្រៀង«រាំស្កុប» របស់ផលិតកម្មសាន់ដេនេះ៕