អន្តរជាតិ
នយោបាយអន្តរជាតិ
ទាហានរដ្ឋាភិបាលស៊ីរីសន្យាបោសសម្អាតសំបុកក្រុមឧទ្ទាមចុងក្រោយ ខណៈអាមេរិកឈប់ដៃ
× ទាហានរដ្ឋាភិបាលស៊ីរីសន្យាបោសម្អាតសំបុកក្រុមឧទ្ទាមចុងក្រោយដែលនៅក្រៅរដ្ឋធានីដាម៉ាស។ ការប្រកាសនេះកើតឡើងក្រោយពេលដែលកងកម្លាំងរដ្ឋាភិបាលបន្តប្រយុទ្ធ និងដណ្តើមបានមួយភាគធំនៃតំបន់ភាគខាងកើតGhouta មកកាន់កាប់វិញ ហើយការប្រកាសនេះក៏កើតក្រោយពេលដែលអាមេរិកសន្យាដកខ្លួនចេញពីស៊ីរីដូចគ្នា។
ដោយកាន់តែមានប្រៀបខ្លាំងក្នុងសង្គ្រាម ក្រសួងការពារជាតិស៊ីរីបានប្រកាសនៅថ្ងៃសៅរ៍ទី ៣១ ខែមីនាថា ខ្លួននឹងបន្តប្រយុទ្ធដើម្បីបោសសម្អាតក្រុមឧទ្ទាមប្រឆាំងរដ្ឋាភិបាលនៅភាគខាងកើតក្រុង Ghouta ឲ្យអស់ក្នុងពេលឆាប់ៗនេះ។
ទីភ្នាក់ងារព័ត៌មាន AFP កងកម្លាំងស៊ីរីដែលមានរុស្ស៊ីជាខ្នងបង្អែកនេះបានយកឈ្នះសមរភូមិប្រយុទ្ធនេះដោយការប្រើប្រាស់កម្លាំងថ្មើជើង និងការទម្លាក់គ្រាប់បែកស្រោចលើទីតាំងសត្រូវ។ ក្រៅពីនេះ វាក៏មានកិច្ចព្រមព្រៀងជម្លៀសមនុស្សចេញពីតំបន់ប្រយុទ្ធនេះដូចគ្នា។
យ៉ាងណាក៏ដោយ ក្រុង Douma នៅតែជាសមរភូមិសំខាន់ចុងក្រោយព្រោះកងកម្លាំងដែលកាន់កាប់តំបន់នេះបានបដិសេធចាកចេញ ទោះមានកិច្ចព្រមព្រៀងជម្លៀសចេញដែលរុស្ស៊ីជួយបង្កើតឡើយក៏ដោយ។
ប៉ុន្តែទាហានស៊ីរីបានសន្យាហើយថា ខ្លួននឹងបន្តប្រើប្រាស់កម្លាំងទ័ពដើម្បីដណ្តើមយកក្រុង Douma ចេញពីកណ្តាប់ដៃភេរវជន។ បើតាមស្ថាប័នឃ្លាំមើលសិទ្ធិមនុស្សស៊ីរី កម្លាំងរដ្ឋាភិបាលដោយមានរុស្ស៊ីជាខ្នងបង្អែកនោះបានដណ្តើមយកទឹកដីប្រហែល ៩៥ភាគរយពីក្រុមឧទ្ទាមហើយនៅ Ghouta បើគិតដល់ត្រឹមថ្ងៃសៅរ៍ទី ៣១ ខែមីនា។
ការប្រើប្រាស់កម្លាំងប្រឆាំងក្រុមឧទ្ទាមពីសំណាក់រដ្ឋាភិបាលបានបណ្តាលឲ្យមនុស្សយ៉ាងហោចណាស់ ១៦០០នាក់ស្លាប់ បើរាប់ចាប់ពីថ្ងៃ ១៨ ខែកុម្ភៈមកនោះ ហើយមនុស្សរាប់ម៉ឺននាក់ផ្សេងទៀតរត់គេចពីការប្រយុទ្ធគ្នា។ ចំណែកក្រុមឧទ្ទាមជាច្រើនជ្រើសរើសការដាក់អាវុធ ហើយចាកចេញពីតំបន់ ខណៈដែលក្រុមឧទ្ទាម Jaish al-Islam នៅមិនទាន់សម្រេចចិត្តនៅឡើយទេ ហើយគេកំពុងចរចា ដោយមានរុស្ស៊ីជាអ្នកសម្របសម្រួល។ បើតាមការបង្ហើបពីមន្ត្រីយោធារុស្ស៊ី ក្រុមនេះចង់ស្នើសុំការលើកលែងទោស និងមានការផ្តល់សិទ្ធិសេរីភាពដើរហើរពេញលេញសម្រាប់ប្រជាជន Douma។
តាមពិតទៅ ការប្រកាសពីជោគជ័យក្នុងការដណ្តើមយកទីក្រុង Ghouta មកកាន់កាប់វិញនោះ ក៏កើតឡើងក្រោយពេលដែលប្រធានាធិបតីអាមេរិក ដូណាល់ ត្រាំ ចេញមុខអះអាងថា អាមេរិកនឹងដកខ្លួនចេញពីស៊ីរីឆាប់ៗនេះ ដោយទុកឲ្យប្រទេសផ្សេងទៀតទទួលខុសត្រូវចុះ។ ចាប់ពីពេលដែលសង្គ្រាមស៊ីរីផ្ទុះឡើងនៅឆ្នាំ ២០១២ នោះ អាមេរិកមានតួនាទីស្នូលជួយគាំទ្រក្រុមឧទ្ទាមប្រឆាំងរដ្ឋាភិបាលទាំងហិរញ្ញវត្ថុ និងសព្វាវុធ៕
Tag:
ស៊ីរី
អាមេរិក
រុស្ស៊ី
Ghouta
Douma
© រក្សាសិទ្ធិដោយ thmeythmey.com