ជាតិ
សង្គមជាតិ
លោកសាស្ត្រាចារ្យ អ៉ីស៉ីសាវ៉ា៖ ខ្ញុំស្រឡាញ់ស្រុកខ្មែរ ស្រុកខែ្មរល្អណាស់សម្រាប់ខ្ញុំ
× សៀមរាប៖ លោកសាស្ត្រាចារ្យ យ៉ូស៉ីអាគី អ៉ីស៉ីសាវ៉ា គឺជាជនជាតិជប៉ុនដែលបានចំណាយពេលជាងកន្លះស.វ ក្នុងការជួយការងារអភិរក្ស និងជួសជុលប្រាសាទបុរាណខ្មែរ។ ឆ្នាំនេះ លោកសាស្ត្រាចារ្យមានវ័យ៨០ឆ្នាំហើយ ហើយបាននិងកំពុងបន្តសកម្មភាពយ៉ាងមមាញឹករបស់ខ្លួន ក្នុងការងារបណ្តុះបណ្តាល និងអភិរក្សសិល្បៈវប្បធម៌ខ្មែរ។ ក្នុងផ្គត់គំនិត និងបេះដូងរបស់លោកតា គឺលោកស្រឡាញ់ប្រទេសខ្មែរណាស់ ហើយកម្ពុជាជាប្រទេសដែលល្អអស្ចារ្យសម្រាប់រូបលោក។
ទោះវ័យកាន់តែជរាទៅហើយក៏ពិតមែន តែវាមិនមែនជារនាំងសម្រាប់រាំងស្ទះដល់គំនិតចង់បន្តជួយការងារអភិរក្សប្រាង្គប្រាសាទខ្មែរនោះឡើយ។ លោក អ៉ីស៉ីសាវ៉ា លើកឡើងថា លោកចង់មានអាយុវែង នៅបន្តសកម្មភាពជាមួយកូនសិស្សរបស់លោក ដើម្បីជួយការងារជួសជុល និងអភិរក្សប្រាសាទបុរាណខ្មែរជាបន្តទៀត។
នៅថ្ងៃទី៣១ ខែមីនា ឆ្នាំ២០១៨ កូនសិស្សរបស់លោកសាស្ត្រាចារ្យ អ៉ីស៉ីសាវ៉ា បានរៀបចំពិធីចម្រើនអាយុ ច័ន្ទសុក្រគិរីសូត្រ ដល់លោកតា តាមទំនៀមប្រពៃណីខ្មែរ ដើម្បីជាការដឹងគុណ និងតបស្នងដល់លោកដែលបានបង្ហាត់បង្រៀន និងជួយទំនុបបម្រុងដល់ពួកគេ អំឡុងពេលសិក្សា។ ន័យពិធីនេះ ក៏ដើម្បីជូនពរលោកសាស្ដ្រាចារ្យឱ្យមានអាយុវែងផងដែរ។
ថ្លែងក្នុងពិធីដ៏មានន័យនោះ លោកសាស្ដ្រាចារ្យ អ៉ីស៉ីសាវ៉ា ថា លោកមានអារម្មណ៍ហាក់ដូចកំពុងឡើងឋានសួគ៌យ៉ាងដូច្នោះដែរ។ លោកបានប្រាប់ពីមូលហេតុដែលលោកទទួលចំពោះពិធីសាសនាជាលើកដំបូងនេះថា៖« ដោយសារខ្ញុំចង់បានអាយុវែងដែរ ព្រោះខ្ញុំចង់នៅជាមួយនិស្សិត ដើម្បីបន្តការងារជួសជុល ថែរក្សាវប្បធម៌ សម្បត្តិបេតិកភណ្ឌខ្មែរតទៅទៀត ហើយខ្ញុំស្រឡាញ់ស្រុកខ្មែរណាស់ ស្រុកខ្មែរជាស្រុកមួយដែលល្អសម្រាប់ខ្ញុំ ហើយល្អសម្រាប់យើងទាំងអស់គ្នា»។
ប្រហែលដូច្នេះហើយ ទើបលោកសាស្ដ្រាចារ្យ អ៉ីស៉ីសាវ៉ា អតីតសាកលវិទ្យាធិការសាកលវិទ្យាល័យ សូហ្វីយ៉ា និងជាប្រធានមជ្ឈមណ្ឌលអាស៉ីសិក្សាស្រាវជ្រាវ និងបណ្តុះបណ្តាលធនធានមនុស្សនៃសាកលវិទ្យាល័យសូហ្វីយ៉ា ហាក់មិនទាន់កំណត់ពីពេលវេលាសម្រាករបស់លោកឡើយ។ លោកថ្លែងថា គោលបំណងរបស់លោក គឺចង់ជួយផ្សព្វផ្សាយឱ្យឆាកអន្តរជាតិដឹង និងស្គាល់ពីវប្បធម៌ខ្មែរ ហើយនឹងប្រឹងប្រែងធ្វើការងារនេះជាបន្តទៀតជាមួយប្រជាជនកម្ពុជា។
សត្វខ្យង ជានិមិត្តរូបដ៏អស្ចារ្យរបស់លោកសាស្ដ្រាចារ្យ អ៉ីស៉ីសាវ៉ា។ ខ្យងចាត់ទុកជាអ្នកមានប្រាជ្ញា និងមានចំណេះដឹងជ្រៅជ្រះ រហូតធ្វើឱ្យសត្វទន្សាយចាញ់នៅក្នុងរឿងព្រេង។ លោកពន្យល់ថា ខ្យងនៅស្រែ នៅជាមួយកសិករខ្មែរ ដូច្នេះចំណេះដឹងទាំងឡាយក៏នៅជាមួយកសិករផងដែរ។ ខ្យងតំណាងឱ្យកសិករខ្មែរអ្នកមានចំណេះដឹងខ្ពស់ និងតំណាងឱ្យខ្មែរទាំងមូល។ លោកសាស្ដ្រាចារ្យបន្តទៀតថា លោកចាប់អារម្មណ៍ចំពោះរឿងព្រេងសត្វខ្យង និងទន្សាយ និងកោតសរសើរចំពោះគំនិតខ្យងនោះជាខ្លាំង៕
Tag:
យ៉ូស៉ីអាគី អ៉ីស៉ីសាវ៉ា
© រក្សាសិទ្ធិដោយ thmeythmey.com