ចិន ទទូចឲ្យជប៉ុនឈប់បង្ករឿងតាមរយៈការបំភ្លៃប្រវត្តិសាស្ត្រនៅកោះជម្លោះសមុទ្រចិនខាងកើត

អន្តរជាតិ

នយោបាយអន្តរជាតិ

ចិន ទទូចឲ្យជប៉ុនឈប់បង្ករឿងតាមរយៈការបំភ្លៃប្រវត្តិសាស្ត្រនៅកោះជម្លោះសមុទ្រចិនខាងកើត

01, Apr 2018 , 10:59 pm

រូបភាព

ដោយ:

រដ្ឋាភិបាលក្រុងប៉េកាំង បានប្រតិកម្មខ្លាំងទៅនឹងរដ្ឋាភិបាលក្រុងតូក្យូ ដែលបានចេញគោលនយោបាយថ្មីដែលក្រុងប៉េកាំងយល់ឃើញថា មិនគប្បី និងផ្ទុយពីការពិតពាក់ព័ន្ធតំបន់ជម្លោះរបស់ភាគីទាំងពីរ ។ សម្រាប់ក្រុងប៉េកាំង ទង្វើរបស់ក្រុងតូក្យូបែបនេះ គឺជាសកម្មភាពបង្កហេតុមួយ ដែលត្រូវតែបញ្ឈប់ ។

អ្នកនាំពាក្យក្រសួងការបរទេសចិន លោក លូ កាង នៅថ្ងៃ៣១ មីនា ចេញប្រតិកម្ម និងទទូចឲ្យជប៉ុន កែតម្រូវ និងប្រកាន់ខ្ជាប់រឿងប្រវិត្តសាស្ត្រ នៅពេលដែលអប់រំយុវជន និងអ្នកជំនាន់ក្រោយរបស់ខ្លួន ហើយ ក៏ត្រូវតែបញ្ចប់សកម្មភាពបង្ករឿងនានានៅក្នុងតំបន់កោះ Diaoyu (ហៅដោយចិន) ឬ Senkaku (ហៅដោយជប៉ុន) ។

តាមការចុះផ្សាយរបស់ភ្នាក់ងារព័ត៌មានចិន Xinhua អ្នកនាំពាក្យ បានសង្កត់ធ្ងន់ថា៖« ចិន ប្តេជ្ញាការពារបូរណភាពដែនដីយ៉ាងដាច់ខាត ហើយ រាល់ការប៉ុនប៉ងបំពានអធិបតេយ្យរបស់ចិនលើតំបន់កោះ Diaoyu មិនមានប្រយោជន៍អ្វីឡើយ » ។ លោក បន្ថែមថា តំបន់ប្រជុំនេះ គឺជាផ្នែកមួយរបស់ចិន តាំងពីសម័យបុរាណកាលមកម្ល៉េះ ។

អ្នកនាំពាក្យដដែលនោះ អះអាងថា ក្រុងប៉េកាំង បានដាក់បណ្តឹងជំទាស់ទៅនឹងគោលនយោបាយថ្មីរបស់ក្រុងតូក្យូរួចហើយ ។ ជាមួយគ្នានេះ ក្រុងប៉េកាំង ក៏ទទូចឲ្យក្រុងតូក្យូប្រឈមនឹងប្រវត្តិសាស្ត្រ ក៏ដូចជាអ្វីដែលជាការពិត ។

ប្រតិកម្មនេះ ធ្វើឡើង ក្រោយពីរដ្ឋាភិបាលជប៉ុន នៅថ្ងៃ២៩ មីនា បានប្រកាសកែសម្រួលសៀវភៅណែនាំគោលរបស់សាលាដោយតម្រូវឲ្យសិស្ស ត្រូវតែទទួលបានការបង្រៀន ថា កោះ Diaoyu គឺជាដែនអធិបតេយ្យរបស់ជប៉ុន ដែលមិនមែនជាដែនជម្លោះអធិបតេយ្យអ្វីឡើយ ។ នេះបើយោងតាមប្រភពព័ត៌មានដដែលនោះ ។

សូមជម្រាបផងដែរថា ក្រៅពីជម្លោះសមុទ្រចិនខាងត្បូងជាមួយនឹងរដ្ឋអសាន ចិន ក៏មានជម្លោះអធិបតេយ្យនៅសមុទ្រចិនខាងកើត ជាមួយជប៉ុន ជាច្រើនទសវត្សរ៍ផងដែរ ។ ភាគទាំងពីរ តែងតែអះអាងថា តំបន់នោះ ស្ថិតក្នុងអធិបតេយ្យរៀងៗខ្លួន ហើយ ជានិច្ចកាល ក៏មានការប្រឈមមុខការទូត និងយោធា តាមរយៈនាវាល្បាតផងដែរ ៕