អន្តរជាតិ
នយោបាយអន្តរជាតិ
ស៊ីមបាវ៉េ ស្វះស្វែងរកកិច្ចសហប្រតិបត្តិការស៊ីជម្រៅជាមួយនឹងចិនដើម្បីស្តារសេដ្ឋកិច្ចឡើងវិញ
× ប្រធានាធិបតីស៊ីមបាវ៉េ លោក Emmerson Mnangagwa បានសំឡឹងឃើញចំណុចវិជ្ជមានជាច្រើនក្នុងការពង្រីកទំនាក់ទំនង និងកិច្ចសហប្រតិបត្តិការស៊ីជម្រៅជាមួយចិន។ លោកប្រធានាធិបតីរូបនេះ រំពឹងថា ការផ្សារភ្ជាប់ទំនាក់ទំនងស៊ីជម្រៅជាមួយនឹងចិន អាចធ្វើឲ្យរដ្ឋអាហ្វ្រិកដ៏ក្រីក្រមួយនេះ ក្លាយជាប្រទេសមានអភិវឌ្ឍ ក្រោយរងទណ្ឌកម្មធ្ងន់ធ្ងរពីលោកខាងលិច ។
តាមរយៈកិច្ចសម្ភាសន៍ជាមួយនឹងទីភ្នាក់ងារព័ត៌មានចិន Xinhua នៅថ្ងៃ៣១ មីនា លោកប្រធានាធិបតី Emmerson បានអះអាងថា ប្រទេសរបស់លោក កំពុងតែស្វែងរកកិច្ចសហប្រតិបត្តិការសេដ្ឋកិច្ចស៊ីជម្រៅជាមួយនឹងចិនដើម្បីជំរុញសេដ្ឋកិច្ចឲ្យមានភាពឡើងប្រសើរឡើង បន្ទាប់ពីរងខ្ទេចខ្ទាំដោយសារតែទណ្ឌជាច្រើនឆ្នាំរបស់ប្រទេសលោកខាងលិច ។
លោកប្រធានាធិបតី ក៏បានលើកឡើងផងដែរថា គោលនយោបាយអាទិភាពនៃរដ្ឋបាលដឹកនាំរបស់លោក គឺស្តារសេដ្ឋកិច្ច និងធ្វើឲ្យស៊ីមបាវ៉េ ក្លាយជាប្រទេស ដែលមានចំណូលកណ្តាលត្រឹមឆ្នាំ២០៣០ ។ លោក អះអាងថា ស៊ីមបាវ៉េ ពិតជាត្រូវការកិច្ចសហប្រតិបត្តិការស៊ីជម្រៅជាមួយនឹងចិនណាស់ដើម្បីធ្វើឲ្យគោលដៅមួយនេះ អាចសម្រេចបានជាការពិត ។
តាមការអះអាងរបស់ប្រធានាធិបតីរូបនេះ អ្វីដែលស៊ីមបាវ៉េ ត្រូវធ្វើកិច្ចសហប្រតិបត្តិការជាមួយនឹងចិន រួមមានទាំងវិស័យ បច្ចេកវិទ្យាទំនើបៗ និងជាពិសេសនោះ គឺហិរញ្ញវត្ថុតែម្តង ។ លោក ក៏បានសង្កត់ធ្ងន់ថា លោក បានជ្រើសរើសចិន ជាប្រទេសទីមួយក្រៅតំបន់អាហ្វ្រិកដើម្បីអរគុណដល់ប្រទេសតំបន់អាស៊ី ដែលឈរនៅខាងស៊ីមបាវ៉េ អំឡុងពេលដែលប្រទេសកំពុងស្ថិតនៅក្នុងស្ថានភាពលំបាកបំផុត ។
អ្វីដែលគួរកត់សម្គាល់នោះ ការថ្លែងពីចំណុចវិជ្ជមានចំពោះសហប្រតិបត្តិការចិនរបស់លោកប្រធានាធិបតីស៊ីមប៉ាវេរូបនេះ ធ្វើឡើងមុនពេលដែលលោក ក៏នឹងត្រូវចាកចេញពីប្រទេសដើម្បីបំពេញទស្សនកិច្ចផ្លូវការទៅកាន់ចិន ដែលនឹងត្រូវប្រព្រឹត្តឡើងនៅថ្ងៃ២ដល់ថ្ងៃ៦ មេសាខាងមុខនេះ ។
បើតាមប្រភពព័ត៌មាន Xinhua លោកប្រធានាធិបតី Mnangagwa ក៏គ្រោងថ្លែងការណ៍អរគុណ ប្រធានាធិបតីចិន និង ប្រជាជនចិន ដែលមិនបោះបង់ស៊ីមបាវ៉េ នៅពេលដែលប្រទេសលោកខាងលិច បានដាក់ទណ្ឌកម្មនោះ ៕
© រក្សាសិទ្ធិដោយ thmeythmey.com