ចិនគាំទ្រឲ្យសម្ដេច ហ៊ុន សែន ជាប់ឆ្នោតជានាយករដ្ឋមន្ត្រីអាណត្តិថ្មី តែអ្នកវិភាគថា ជាសម្ដីគ្មានន័យ

ជាតិ

នយោបាយជាតិ

ចិនគាំទ្រឲ្យសម្ដេច ហ៊ុន សែន ជាប់ឆ្នោតជានាយករដ្ឋមន្ត្រីអាណត្តិថ្មី តែអ្នកវិភាគថា ជាសម្ដីគ្មានន័យ

02, Apr 2018 , 12:08 pm

រូបភាព

សម្ដេច ហ៊ុន សែន ចាប់ដៃរដ្ឋមន្រ្តីការបរទេសចិន វ៉ាង យី ក្នុងជំនួបនៅវៀតណាម (រូបភាពពីហ្វេសប៊ុកសម្ដេច ហ៊ុន សែន)

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋាភិបាលចិន បង្ហាញជំហរគាំទ្រឲ្យគណបក្សប្រជាជនកម្ពុជា ដែលដឹកនាំដោយសម្ដេច ហ៊ុន សែន បន្តឈ្នះឆ្នោតធ្វើជានាយករដ្ឋមន្ត្រី ដឹកនាំប្រទេសនាអាណត្តិក្រោយទៀត។ សម្រាប់អ្នកវិភាគវិញ សម្ដីរបស់រដ្ឋាភិបាលចិន គ្រាន់តែជាពាក្យគួរសមតាមការទូតប៉ុណ្ណោះ ហើយវាជាសម្ដីគ្មានន័យឡើយ។

អ្នកនាំពាក្យគណបក្សប្រជាជន លោក សុខ ឥសាន បាននិយាយថា ថ្នាក់ដឹកនាំចិន គាំទ្រម៉ឹងម៉ាត់ចំពោះចំណាត់ការផ្លូវច្បាប់របស់រាជរដ្ឋាភិបាលកម្ពុជា លើក្រុមអនាធិបតេយ្យ ដើម្បីពង្រឹងលទ្ធិប្រជាធិបតេយ្យនិងនីតិរដ្ឋនៅកម្ពុជា។ ជំហររបស់ចិន ធ្វើឡើងនៅក្នុងជំនួបទ្វេរភាគី ជាមួយនាយករដ្ឋមន្ត្រីកម្ពុជា នៅលើទឹកដីវៀតណាម កាលពីពេលថ្មីៗនេះ។

ថ្លែងប្រាប់មកសារព័ត៌មានថ្មីៗ លោក សុខ ឥសាន បានបញ្ជាក់ដូច្នេះថា៖«លោក វ៉ាង យី អះអាងក្នុងនាមជាថ្នាក់ដឹកនាំគណបក្សកុម្មុយនីស្តចិន ដោយលោកបានគាំទ្រឲ្យគណបក្សប្រជាជនជោគជ័យនាពេលបោះឆ្នោតខាងមុខ ហើយគាំទ្រឲ្យសម្ដេច ហ៊ុន សែន បន្តធ្វើជានាយករដ្ឋមន្ត្រី ជាបន្តទៀត ដើម្បីដឹកនាំប្រទេសកម្ពុជាឆ្ពោះទៅរកការអភិវឌ្ឈន៏រីកចម្រីនកានតែខ្លាំងក្លាថែមទៀត»។

សម្រាប់លោក សុខ ឥសាន ជំហរគាំទ្ររបស់ប្រទេសចិនចំពោះកម្ពុជានេះ គឺជាសសរទ្រូងនិងជាបង្អែកដ៏រឹងមាំមួយ សម្រាប់ទប់ស្កាត់រាល់ការយាយីនិងលូកដៃជ្រៀតជ្រែកចូលកិច្ចការផ្ទៃក្នុងកម្ពុជា ពីសំណាក់ក្រុមជួយជ្រោមជ្រែងនយោបាយ(អានុភាពប្រតិក្រិយា)អន្តរជាតិ បានយ៉ាងមានប្រសិទ្ធភាព ។

ផ្ទុយពីការលើកឡើងនេះ លោក អ៊ូ វីរៈ អ្នកវិភាគនយោបាយ យល់ឃើញថា សម្តីរបស់រដ្ឋាភិបាលចិន គ្រាន់តែពាក្យគួរសមមកលើរដ្ឋាភិបាលកម្ពុជាប៉ុណ្ណោះ ហើយវាក៏មិនមែនជាសម្ដីមានន័យអ្វី អាចមកបញ្ជាក់ថា ចិនគាំទ្រប្រមុខរដ្ឋាភិបាល១០០ភាគរយដែរ។ សម្រាប់លោក អ៊ូ វីរៈ ទោះជាគណបក្សណាមួយ ជាប់ឆ្នោតនៅកម្ពុជា ក៏ចិននៅតែធ្វើកិច្ចការជាមួយដែរ ព្រោះចិនមានគោលនយោបាយគិតផលប្រយោជន៍ប្រទេសគេជាធំ។

«សម្ដីជូនពរនេះ គ្រាន់តែពាក្យគួរសមក្នុងភាសាការទូតទេ ហើយវាគ្មានអ្វីដែលគួរឲ្យចាប់អារម្មណ៍ទេ។ ជាការជូនពរមុនការបោះឆ្នោតអត់មានន័យទេ ព្រោះប្រទេសណាក៏ដោយប្រសិនជាគណបក្សណាជាអ្នកឈ្នះឆ្នោតនាពេលអនាគត ប្រទេសនោះនឹងធ្វើការជាមួយប្រទេសហ្នឹង។ ដូច្នេះគេមិនប្រាប់មុនថា គេធ្វើការជាមួយអ្នកណា និងអត់ធ្វើជាមួយអ្នកណាទេ។ បើនិយាយពីទំនាក់ចិន-កម្ពុជា ខ្ញុំមើលឃើញថា ទំនាក់ទំនងចិន-កម្ពុជា នឹងកាន់តែរឹតបន្តឹងល្អូកល្អិន រឺងមាំ ទោះបីគណបក្សកាន់អំណាចឈ្នះក៏រឹងមាំ ទោះបីគណបក្សផ្សេងណាឈ្នះក៏រឹងមាំ ខ្ញុំមើលឃើញថា កម្ពុជាគ្មានអ្វីឃ្លាតចេញពីចិនទេ»។ នេះជាការលើកឡើងរបស់លោក អ៊ូ វីរៈ។

គណៈកម្មាធិការជាតិរៀបចំការបោះឆ្នោត នឹងចាប់ដំណើការទទួលឈ្មោះបេក្ខជន និងគណបក្សនយោបាយ នៅថ្ងៃទី30 មេសា ដល់ថ្ងៃទី១៤ ឧសភា សម្រាប់រៀបចំដំណើការបោះឆ្នោតជ្រើសរើសតំណាងរាស្ត្រ ដែលនឹងប្រព្រឹត្តទៅនៅថ្ងៃទី២៩ កក្កដាខាងមុខ។ ស្របពេលដែលការចុះឈ្មោះ គណបក្សនយោបាយបោះឆ្នោតជិតមកដល់ អតីតគណបក្សសង្គ្រោះជាតិ និងមនុស្ស១១៨នាក់ មិនទាន់មានច្រកចូលមកប្រកួតប្រជែងនយោបាយនៅកម្ពុជាវិញឡើយ។

ត្រង់ចំណុចនេះអ្នកតាមដានស្ថានការណ៍នយោបាយ និងសង្គមស៊ីវិល ដែលធ្វើការពាក់ព័ន្ធនិងការបោះឆ្នោត យល់ឃើញថា ការបោះឆ្នោតនឹងប្រព្រឹត្តទៅ ដោយមិនមានភាពត្រឹមត្រូវ សេរី និងយុត្តិធម៌ នោះទេ ដរាបណាគ្មានវត្តមានគណបក្សប្រឆាំងដ៏ធំ ចូលរួមប្រកួតប្រជែង ខណៈគណបក្សផ្សេងទៀត មិនទាន់មានលទ្ធភាពគ្រប់គ្រាន់ប្រកួតប្រជែងជាមួយគណបក្សប្រជាជនកម្ពុជា។ បញ្ហានេះ ក៏បានធ្វើឲ្យសហគមអន្តរជាតិមួយចំនួន ប្រកាសជំហរ មិនទទួលស្គាល់ការបោះឆ្នោតនៅកម្ពុជាផងដែរ។ ពួកគេចាត់ទុកលទ្ធផលបោះឆ្នោតនៅកម្ពុជា នឹងគ្មានន័យឡើយ បើគ្មានអតីតគណបក្សសង្គ្រោះជាតិ។

តែយ៉ាងណាសម្ដេចនាយករដ្ឋមន្ត្រី ហ៊ុន សែន ធ្លាប់បានប្រកាសថា កម្ពុជាមិនខ្វល់ពីបរទេស ដែលមិនគាំទ្រលទ្ធផលបោះឆ្នោតនៅកម្ពុជាទេ ពោលឲ្យតែការបោះឆ្នោតនៅកម្ពុជា ស្របតាមរដ្ឋធម្មនុញ្ញ និងមានការទទួលស្គាល់ពីប្រជាជនកម្ពុជា នោះវាគ្រប់គ្រាន់ហើយ៕