កីឡាអន្តរជាតិ
អន្តរជាតិ
កៅអី Champions League កាន់តែដាច់ឆ្ងាយក្រោយ Chelsea ចាញ់ Spurs ៣-១
× ម្ចាស់ជើងឯកឆ្នាំចាស់ Chelsea បានប្រកួតចាញ់ក្នុងផ្ទះខ្លួនឯងក្រោមថ្វៃជើង Tottenham Hotspur ក្នុងលទ្ធផល ៣-១ នាការប្រកួតក្របខណ្ឌ Premier League នៅយប់ថ្ងៃទី១ ខែមេសា។
បរាជ័យនេះបានធ្វើឲ្យក្រុមដែលដឹកនាំដោយអ្នកចាត់ការសញ្ជាតិអ៊ីតាលី Antonio Conte ប្រឈមមិនបានលេង UEFA Chapions League រដូវកាលក្រោយ បន្ទាប់ពីដាច់ពិន្ទុឆ្ងាយក្រុម Top 4 រហូត៨ពិន្ទុនៃក្របខណ្ឌលីកកំពូលអង់គ្លេស ខណៈការប្រកួតសល់តែ ៧លើកប៉ុណ្ណោះសម្រាប់រដូវកាល ២០១៧-២០១៨ នេះ។
ក្រុមរហស្សនាមតោខៀវ បាននាំមុខទៅហើយនៅនាទី ៣០ ដោយការប្រើក្បាលបញ្ចូលទីរបស់ខ្សែប្រយុទ្អ Avaro Morata។ ចុងម៉ោងបញ្ចប់វគ្គទី១ទៅហើយ ខ្សែបម្រើឆ្នើម Christian Eriksen បានស៊ុតបាល់ពីចម្ងាយយ៉ាងល្អជួយ Spurs តាមស្មើ ១-១វិញ។
ការប្រកួតបានឈានដល់តង់ទី២។ Dele Alli អាចរកគ្រាប់បាល់ជ័យជម្នះឲ្យក្រុមរហស្សនាមមាន់ខ្នាយមាសដល់ទៅ២គ្រាប់ត្រឹមរយៈពេល៤នាទីប៉ុណ្ណោះ គឺនៅនាទី ៦២ និង៦៦។ នេះក៏ជាលើកដំបូងផងដែរសម្រាប់ Spurs ដែលបានរកជ័យជម្នះដំបូងក្នុងទឹកដី Stamford Bridge រយៈពេល២៨ឆ្នាំចុងក្រោយ។
ក្រុមរបស់ Mauricio Pochettino ក្រោយការប្រកួត ៣១លើក ឈ្នះ១៩ ចាញ់៥ និងស្មើ៧លើក មាន៦៤ពិន្ទុ ឈរនៅចំណាត់ថ្នាក់លេខ៤ ក្នុងតារាង Premier League ខណៈ Chelsea ស្ថិតនៅចំណាត់ថ្នាក់ទី៥ មាន៥៦ពិន្ទុប៉ុណ្ណោះ ដោយប្រឈមមិនបានបង្ហាញខ្លួនក្នុងព្រឹត្តិការណ៍ពានលំដាប់ទី១អឺរ៉ុបរដូវកាលក្រោយ៕
Tag:
បាល់ទាត់
UEFA Chapions League
Chelsea
Tottenham Hotspur
Premier League
© រក្សាសិទ្ធិដោយ thmeythmey.com