អន្តរជាតិ
លោក គីម ជុងអ៊ុន ក្លាយជាមេដឹកនាំកូរ៉េខាងជើងទីមួយទស្សនាការសម្ដែងរបស់ក្រុម K-pop លោក គីម ជុងអ៊ុន ជជែកជាមួយសិល្បករកូរ៉េខាងត្បូង (រូបភាព KCNA)
× មេដឹកនាំកំពូលកូរ៉េខាងជើង គីម ជុងអ៊ុន នៅថ្ងៃទី១ ខែមេសា បានចូលរួមទស្សនាការប្រគំតន្ត្រីរបស់សិល្បករកូរ៉េខាងត្បូង។ ជាមេដឹកនាំកូរ៉េខាងជើងទីមួយដែលទស្សនាការសម្ដែងរបស់តារាសិល្បៈកូរ៉េខាងត្បូង លោក គីម ជុងអ៊ុន រំភើបយ៉ាងខ្លាំងចំពោះការសម្ដែងនេះ និងចាត់ទុកជាការបង្ហាញការរួបរួមរវាងកូរ៉េទាំងពីរ។ ទីភ្នាក់ងារព័ត៌មានរដ្ឋកូរ៉េខាងជើងផ្សាយថា លោក គីម ជុងអ៊ុន បានផ្លាស់ប្ដូរកាលវិភាគការងារដើម្បីមានឱកាសទស្សនាការប្រគំនេះ។
ជារឿងកម្រមិនធ្លាប់មាន ប្រមុខដឹកនាំកូរ៉េខាងជើងលោក គីម ជុងអ៊ុន និងភរិយា បានបង្ហាញវត្តមានក្នុងការប្រគំរបស់សិល្បករកូរ៉េខាងត្បូងនៅថ្ងៃទី១ ខែមេសា ក្នុងរដ្ឋធានីព្យុងយ៉ាង។ សិល្បករកូរ៉េខាងត្បូង១១ក្រុមស្ថិតក្នុងទឹកដីកូរ៉េខាងជើង ដើម្បីឆ្លើយតបនឹងកាយវិការរបស់កូរ៉េខាងជើងដែលបានបញ្ជូនក្រុមតន្ត្រី និងក្រុមសម្ដែងក្បាច់គុនតេក្វាន់ដូទៅកាន់កូរ៉ខាងត្បូងកាលពីខែកុម្ភៈក្នុងព្រឹត្តការណ៍អូឡាំពិករដូវរងា។
បើតាមទីភ្នាក់ងារព័ត៌មាន Yonhap ដែលស្រង់ប្រភពពីសារព័ត៌មានរដ្ឋកូរ៉េខាងជើង KCNA លោក គីម ជុងអ៊ុន បង្ហាញក្ដីសង្ឃឹមថា ការសម្ដែងរបស់សិល្បករកូរ៉េខាងត្បូងជាឱកាសបង្ហាញពីការរួបរួមរបស់កូរ៉េទាំងពីរ។ មេដឹកនាំកូរ៉េខាងជើងបង្ហាញទឹកមុខរីករាយ និងរំភើបជាខ្លាំងនៅពេលឃើញប្រជាជនកូរ៉េខាងជើងលើកដៃរេរាំតាមចង្វាក់ភ្លេងប្រគំដោយសិល្បករកូរ៉េខាងត្បូងនៅឯសាលមហោស្រព East Pyongyang Grand Theatre ។
តាមពិតទៅ មេដឹកនាំវ័យក្មេងកូរ៉េខាងជើងគ្រោងទស្សនាការសម្ដែងរបស់ក្រុមសិល្បករកូរ៉េខាងត្បូងនៅថ្ងៃទី៣ ខែមេសា ប៉ុន្តែបានសម្រេចចិត្តប្ដូរកាលវិភាគវិញ កុំឲ្យជាន់កម្មវិធីសំខាន់មួយទៀត។ លោក គីម ជុងអ៊ុន ត្រូវចូលរួមកិច្ចប្រជុំសភានៅថ្ងៃទី៣ ដែលធ្វើឡើងមុនជំនួបជាមួយប្រធានាធិបតី មូន ចេអ៊ីន និងប្រធានាធិបតីអាមេរិក ដូណាល់ ត្រាំ ។
ប្រតិភូ និងសិល្បករកូរ៉េខាងត្បូងចំនួន១៩០នាក់ បានទៅដល់កូរ៉េខាងជើងនៅចុងសប្ដាហ៍មុនរួមមានតារាចម្រៀងជើងចាស់ Cho Yong-pil, ក្រុមតារាចម្រៀង K-pop Red Velvet និងតារាចម្រៀង Seohyun សមាជិក Girl’s Generation ជាដើម។ ពួកគេបានសម្ដែងចំពោះមុខទស្សនិកជនកូរ៉េខាងជើងច្រើនជាងមួយពាន់នាក់ឯណោះ។ នេះជាលើកទីមួយដែលសិល្បករកូរ៉េខាងត្បូងសម្ដែងនៅទឹកដីកូរ៉េខាងជើងចាប់តាំងពីឆ្នាំ២០០៥ មក។
ទំនាក់ទំនងល្អប្រសើររវាងកូរ៉េទាំងពីរបានលេចចេញក្នុងព្រឹត្តការណ៍អូឡាំពិករដូវរងាក្នុងខែកុម្ភៈ ដែលកូរ៉េខាងត្បូងជាម្ចាស់។ បន្ទាប់ពីនោះ គេឃើញថា ស្ថានភាពនៅឧបទ្វីបក៏កាន់រីកចម្រើនថែមទៀត ជាពិសេសកូរ៉េខាងជើងបានបង្ហាញឥរិយាបថភ្ញាក់ផ្អើលជាងគេ។ ដំបូងលោក គីម ជុងអ៊ុន អញ្ជើញលោក មូន ចេអ៊ីន ដើម្បីរៀបចំជំនួបមេដឹកនាំកូរ៉េ។ ជំនួបនេះនឹងធ្វើនៅថ្ងៃទី២៧ ខែមេសា។ លោក គីម ក៏គ្រោងជួបលោក ត្រាំ នៅខែឧសភាទៀតផង៕
Tag:
កូរ៉េខាងជើង
កូរ៉េខាងត្បូង
គីម ជុងអ៊ុន
© រក្សាសិទ្ធិដោយ thmeythmey.com