ជាតិ
ចូលឆ្នាំខ្មែរ៖ សម្ដេច ហ៊ុន សែន ហាមពលរដ្ឋលេងជះទឹក និងបាចម្សៅ ដែលនាំឲ្យគ្រោះថ្នាក់
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បញ្ជាឲ្យកងកម្លាំងសមត្ថកិច្ចទាំងអស់ យកចិត្តទុកដាក់ការពារប្រជាពលរដ្ឋ នៅក្នុងឱកាសចូលឆ្នាំខ្មែរខាងមុខនេះ។ ជាពិសេសការពារសុវត្ថិភាពភ្ញៀវទេសចរបរទេស ដែលមកលេងកម្សាន្តនៅកម្ពុជា ដើម្បីផ្ដល់សេចក្តីទុកចិត្តដល់ពួកគេ។
សូមស្ដាប់ប្រសាសន៍សម្ដេចនាយករដ្ឋមន្ត្រី ហ៊ុន សែន ដែលបានថ្លែងនៅក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា នៅព្រឹកនេះ ៖
ប្រមុខរដ្ឋាភិបាលបានបញ្ជាក់ដូច្នេះថា៖«សុវត្ថិភាពរបស់ប្រជាពលរដ្ឋ និងសុវត្ថិភាពទេសចរបរទេស គឺសំខាន់ណាស់ ដូច្នេះអាជ្ញាធរគ្រប់លំដាប់ថ្នាក់ទាំងអស់ រួមទាំងកងកម្លាំងប្រដាប់អាវុធទាំងអស់ ត្រូវយកចិត្តទុកដាក់អោយបានខ្ពស់បំផុត ការពារពលរដ្ឋ និងទេសចរជាតិ និងអន្តរជាតិនៅតាមតំបន់រមណីយដ្ឋានទេសចរទូទាំងប្រទេស កុំអោយមានរឿងអ្វីកើតឡើងអោយសោះនៅក្នុងឱកាសនៃពិធីបុណ្យចូលឆ្នាំថ្មីខាងមុខនេះ»។
បន្ថែមពីនេះសម្ដេច ហ៊ុន សែន បានហាមពលរដ្ឋកុំឲ្យលេងបាចទឹក ឬជះទឹក និងចាប់លាបម្សៅ ដែលអាចបង្កគ្រោះថ្នាក់ ទៅដល់ប្រជាពលរដ្ឋដែលកំពុងធ្វើដំណើរតាមដងផ្លូវ ដែលអាចនាំឲ្យរអិលធ្លាក់ពីលើកង់ម៉ូតូ ហើយអាចបាត់ខ្សែក និងក្រវិលជាដើម។
Tag:
ហ៊ុន សែន
ចូលឆ្នាំខ្មែរ
© រក្សាសិទ្ធិដោយ thmeythmey.com