អន្តរជាតិ
មេធាវីហូឡង់ត្រូវបានកាត់ទោសលើសំណុំរឿងរុស្ស៊ីជ្រៀតជ្រែកការបោះឆ្នោតអាមេរិក លោក Alex van der Zwaan មេធាវីជនជាតិហូឡង់ (រូបភាព AFP)
× នៅថ្ងៃទី៣ ខែមេសា មេធាវីជនជាតិហូឡង់ Alex van der Zwaan ត្រូវបានតុលាការអាមេរិកកាត់ទោសជាប់ពន្ធនាគា ៣០ថ្ងៃពីបទកុហកក្រុមស៊ើបអង្កេតពិសេសលើសំណុំរឿងរុស្ស៊ីលូកលាន់កិច្ចការបោះឆ្នោតអាមេរិកឆ្នាំ២០១៦ ។ មេធាវីរូបនេះក្លាយជាបុគ្គលដំបូងដែលត្រូវបានកាត់ទោសក្រោមការស៊ើបអង្កេតរបស់រដ្ឋអាជ្ញាពិសេស Robert Mueller និងជាបុគ្គលទីបួនដែលបានសារភាពកំហុសរបស់ខ្លួនក្នុងសំណុំរឿងដ៏ធំនេះ។
រកឃើញបុគ្គលទីមួយដែលត្រូវតុលាការកាត់ទោសលើករណីរុស្ស៊ីជ្រៀតជ្រែការបោះឆ្នោតអាមេរិក។ មេធាវីហូឡង់ Alex van der Zwaan ត្រូវតុលាការអាមេរិកកាត់ទោសឲ្យជាប់ពន្ធនាគារ៣០ថ្ងៃ និងពិន័យជាប្រាក់ពីរម៉ឺនដុល្លារ ក្រោយបុរសរូបនេះកុហក និងបដិសេធផ្ទេរអ៊ីម៉ែលទៅក្រុមស៊ើបអង្កេតរបស់រដ្ឋអាជ្ញាពិសេស Robert Mueller ។ លោកធ្លាប់ធ្វើការជាមួយលោក Rick Gates អតីតអនុប្រធានយុទ្ធនាការរបស់លោក ដូណាល់ ត្រាំ និងលោក Paul Manafort ប្រធានយុទ្ធនាការ។
លោក van der Zwaan ជាប់ឈ្មោះក្នុងបញ្ជីរបស់ក្រុមស៊ើបអង្កេតពិសេសកាលពីឆ្នាំមុន ក្រោយក្រុមហ៊ុនរបស់គេ Skadden Arps បានសហការក្នុងការស៊ើបអង្កេតលើករណីទំនាក់ទំនងរវាងលោក Manafort និងលោក Gates ជាមួយជនជាតិអ៊ុយក្រែន និងរុស្ស៊ី។ ទាំងចៅក្រម ទាំងរដ្ឋអាជ្ញា និយាយថា មេធាវីហូឡង់រូបនេះបាននិយាយមិនពិតក្នុងកិច្ចសម្ភាសលើកទីមួយក្នុងខែវិច្ឆិកា។ នេះបើតាមការផ្សាយរបស់សារព័ត៌មាន CNN ។
មុនប្រកាសសាលក្រមកាត់ទោស ចៅក្រម Amy Berman Jackson បញ្ជាក់ថា លោក van der Zwaan បានធ្វើសកម្មភាពផ្គាប់ផ្គុនលោក Manafort និងលោក Gates ដែលជាមន្ត្រីលោក ត្រាំ និងបានលាក់បាំងរឿងពីក្រុមហ៊ុនរបស់ខ្លួន។ លោក Jackson បានហៅទង្វើនេះជាការគិតប្រយោជន៍ជាងយុត្តិធម៌។ ក្នុងសវនាការវិញ មេធាវីវ័យ៣៣ឆ្នាំរូបនេះបានសារភាពថា អ្វីដែលខ្លួនបានធ្វើ គឺជារឿងខុសឆ្គង និងសូមសុំទោសចំពោះកំហុសនេះ។
កាលពីក្នុងកិច្ចសម្ភាសក្នុងខែវិច្ឆិកានោះ លោក van der Zwaan ដែលមានឪពុកក្មេកជាសេដ្ឋីរុស្ស៊ី បានព្យាយាមលាក់បាំងទំនាក់ទំនងជាមន្ត្រីទាំងពីររបស់លោក ត្រាំ តែក្រុមស៊ើបអង្កេតបានឈ្លេចសួរពីសារអ៊ីមែលដែលលោកលាក់បាំង។ ប៉ុន្មានសប្ដាហ៍ក្រោយមក រដ្ឋអាជ្ញាពិសេសបានកោះមេធាវីរូបនេះទៅសួរនាំ ហើយអាជ្ញាធរអាមេរិកក៏បានដកលិខិតឆ្លងដែន រួចបានប្រាប់ពីការពិតទាំងអស់ ព្រមទាំងបង្ហាញសារអ៊ីមែលផង។
van der Zwaan ជាបុគ្គលទីបួនដែលបានទទួលកំហុស។ មនុស្សបីនាក់ផ្សេងទៀតមានលោក George Papadopoulos ទីប្រឹក្សាយុទ្ធនាការរកការគាំទ្ររបស់លោក ត្រាំ, អតីតទីប្រឹក្សាសន្តិសុខជាតិលោក Michael Flynn និងបុគ្គលម្នាក់ទៀត។ ឯលោក Gates វិញ បានសហការជាមួយក្រុមរដ្ឋអាជ្ញាពិសេសក្នុងការស៊ើបអង្កេតរកការពិត ប៉ុន្តែលោក Manafort បានបដិសេធទទួលកំហុសនិងការចោទប្រកាន់នានា៕
Tag:
អាមេរិក
រុស្ស៊ី
ហូឡង់
ដូណាល់ ត្រាំ
Alex van der Zwaan
© រក្សាសិទ្ធិដោយ thmeythmey.com