ជាតិ
«វេទិកាសួរមួយ» អាចជួយតម្រង់ទិសយុវជនទៅរកជោគជ័យក្នុងការសិក្សានិងអាជីព លោក អ៊ូ រិទ្ធី ស្ថាបនិកវេទិកាប្រឹក្សាយោបល់ «សួរមួយ»
× យុវជនកម្ពុជាមួយរូបបានផ្តួចផ្តើមគំនិតបង្កើតវេទិកាប្រឹក្សាយោបល់ «សួរមួយ» (Sour Mouy) ដើម្បីជួយប្រឹក្សា និងតម្រង់ទិសដល់យុវជនកម្ពុជាឲ្យពួកគេអាចមានលទ្ធភាពទទួលជោគជ័យក្នុងការសិក្សា ក្នុងការងារ ក៏ដូចជាអាជីវកម្មដែរ។
ស្ថាបនិក«វេទិកាសួរមួយ» លោក អ៊ូ រិទ្ធី បានថ្លែងថា សួរមួយនឹងផ្តល់ឱកាសឲ្យមានកិច្ចសន្ទនា និងប្រឹក្សាយោបល់ដែលមិនមានលក្ខណៈផ្លូវការតាមរយៈប្រព័ន្ធទំនាក់ទំនងអនឡាញ ឬតាមរយ:ទូរស័ព្ទ។តាមរយៈគេហទំព័រនៃវេទិកាសួរមួយ អ្នកចង់ទទួលការប្រឹក្សា និងអ្នកប្រឹក្សាអាចកំណត់ពេលវេលាក្នុងការណាត់ជួបសន្ទនាគ្នាបានផងដែរ។
ពេលសាកសួរពីមូលហេតុដែលនាំឲ្យមានការបង្កើតវេទិកាមួយនេះឡើង បញ្ញាវ័ន្តដែលទទួលបានការសិក្សាថ្នាក់អនុបណ្ឌិតពីប្រទេសហូឡង់លោក រិទ្ធី បានអះអាងថា លោកចង់រួមចំណែកជួយយុវជនកម្ពុជាដោះស្រាយបញ្ហាប្រឈមរួមក្នុងការសិក្សា ជំនាញ និង ការងារផង។
លោកបានប្រាប់សារព័ត៌មានថ្មីៗដូច្នេះ៖«ខ្ញុំមើលប្រទេសជារួម។ យើងដឹងទាំងអស់គ្នាថា យុវជនសំខាន់ជាទំពាំងស្នងឬស្សី។ ប៉ុន្តែការជួយយុវជនរបស់យើងនាពេលបច្ចុប្បន្ននៅស្ទើរ និងមិនសូវមានប្រសិទ្ធភាពឡើយ។ ពេលខ្ញុំសិក្សានៅហូឡង់ មិត្តភក្តិខ្ញុំជាច្រើនតែងសួរនាំពីការងារ និងអាហារូបករណ៍ផង ហើយរួមជាមួយការសង្កេតរបស់ខ្ញុំ និងពិភាក្សាជាមួយបញ្ញាវ័ន្តផ្សេងទៀតផង ពីបញ្ហាប្រឈមធំៗរបស់យុវជន យើង ទើបខ្ញុំបានជាគំនិតរៀបចំវេទិកានេះឡើង»។
តាមពិតទៅ វេទិកាប្រឹក្សាយោបល់សួរមួយ ត្រូវបានដាក់ឲ្យប្រើប្រាស់ជាផ្លូវការកាលពីថ្ងៃសៅរ៍ទី ៣១ ខែមីនាកន្លងទៅ ហើយគម្រោងនេះក៏ទទួលបានការជួយឧបត្ថម្ភហិរញ្ញវត្ថុគ្រាប់ពូជ (Seed Funding) ពីអង្គការតម្លាភាពកម្ពុជា (TI) ដែរ។ មកដល់ពេលនេះបញ្ញាវ័ន្តដែលបានស្ម័គ្រចិត្តធ្វើជាអ្នកប្រឹក្សានោះកើនឡើងដល់ជាង ៥០ នាក់រួចទៅហើយ។
ស្ថាបនិករូបនេះបន្ថែមថា វេទិកាអនឡាញប្រឹក្សាយោបល់ដែលលោកផ្តួចផ្តើមឡើងនោះផ្តោតសំខាន់លើការប្រឹក្សាយោបល់លើចំណុចសំខាន់ចំនួនប្រាំដែលយុវជនកម្ពុជាត្រូវការខ្លាំង ហើយចំណុចទាំងនោះអាចជួយកំណត់ជោគវាសនា និងភាពជោគជ័យរបស់យុវជនកម្ពុជាបានផង។
«បញ្ហាទាំងប្រាំចំណុចនោះមានទីមួយ គឺចេញពីនិស្សិតរៀនចប់វិទ្យាល័យ។ គាត់ប្រឈមការលំបាកមែនទែនក្នុងការជ្រើសរើសមុខវិជ្ជា។ ខ្ញុំខ្លួនឯង និងមិត្តភក្តិផ្សេងទៀតក៏ធ្លាប់មានបទពិសោធន៍។ យើងមិនដឹងត្រូវរៀនអ្វីទាំងផ្នែកសង្គម និងវិទ្យាសាស្ត្រ។ ចំណែកទីពីរគឺ ជំនាញវិជ្ជាជីវៈ។ ពេលគាត់រៀនចប់វិទ្យាល័យ គាត់ត្រូវការជំនាញវិជ្ជាជីវៈដូចជាធ្វើកសិកម្ម ចិញ្ចឹមសត្វ ដាំដុះ ជាងជួសជុល ឬបច្ចេកទេសជាដើម។ តែគាត់មិនដឹងទៅរៀនសូត្រនៅឯណា»។
«ទីបីគឺ ទាក់ទងនឹងអាជីព។ ពេលគាត់រៀនចប់ហើយគាត់ត្រូវរកការងារធ្វើ ប៉ុន្តែគាត់មិនដឹងទៅណា ឬគ្មានអ្នកណាជួយណែនាំឬរៀបចំខ្លួន។ ចំណុចទីបួន បន្ទាប់ពីបានធ្វើការងារហើយ គឺគាត់ត្រូវការអាហារូបករណ៍ទៅក្រៅប្រទេស ឬវគ្គខ្លីៗ។ ទីប្រាំគឺ ពេលមានបទពិសោធន៍គួរសម គាត់មានគំនិតរកស៊ី ឬធ្វើជាសហគ្រិន។ គាត់ត្រូវការសួរយោបល់ទៀត»។ នេះជាការពន្យល់របស់លោក រិទ្ធី។
លោក រិទ្ធី បានកត់សម្គាល់ថា ការស្រាវជ្រាវកន្លងមកបង្ហាញថា យុវជនកម្ពុជាភាគច្រើនជ្រើសរើសមុខវិជ្ជារៀនតាមចិត្តរបស់ខ្លួន ជាជាងយល់ដឹងពីទីផ្សារ និងតម្រូវការរបស់ប្រទេសជាតិ។ បញ្ហានេះកើតឡើងដោយសារកង្វះខាតព័ត៌មាន មិនមានអ្នកជួយសម្របសម្រួល និងផ្តល់ពន្លឺសម្រាប់ការជ្រើសរើសជំនាញ និងបច្ចេកទេស។ បើសិនវេទិកាសួរមួយអាចបន្តដំណើរទៅមុខបានល្អដោយរលូន លោក រិទ្ធី រំពឹងថា វានឹងអាចរួមចំណែកជួយបន្ថយគម្លៀតនៃជំនាញបច្ចេកទេសក្នុងចំណោមយុវជននាពេលអនាគតផង។
«ខ្ញុំយល់ថា យុវជនដែលមានចំណេះដឹង មានជំនាញ មានបទពិសោធន៍ បានរៀនសូត្រក្រៅប្រទេស និងធ្វើការងារនៅកន្លែងល្អៗមានលទ្ធភាពចែករម្លែក និងជួយតម្រង់ផ្លូវយុវជនផ្សេងទៀតឲ្យត្រូវជំនាញ។ យើងជួយសង្គមរបៀបនេះ។ ជួយយុវជនឲ្យជោគជ័យ គឺមានន័យថា ជួយសង្គមឲ្យជោគជ័យ»។ លោក រិទ្ធីអះអាងដូច្នេះ។
យ៉ាងណាមិញ ស្ថាបនិករូបនេះក៏ចង់ឲ្យមានការចូលរួមពីភាគីពាក់ព័ន្ធជាពិសេសក្រសួងអប់រំ យុវជន និងកីឡា រួមជាមួយអង្គការអន្តរជាតិនានាគាំទ្រគម្រោងនេះផងនៅពេលអនាគតដើម្បីធានានិរន្តរភាព និងប្រសិទ្ធភាពនៃគម្រោងនេះ៕
ចុចទីនេះ ដើម្បីដឹងកាន់តែលម្អិតពីវេទិកា«សួរមួយ»៕
Tag:
អ៊ូ រិទ្ធី
វេទិកាសួរមួយ
យុវជនកម្ពុជា
© រក្សាសិទ្ធិដោយ thmeythmey.com