ជាតិ
ម៉ារ៉ុក ស្នើឲ្យកម្ពុជាគាំទ្រខ្លួន ធ្វើជាម្ចាស់ផ្ទះ World Cup ២០២៦ រូបពីហ្វេសប៊ុកក្រសួងការបរទេស និងសហប្រតិបត្តិការកម្ពុជា
× ភ្នំពេញ៖ រដ្ឋាភិបាលម៉ារ៉ុក ស្នើឲ្យរដ្ឋាភិបាលកម្ពុជា ជួយគាំទ្រខ្លួន ធ្វើជាម្ចាស់ផ្ទះរៀបចំព្រឹត្តិការណ៍ World Cup ឆ្នាំ២០២៦ ខាងមុខ។ សំណើររបស់រដ្ឋាភិបាលម៉ារ៉ុកនេះ ធ្វើឡើងនៅក្នុងជំនួបរវាងលោកស្រី Mounia Boucetta អនុរដ្ឋមន្ត្រីការបរទេសម៉ារ៉ុក និងលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី៥ មេសា នៅខេត្តសៀមរាប។
ក្នុងជំនួបពិភាក្សាគ្នានោះ រដ្ឋាភិបាលម៉ារុក បានបង្ហាញពីឆន្ទៈក្នុងការពង្រឹងទំនាក់ទំនង និងកិច្ចសហប្រតិបត្តិការទ្វេរភាគី ជាមួយកម្ពុជាលើវិស័យជាច្រើន ឲ្យបានស៊ីជម្រៅបន្ថែមទៀត។ ហើយអ្វីដែលរដ្ឋាភិបាលម៉ារ៉ុក ចងចាំមិនភ្លេចនោះ គឺជំហររបស់កម្ពុជា ដែលគាំទ្រម៉ារ៉ុកលើឆាកអន្តរជាតិ។
សេចក្តីថ្លែងការណ៍របស់ក្រសួងការបរទេសកម្ពុជា បានស្រង់សម្ដីលោកស្រី Mounia Boucetta យ៉ាងដូច្នេះថា«ម៉ារ៉ុកសូមអរគុណកម្ពុជា ចំពោះការគាំទ្របេក្ខភាពម៉ារ៉ុកលើឆាកអន្តរជាតិ»។
បន្ថែមពីនេះលោកស្រី Mounia Boucetta ក៏ស្នើឲ្យរដ្ឋាភិបាលកម្ពុជា ជួយគាំទ្របេក្ខភាពម៉ារ៉ុក ក្នុងការធ្វើជាម្ចាស់ផ្ទះ World Cup នៅឆ្នាំ ២០២៦ ផងដែរ។
កាលពីខែសីហា ឆ្នាំ២០១៧ កន្លងមក ប្រទេសម៉ារ៉ុកបានដាក់ពាក្យសុំធ្វើជាម្ចាស់ផ្ទះរៀបចំការប្រកួតបាល់ទាត់ FIFA World Cup ២០២៦ ។ World Cup ឆ្នាំ២០២៦ កំពុងមានការដេញថ្លៃរួមពីកាណាដា ម៉ិកស៊ិក និងសហរដ្ឋអាម៉េរិក និងតទល់ជាមួយម៉ារ៉ុក ។ FIFA នឹងសម្រេចជ្រើសរើសក្នុងសមាជរបស់ខ្លួននាថ្ងៃទី១៣ ខែមិថុនា ឆ្នាំ២០១៨ ខណៈចំនួនក្រុមអាចកើនឡើងពី៣២ទៅ៤៨។ ប្រទេសម៉ារ៉ុក បានចូលរួមដេញថ្លៃធ្វើជាម្ចាស់ផ្ទះនៃការប្រកួត FIFA World Cup ២០២៦ នេះ គឺជាលើកទី៥ហើយ (ដេញថ្លៃធ្វើម្ចាស់ផ្ទះនៅឆ្នាំ ១៩៩៤, ១៩៩៨ , ២០០៦ និងឆ្នាំ២០១០)។ ប៉ុន្តែការដេញថ្លៃលើកនេះ ប្រទសម៉ារ៉ុក ហាក់មានក្តីសង្ឃឹមខ្ពស់ក្នុងការធ្វើជាម្ចាស់ផ្ទះ World Cup ជាងការដេញថ្លៃកន្លងមក។
ប្រទេសម៉ារ៉ុក ត្រៀមកញ្ចប់ថវិកា១៥,៨ពាន់លានដុល្លារ សម្រាប់ធ្វើជាម្ចាស់ផ្ទះ World Cup បើសិនជាអាចទទួលបានការគាំទ្រតាមបំណងមែននោះ។ គួរបញ្ជាក់ថា នៅឆ្នាំ២០១៨នេះ ប្រទេសរុស្ស៊ី ធ្វើជាម្ចាស់ World Cup និងឆ្នាំ២០២២ នៅប្រទេសកាតា៕
© រក្សាសិទ្ធិដោយ thmeythmey.com