អន្តរជាតិ
លោកលី សៀនឡុង ៖ «ដល់ពេលវេលាត្រូវកសាងសិង្ហបុរីម្ដងទៀតហើយ» នាយករដ្ឋមន្រ្តីសិង្ហបុរី លី សៀនឡុង ក្នុងវេទិកានៅសាកលវិទ្យាល័យមួយ (រូបភាព Strait Times)
× ជាង៥០ឆ្នាំក្រោយទទួលបានឯករាជ្យ សិង្ហបុរីបានក្លាយជាមានសេដ្ឋកិច្ចជឿនលឿនមួយរបស់ពិភពលោក តាមរយៈការប្រើប្រាស់ធនធានដែលខ្លួនមាន ឯប្រជាជនដែលធ្លាប់តែក្រីក្រ ក៏មានប្រាក់ចំណូលខ្ពស់។ ទន្ទឹមនឹងការរីកលូតលាស់នេះ សិង្ហបុរីបានប្រើប្រាស់ផ្ទៃដីរបស់ខ្លួនស្ទើរទាំងស្រុងទៅហើយ ដែលធ្វើឲ្យមានការខ្វះខាតសម្រាប់គម្រោងអភិវឌ្ឍខាងមុខ។ នាយករដ្ឋមន្ត្រី លី សៀនឡុង និយាយថា ពេលវេលាមកដល់ហើយសម្រាប់ការគិតគូរអភិវឌ្ឍសិង្ហបុរីឡើងវិញ។
នាយករដ្ឋមន្ត្រីសិង្ហបុរី លី សៀនឡុង នៅថ្ងៃទី៥ ខែមេសា បានលើកឡើងសារសំខាន់ក្នុងរៀបចំទស្សនៈវិស័យសម្រាប់រយៈពេល៥០ឆ្នាំខាងមុខ ខណៈដែលជាង៥០ឆ្នាំក្រោយផ្ដាច់ខ្លួនពីម៉ាឡេស៊ី សិង្ហបុរីបានអភិវធ្ឍដល់កម្រិតទៅហើយ។ នៅក្នុងវេទិកាមួយនៅសាកលវិទ្យាល័យបច្ចេកវិទ្យា និងច្នៃម៉ូតសិង្ហបុរី លោក លី និយាយថា ពេលវេលាមកដល់សម្រាប់ការគិតគូរ និងការកសាងសិង្ហបុរីឡើងវិញហើយមនុស្សជំនាន់ក្រោយមានតួនាទីសំខាន់លើកិច្ចការនេះ។
ចំពោះមុខនិស្សិតជាច្រើន លោក លី និយាយថា ផ្ទៃដីសិង្ហបុរីស្ទើរទាំងស្រុងត្រូវបានអភិវឌ្ឍ ឬក៏ស្ថិតក្នុងគម្រោងរួចស្រេច ហើយនេះហាក់ដូចជាមានន័យថា គ្មានដីសេសសល់សម្រាប់ការអភិវឌ្ឍទៀតឡើយ។ លោកក៏លើកជាសំណួរថា អ៊ីចឹងតើយើងអាចគិតគូរ ឬកសាងសិង្ហបុរីឡើងវិញរបៀបណា?
សម្រាប់ចម្លើយនៃសំណួរនេះ លោក លី ឆ្លើយថា គឺការបង្កើតដីថ្មី និងការប្រែក្លាយផ្នែករបស់សិង្ហបុរីដែលត្រូវបានអភិវឌ្ឍឲ្យទៅជាតំបន់ដែលអាចអភិវឌ្ឍម្ដងទៀត។ ជាមួយនឹងការតាំងចិត្ត និងការស្រមើស្រមៃ សិង្ហបុរីពិតជាអាចធ្វើបាន។ លោក លី បានយកកររណីរើមូលដ្ឋានអាកាស Paya Lebar ទៅកាន់ Changi ធ្វើជាឧទាហរណ៍នៃការប្រើប្រាស់ដីសម្រាប់ការអភិវឌ្ឍគម្រោងងថ្មី។
ជុំវិញការកសាងអនាគតថ្មី នាយករដ្ឋមន្ត្រីទីបីរបស់បុរីរដ្ឋមួយនេះយល់ថា សិង្ហបុរីគួរទាញយកប្រយោជន៍ពីការប្រមូលបទពិសោធន៍ និងធនធាន, ការស្រមៃ និងជំនាញរបស់ប្រជាជន និងពីតំបន់ផង។ គោលដៅសំខាន់ គឺការកសាងបរិស្ថានសម្រាប់ការរស់នៅល្អប្រសើរ ជាទីក្រុងដែលស្ថាបនាសម្រាប់ប្រជាជន និងអត្តសញ្ញាណក្នុងស្រុក។ ទន្ទឹមការស្រូបយកគំនិតថ្មី លោក លី ក៏រំឭកពីការអភិរក្សប្រវត្តិសាស្ត្រ ដែលនឹងធ្វើឲ្យសិង្ហបុរីក្លាយជាទីក្រុងចម្រុះដែលផ្លាស់ប្ដូររហូត និងរស់រវើករហូត។
ចំណុចសំខាន់មួយនៃការអភិវឌ្ឍទីក្រុងសិង្ហបុរី គឺប្រព័ន្ធដឹកជញ្ជូនសាធារណៈ។ នេះបើតាមការអះអាងរបស់លោកនាយករដ្ឋមន្ត្រី លី ដែលស្រង់សម្ដីដោយសារព័ត៌មាន Strait Times ។ ប្រព័ន្ធដឹកជញ្ជូននៅសិង្ហបុរី ជាពិសេសរថភ្លើង ដើរតួនាទីសំខាន់ណាស់ក្នុងជីវិតប្រជាជន។ លោក លី បន្ថែមថា រថភ្លើងមិនត្រូវមានបញ្ហាអ្វីឡើយ ត្រូវបានទទួលបានការថែទាំជាប្រចាំដើម្បីបង្កើនប្រសិទ្ធភាព និងសុវត្ថិភាព។ ប្រព័ន្ធរថភ្លើងក៏ទាក់ទងដល់វិស័យសេដ្ឋកិច្ចដែរ ព្រោះមានតួអង្គដូចជារដ្ឋាភិបាល ប្រតិបត្តិករ និងអ្នកប្រើប្រាស់ជាដើម។
អ្វីកាន់តែសំខាន់ រថភ្លើងកា្លយជាផ្នែកនៃបញ្ហាសង្គមនយោបាយទៅហើយ ដ្បិតប្រជាជនសិង្ហបុរីរាប់លាននាក់ពឹងផ្អែកលើដំណើរការរបស់វា ហើយវាក៏ជាបទពិសោធន៍សម្រាប់ជីវិតនៅសិង្ហបុរី និងសម្រាប់ប្រជាជនសិង្ហបុរី។ លោក លី សង្កតធ្ងន់ថា គ្មាននរណាសប្បាយចិត្ត ពេលថ្លៃជិះរថភ្លើងកើនឡើងឡើយ ដូចនេះរដ្ឋាភិបាលនឹងពិចារណាលើមូលដ្ឋានទាំងអស់ដើម្បីសម្រេចចិត្តធ្វើអ្វីដែលល្អបំផុតសម្រាប់សិង្ហបុរីទាំងមូល៕
Tag:
សិង្ហបុរី
លី សៀនឡុង
© រក្សាសិទ្ធិដោយ thmeythmey.com