ធ្វើដំណើរតាមផ្លូវគោក ឬផ្លូវទឹក? ក្រោយក្រសួងដាក់ឲ្យដំណើរការកាណូត៣គ្រឿង

ជាតិ

សេដ្ឋកិច្ច

ធ្វើដំណើរតាមផ្លូវគោក ឬផ្លូវទឹក? ក្រោយក្រសួងដាក់ឲ្យដំណើរការកាណូត៣គ្រឿង

06, Apr 2018 , 10:39 pm

រូបភាព

រូបពីក្រសួងសាធារណការ និងដឹកជញ្ជូន

ដោយ:

ក្រសួងសាធារណការ និងដឹកជញ្ជូន នៅថ្ងៃទី៦ខែមេសានេះ បានដាក់ឲ្យប្រើប្រាស់បណ្ដោះអាសន្ននូវកាណូតចំនួន៣គ្រឿង សម្រាប់ដឹកអ្នកដំណើរតាមផ្លូវទឹក ព្រែកព្នៅ-ភ្នំពេញ-តាខ្មៅ។ ហើយការធ្វើដំណើរតាមមធ្យោបាយនេះ រហូតដល់ដំណាច់ខែកក្កដា មិនមានការបង់កម្រៃសំបុត្រឡើយ។

ក្នុងដំណាក់កាលសាកល្បងនេះ ក្រសួងដាក់ឲ្យដំណើរការកាណូតចំនួន៣គ្រឿងសិន ដែល១គ្រឿងផ្ទុកមនុស្សបានប្រមាណ ៦០នាក់។ ហើយកាណូតដែលបំពាក់ម៉ាស៊ីនត្រជាក់ និងពោងសុវត្ថិភាពនេះ ចាប់ផ្ដើមផ្ដល់សេវាពីម៉ោង ៥និង៣០នាទីព្រឹក ដល់ម៉ោង ៥និង៣០នាទីល្ងាច។

ដោយឡែកចាប់ពីខែសីហាតទៅ ការធ្វើដំណើរតាមកាណូតទាំងនេះ ត្រូវបង់ប្រាក់ ១គីឡូម៉ែត្រថ្លៃ ៣២០រៀល។ បើគេធ្វើដំណើរពីឫស្សីកែវ ដល់ក្រុងតាខ្មៅ ដែលមានចម្ងាយជិត ២០គីឡូម៉ែត្រ ត្រូវចំណាយ ៥៩០០រៀល និងប្រើពេលប្រហែល ៤៥នាទី។

តម្លៃនេះថោកជាងការជិះតាក់ស៊ី ម៉ូតូកង់បី និងម៉ូតូឌុប ប៉ុន្តែថ្លៃជាងរថយន្តក្រុងសាធារណៈ ដែលគេចំណាយត្រឹម៣០០០រៀល (២ដំណាក់កាល)។ តែកាណូតនេះ លឿនជាងរថយន្តក្រុង ដោយការជិះកាណូតមិនជួបបញ្ហាស្ទះចរាចរណ៍ ហើយបើកក្នុងល្បឿន ៤០គីឡូម៉ែត្រក្នុង១ម៉ោង។

មានចំណតចំនួន៦ទីតាំងសម្រាប់ការធ្វើដំណើរតាមផ្លូវទឹកនេះ។ ចំណតទាំងនោះរួមមាន ព្រែកព្នៅ ឫស្សីកែវ ផ្សារចាស់ ចតុមុខ ច្បារអំពៅ និងក្រុងតាខ្មៅ។ តែបច្ចុប្បន្នចំណតព្រែកព្នៅ និងច្បារអំពៅ មិនទាន់សាងសង់រួចរាល់នៅឡើយ។ កាណូត ត្រូវឈប់ដាក់អ្នកដំណើរសម្រាប់ចំណតនីមួយៗមិនលើសពី១០នាទីនោះទេ៕