កីឡាអន្តរជាតិ
អន្តរជាតិ
Pacquiao នឹងឡើងដណ្តើមខ្សែក្រវាត់ WBA ពី Matthysse នៅម៉ាឡេស៊ីនាខែកក្កដា រូបភាព ពី AFP
× Manny Pacquiao នឹងឡើងសង្វៀនសារជាថ្មីដើម្បីដណ្តើមខ្សែក្រវាត់ជាមួយម្ចាស់ខ្សែក្រវាត់ពិភពលោករបស់អាហ្សង់ទីន Lucas Matthysse ដែលធ្វើឡើងលើទឹកដីអាស៊ី។ នេះបើតាមការបញ្ជាក់របស់អ្នកផ្គូរផ្គងកីឡាប្រដាល់សកលពិភពលោក Oscar De La Hoya កាលពីទីថ្ងៃ២ ខែមេសានេះ។
នៅក្នុងសេចក្តីប្រកាសមួយលើបណ្តាញសង្គម Twitter លោក De La Hoya ឬ Golden Boy បានសរសេរថា៖«ហត្ថលេខា និងបោះត្រាបានធ្វើរួចរាល់ហើយ ពីការប្រកាសជាផ្លូវការថាជើងឯកពិភពលោក WBA កីឡាករ Lucas Matthysse នឹងដាក់ខ្សែក្រវាត់របស់គេ ដើម្បីតទល់នឹង Manny Pacquiao ដែលធ្វើឡើងក្នុងទីក្រុងគូឡាឡាំពួ ប្រទេសម៉ាឡេស៊ី ថ្ងៃអាទិត្យទី ១៥ ខែកក្កដា»។
នេះជាការឡើងសង្វៀនសារជាថ្មីរបស់ស្តេចប្រដាល់ហ្វីលីពីនបន្ទាប់ពីចាញ់អ្នកប្រដាល់អូស្ត្រាលី Jeff Horn នៅទីក្រុង Brisbane កាលពីខែកក្កដា ឆ្នាំ២០១៧ និងបានបាត់បង់ខ្សែក្រវាត់ WBO មួយខ្សែផងដែរ។
ទីភ្នាក់ងារព័ត៌មាន AFP បានផ្សាយថា អតីតម្ចាស់ខ្សែក្រវាត់៨ស្ថាប័ន វ័យ៣៩ឆ្នាំរូបនេះ ក៏បាននិយាយស្វាគមន៍ទៅកាន់ អ្នកប្រដាល់សញ្ជាតិអាហ្សង់ទីន វ័យ៣៥ ដែលធ្លាប់ប្រកួត៤៤ដង ឈ្នះ៣៩ ចាញ់៤ និងផ្តួលដៃគូឲ្យសន្លប់៣៦លើក ថាជាកីឡាករជើងខ្លាំងលំដាប់ពិភពលោក សម្រាប់ជំនួបដ៏ស្វិតស្វាញមួយនេះ។
មុនប៉ះ Pacquiao នៅលើទឹកដីអាស៊ីនេះ Matthysse បានផ្តួលកីឡាករថៃ Teerachai Sithmorseng រួចមកហើយដើម្បីគ្រងខ្សែក្រវាត់ WBA កាលពីខែមករាកន្លងទៅ៕
Tag:
ប្រដាល់
Manny Pacquiao
Lucas Matthysse
WBA
© រក្សាសិទ្ធិដោយ thmeythmey.com