អន្តរជាតិ
ទូតអាមេរិកប្រចាំ UN ៖ រុស្ស៊ីមិនអាចធ្វើជាមិត្តភក្តិរបស់អាមេរិកឡើយ
លោកស្រី Nikki Haley ក្នុងកិច្ចប្រជុំក្រុមប្រឹក្សាសន្តិសុខកន្លងមក (រូបភាព AFP)
×![]()
ដោយ: តន ចាន់រិទ្ធារ៉ា
អគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Nikki Haley ដែលមានជំហរតឹងរ៉ឹងដាក់រុស្ស៊ីតាំងពីដើមមក បានប្រើប្រាស់សម្ដីវាយប្រហាររុស្ស៊ីខ្លាំងៗជាថ្មីទៀត។ លោកស្រី Haley ព្រមានថា រុស្ស៊ីមិនអាចក្លាយជាមិត្តភក្តិរបស់អាមេរិកបានឡើយ។ បើតាមអ្នកការទូតរូបនេះ ទោះជារុស្ស៊ីធ្វើល្អយ៉ាងណា អាមេរិកនឹងចាត់វិធានការដដែលក្នុងករណីចាំបាច់។ ទំនាក់ទំនងអាមេរិក និងរុស្ស៊ីកាន់ល្អក់កករ លើបញ្ហាជាច្រើន ទោះជាលោក ដូណាល់ ត្រាំ ចង់ស្ដារវិញក៏ដោយ។
នៅវេទិកាអង្គការសហប្រជាជាតិ លោកស្រី Nikki Haley អគ្គរដ្ឋទូតអាមេរិកប្រចាំស្ថាប័ននេះ តែងនិយាយវាយប្រហាររុស្ស៊ីជាញឹកញយ។ សម្រាប់ទំនាក់ទំនងជាមួយរុស្ស៊ី លោកស្រី Haley សារភាពថា ការដែលរុស្ស៊ីក្លាយជាមិត្តភក្តិរបស់អាមេរិក ហាក់ដូចជាមិនអាចកើតឡើងបានឡើយ ហើយថា រដ្ឋបាលប្រធានាធិបតី ដូណាល់ ត្រាំ ធ្វើរឿងប្រឆាំងរុស្ស៊ី ច្រើនជាងប្រធានាធិបតីណាទាំងអស់ ចាប់ពីរដ្ឋបាលលោក Ronald Reagan មក។
ក្នុងជំនួបជានិស្សិតនៅឯ Duke University ក្នុងរដ្ឋ North Carolina នៅថ្ងៃទី៦ ខែមេសា លោកស្រី Haley អះអាងថា រុស្ស៊ីនឹងមិនអាចក្លាយជាមិត្តភក្តិរបស់អាមេរិកឡើយ។ លោកស្រីអះអាងបែបនេះទៅនឹងសំណួរទាក់ទងនឹងការចោទប្រកាន់ថា រុស្ស៊ីកកូរកកាយការបោះឆ្នោតអាមរិកឆ្នាំ២០១៦ ។ មន្ត្រីការទូតរូបនេះលើកឡើងទៀតថា អាមេរិកនៅតែធ្វើការជាមួយរុស្ស៊ី បើចាំបាច់ និងធ្វើសកម្មភាពប្រឆាំង បើចាំបាច់ដូចគ្នា។ នេះបើតាមការផ្សាយរបស់សារព័ត៌មាន RT ។
ដោយចង់បង្ហាញថា អាមេរិកមិនមែននិយាយតែមាត់នោះ តំណាងអាមេរិកប្រចាំអង្គការសហប្រជាជាតិខាងលើ បានលើកយកការបណ្ដេញចេញមន្ត្រីការទូតរុស្ស៊ី៦០នាក់ ពីទឹកដីអាមេរិកមកបញ្ជាក់ ព្រមគ្នានឹងបញ្ជូនអាវុធទៅឲ្យអ៊ុយក្រែន ដើម្បីការពារខ្លួនពីគំរាមរបស់រុស្ស៊ី។ បើតាមមន្ត្រីការទូតដដែលនេះ អាមេរិកកំពុងធ្វើរឿងពីរដែលរុស្ស៊ីមិនចង់ឃើញសោះ គឺការពង្រីកអំណាចយោធា និងពង្រឹងនយោបាយថាមពល។
តាមពិតទៅ អាមេរិកមិនត្រឹមតែបណ្ដេញមន្ត្រីទូតរុស្ស៊ីឡើយ រដ្ឋបាលលោក ដូណាល់ ត្រាំ បានដាក់ទណ្ឌកម្មលើរុស្ស៊ីជាច្រើនលើក ដោយសារតែករណីរុស្ស៊ីលូកលាន់ការបោះឆ្នោតអាមេរិក ទាំងរុស្ស៊ីទាត់ចោលដាច់ខាត។ ទោះជាបានចាត់វិធានការប្រឆាំងរុស្ស៊ីច្រើនលើករួចហើយក្ដី លោកស្រី Haley បញ្ជាក់ថា៖ «អ្នកមិនទាន់ឃើញចុងបញ្ចប់នៃអ្វីដែលរដ្ឋបាលលោក ត្រាំ នឹងធ្វើដាក់រុស្ស៊ីនៅឡើយទេ។ យើងនឹងបន្តទៀត»។
ចុងក្រោយ លោកស្រី Haley ក៏បានផ្ដល់ដំបូន្មានឲ្យមេដឹកនាំរុស្ស៊ី បើចង់ដោះស្រាបញ្ហានានា។ លោកស្រីបន្តថា មេដឹកនាំរុស្ស៊ីនឹងមានជីវិតល្អប្រសើរ ប្រសិនបើពួកគេសម្រេចចិត្តធ្វើជាតួអង្គល្អ និងចូលរួមក្នុងសហគមន៍អន្តរជាតិដូចប្រទេសធម្មតាផ្សេងទៀត។ នេះក៏ព្រោះ ប្រទេសជាច្រើននឹងចង់ធ្វើការជាមួយរុស្ស៊ីមិនខាន៕
Tag:
អាមេរិក
រុស្ស៊ី
UN
Nikki Haley
© រក្សាសិទ្ធិដោយ thmeythmey.com
